Текст книги "Горечь утраты (Юғалтыу һағыштары)"

Автор книги: Фарваз Сайфуллин

сообщить о нарушении

Текущая страница: 1 (всего у книги 6 страниц)

РӘСӘЙ ФЕДЕРАЦИЯҺЫНЫҢ МӘҒАРИФ ҺӘМ ФӘН МИНИСТРЛЫҒЫ

БАШҠОРТ ДӘҮЛӘТ УНИВЕРСИТЕТЫ

Фәрүәз Сәйфуллин

ЮҒАЛТЫУ ҺАҒЫШТАРЫ

Сибай 2012

УДК 821.512.141

ББК 84 Баш

С 14

Сәйфуллин Ф.А.

С14

Юғалтыу һағыштары. Шиғырҙар һәм хикәйәләр. – Сибай: БР-ҙың “Сибай ҡала типографияһы” ДУПы нәшриәте, 2012. – 135 бит.

ISBN 978-5-905062-32-2

Нәфис әҙәбиәт – ҡеүәтле тәрбиә сараларының береһе. Педагогика фәндәре кандидаты, профессор Фәрүәз Сәйфуллиндың был йыйынтыҡҡа ингән шиғырҙары, хикәйәләрендә төрлө типтағы кешеләрҙең холоҡ-фиғелдәре, хистәре, уй-хыялдары, тормош юлдары сағыла. Ата-әсәләр ҙә, уҡытыусылар ҙа, йәштәр ҙә, ололар ҙа – һәр кем уларҙы тәрбиә эшендә ҡуллана ала.

УДК 821.512.141

ББК 84 Баш

ISBN 978-5-905062-32-2

© Сәйфуллин Ф.А., 2012

© БР-ҙың “Сибай ҡала типографияһы”

ДУПы нәшриәте, 2012

Төн менән көн (шиғырҙар)

Ҡайҙа ул һин?

Йөрәгем һине таптыра ………………………………………….. 8

Аҡ юл………………………………………………………………...8

Ҡайҙа ул һин?..........................................................................9

Шатлыҡ………………………………………………………………9

Таптым

Матурлыҡ…………………………………………………...……..11

Тәҙрә………………………………………………………...……..11

Хат…………………………………………………………...……..12

Мөғжизәле төн……………………………………………………12

Туй…………………………………………………………...……..13

Ҡояш-ҡ-айым……………………………………………………..13

Ҡояш……………………………………………………….………14

Бүләк………………………………………………………..……..15

Бәйләнеш…………….……………………………………..…….15

Ғүмер миҙгеле……………………………………………………16

Елеү………………………………………………………….…….16

Һөйөү уты …………………………………………………………17

Йөрәк осоп сығып китер төҫлө………………………………...17

Мөхәббәт уcағында……………………………………………...17

Тереһыу…………………………………………………….……..18

Һөйөүебеҙ көслө үлемдән……………………………………..18

Ҡояштарым……………………………………………………....19

Яуап………………………………………………………….…….20

Йөҙөк……………………………………………………….……..20

Ҡотҡарыусым…………………………………………….………20

Юғалттым

Юл сатында………………………………………………………23

Арғымаҡ…………………………………………………….…….23

Төн менән көн …………………………………………………..24

Йоҙаҡ……………………………………………………………..24

Йомаҡ……………………………………………………………..25

Ағыулы уҡ ………………………………………………………..25

Усаҡ……………………………………………………………….26

Килештәр…………………………………………………………26

Һағыныу…………………………………………………………..28

Төндә торһаң, күккә ҡара……………………………………..28

Исемең……………………………………………………………29

Яҡтылыҡ………………………………………………………….29

Дауыл……………………………………………………………..30

Атайым, әсәйем, туғандарым

Етешмәй………………………………………………………….33

Сәй………………………………………………………………..33

Һандар………………………………………………… ………...34

Атай йорто……………………………………………………….34

Аҡ менән ҡара………………………………………………….. 35

Тыуған ерем, йырым, илем, телем…

Тауҙар …………………………………………………………….37

Йыр-моң …………………………………………………………..37

Ҡарҙар……………….……………………………………..……. 38

Баҡса………………………………………………………..…….39

Теләк……………………………………………………….……..40

Яҙ…………………………………………………………….…….40

Һуҡмаҡ……………………………………………………………41

Төнгө һүрәт……………………………………………………….41

Дәрес……………………………………………………….….….42

Осоу……………………………………………………….………43

Орлоҡ……………………………………………………….…….43

Йәшереү…………………………………………………….……44

Иҫкәртеү…………………………………………………………44

Доға………………………………………………………………..45

Аҡыллы ҡайындар………………………………………………45

Ай менән Ҡояш………………………………………………….46

Ҡараңғы уйҙар……………………………………………………47

Сер…………………………………………………………..……..47

Ҡараҡ……………………………………………………….……..48

Баҙар……………………………………………………….……..49

Ил асыуы…………………………………………………………49

Туған тел………………………………………………………….50

Ваҡыт

Сәғәт………………………………………………………..……..53

Сәғәт теле…………………………………………………………53

Ваҡыт………………………………………………………..……..54

Иҫке йылдың һуңғы төнө………………………………………..55

Яңы йыл теләге…………………………………………………...56

Һабантуй………………………………………………….……….56

Яңырыу…………………………………………………………….57

Таяҡ………………………………………………………………...57

Хәтер………………………………………………………..……58

Йөк………………………………………………………….……..58

Бағышлауҙар

Һәйкәл…………………………………………………….………61

Кумир………………………………………………………………61

Атайымды таптым (хикәйәләр)

«Рәхмәт!»………………………………………………………….63

«Мин дә һине яратам!»………………………………………….70

Ситлектәге мөхәббәт……………………………………………78

Ҡурҡыныс һүҙ…………………………………………………….89

Юғалтыу……………………………………………………...…....95

Ҡурҡыу……………………………………………………….…..102

Быяла банка……………………………………………..………108

Юғалған кәнфит………………………………………………...113

Яуызия……………………………………………………...…….118

Атайымды таптым……………………………………………...123

Ҡушымта…………………………………………………….…...134

Төн менән көн

(шиғырҙар)

Ҡайҙа ул һин?

Йөрәгем һине таптыра

Һине генә теләй күңел,

Һин генә миңә кәрәк.

Һине таптырып күкрәктә

Тулай ҙа тора йөрәк.

Йөрәгем гүйә Аҡбуҙат -

Торалмай биктә оҙаҡ.

Тулай башлаһа, асыла

Күкрәк ситлеге – йоҙаҡ.

Йөрәгем һине таптыра –

Йөрәгем һинһеҙ һүнә.

Йөрәгемдең тамырҙары,

Һөйөүемдең ямғырҙары

Һиндә бит, йәнем, һиндә.

07. 02. 2004 й., Сибай.

Аҡ юл

Аҡ ағастар – аҡһаҡалдар

Миңә, ана, аҡ юл теләй.

Шығыр-шығыр килеп ҡарҙар

Ҡолағыма шиғыр һөйләй.

Ап-аҡ елдәр аҡбуҙатҡа

Әйләнә лә атландыра.

Юлдар, йылдар, һалдатмы ни,

Теҙелешеп алда тора.

Юлдар үтәм, йылдар һүтәм…

Яҡынаям, йырағаям.

Ап-аҡ юлдан аҡбуҙатта

һине эҙләп китеп барам.

13. 01. 2012 й., Сибай.

Ҡайҙа ул һин?

Ике кеше эҙе ҡарҙа

Көнсығышҡа ҡарай киткән.

Береһе – һин. Кемдер һиңә

Минән алда барып еткән.

Эҙең буйлап һинең арттан

Китеп барам көнсығышҡа.

Һин ҡасаһың, ҡояш ҡаса -

Килеп сығам көнбайышҡа.

Һине эҙләп, ғүмер буйы

Ерҙе урап әйләнәм мин.

Эҙҙәрең бар, ә үҙең юҡ -

Ҡайҙа ул һин, ҡайҙа ул һин?

14.05. 2009 й., Иҫке Сибай.

Шатлыҡ

Белоретҡа китеп барам –

«Пазик» елә осҡан уҡтай.

Күк йөҙөндә аҡ болоттар,

Самолеттар, ҡоштар туҡтай.

Тауҙар, күлдәр, бағаналар

Шатланышып йүгерәләр.

Светофорҙарҙа – йәшел ут,

Ҡалғандарын һүндергәндәр.

Йәшел төҫтә – урман, үлән…

Атҡан уҡтай, еләм-еләм

Һинең янға. Шатланамын,

…Төш икәнен үҙем беләм.

24. 02. 2010 й., Сибай.

Таптым

Матурлыҡ

Матур ҡыҙҙар, матур йырҙар һымаҡ,

Ҡойолалар, ахры, нотанан.

Улар барҙа, онотолоп китеп,

Мин йырларға ҡапыл тотонам.

Был йырҙарым, бәхет шишмәһеләй,

Туҡтамаһын ине һис ҡасан.

Үҙем теләп алған яңғыҙлыҡтан

Йырҙар йырлап хәҙер мин ҡасам.

Матур ҡыҙҙар мине йырсы итте.

Рәхмәт әйтәм бөгөн уларға.

Матурлыҡтан күҙ йәштәре кибә,

Күҙ алмаһы тула нурҙарға -

Тотонамын шуға йырларға.

22. 07. 2011 й., Иҫке Сибай.

Тәҙрә

Тәҙрәләрем генә белә

Һине нисек көткәнемде.

Тәҙрә аша ҡарап ҡалам

Һинең үтеп киткәнеңде.

Локаторҙағы нөктә һин,

Табылаһың, юғалаһың.

Мин был яҡта тороп ҡалам,

Ә һин ҡайҙа юл алаһың?

Мәңгелек ут булып янам -

Ҡыҙаралар быялалар.

Ҡыйыуһыҙлығыма минең

Әллә инде оялалар?

10. 03. 2010 й., Сибай.

Хат

Хәрефтәргә тыңҡыслап

Тултырҙым да наҙҙы.

Аҡ болотҡа – ҡағыҙға

Һөйөү хаты яҙҙым.

Яҙған хатым, күрәһең,

Уға барып еткән.

Миңә ҡарап Ай ҡыҙы

Эй йылмая күктә.

Ғашиҡтарға кәртә юҡ,

Юҡ уларға яра.

Ҡанатланып һөйөүҙән

Айға осоп барам.

14. 02. 2012 й., Сибай.

Мөғжизәле төн

Ҡараңғылыҡ ҡурҡып ҡасты

Беҙ ҡабыҙған усаҡтан.

Өҫтөбөҙгә ысыҡ яуҙы

Эргәләге уҫаҡтан.

Ҡоштар ҙа йоҡламанылар,

Төн буйы һайранылар.

Мөғжизәле төн килгәнен

Күрәһең, аңланылар.

Ай ғына беҙгә алыҫтан

Моңайып ҡарай бөгөн.

Яңғыҙлығына оялып,

Ҡаплаған ярты битен.

Йөрәк – сәғәт һанай ғына

Бәхетле минуттарҙы.

Яңғыҙ сағымда һағынам

Ысыҡлы уҫаҡтарҙы,

Усаҡтарҙы.

12. 01. 2011 й., Сибай.

Туй

Бөгөн беҙҙә туй булырын

Әллә ул да беләме?

Төнө буйы бер туҡтамай

Ай ҡыҙы он иләне.

Ер ҙә ҡарайған күлдәген

Алмаштырҙы ап-аҡҡа.

Елдәр саҡырыу хаттары

Тараталар ян-яҡҡа.

Ҡарағайҙар, аҡ ҡайындар

Таянған да бөйөргә,

Көтөп тора, туй башланғас,

Осоп-төшөп бейергә.

Бөтәһе лә әҙер туйға,

Ҡалды һине «табаһы».

Һин – ғүмерем буйы барған

Туйҙың башы – аҙағы.

25. 02. 2011 й., Сибай.

Ҡояш-ҡ-айым

Тәү күргәндә һине, йәнем,

Мин йондоҙға оҡшатҡайным.

Йондоҙ нимә? Һин икәнһең

Көндөҙ – ҡояш, төнөн – айым.

Ҡояш буйлап әйләнеүҙән

Бер ҡасан да туҡтамайым.

Ерем менән мине урап

Әйләнәһең һин дә, айым.

Әйләнәбеҙ, бәйләнәбеҙ

Һинең менән йылдар буйы.

Ер, Ай, Ҡояш араһында

Бара беҙҙең никах туйы.

Хоҙай үҙе доға уҡый,

Фәрештәләр бәхет теләй.

Аҡ болоттар, аҡ юл булып,

Алдыбыҙға йөҙөп килә.

Ә йондоҙҙар шатлыҡтарға

Һыймайынса атылалар.

Ҡанатлылар беҙҙең туйға -

Бейеклеккә артылалар.

Ҡараңғылыҡ ҡасҡан күктән

Күҙҙәреңдән күҙ алмайым.

Минең өсөн һин – мәңгелек:

Көндөҙ – ҡояш, төнөн – айым.

12.05. 2010 й., Сибай.

Ҡояш

Ҡара болоттар таралды,

Дауыл тынды урамда.

Йән әрнеткән әсе тоҙҙар

Иреп бөттө ярамда.

Ҡояш сыҡты. Күктә түгел,

Һин күренгән ишектән.

Ике йөрәктең тибешен

Берәү итеп ишетәм.

Әллә эшен тапшырғанмы

Ҡояш башҡорт ҡыҙына?

Хәҙер һинең нурҙарыңда

Ғүмер буйы ҡыҙынам.

05. 09. 2011 й., Сибай.

Бүләк

Календарҙа был байрам юҡ,

Ул – минең йөрәгемдә.

Байрам миңә һинең янда

Өйрөлөп йөрөгәндә.

Һин –ҡояш. Йылы нурҙарың

Күңелемде иретә.

Орбитаңда йондоҙ итеп

Йөрәгемде йөрөтәм.

Бөгөн һинең тыуған көнөң,

Ғүмер йылын үткәнһең.

Һөйөү тулы йөрәгемде

Һиңә бүләк итәмен.

13. 10. 2010 й., Сибай.

Бәйләнеш

Бөтәһе бергә бәйләнгән,

Тәбиғәт ул бер бөтөн.

Мейесемдә утын яна,

Мөрйәнән сыға төтөн.

Ә йылыһы өйҙә ҡала,

Йылы һөйәк һындырмай.

Йылы ерҙән һыуыҡ ҡаса,

Өшөттөрмәй, туңдырмай.

Сәсебеҙ сәскә бәйләнгән,

Беҙ икебеҙ бер бөтөн.

Хисебеҙҙән таштар ирей,

Ҡояш ҡалҡа кис, төнөн.

Йылы яҡтан ҡоштар ҡайта,

Шытып сыға үләндәр.

Ҡышты яҙға әйләндерә

Янып һөйә белгәндәр.

03. 03. 2012 й., Сибай.

Ғүмер миҙгеле

Ҡыш менән яҙ, ана, тышта

Эй Һуғышып йөрөйҙәр.

Ҡар бөртөктәре һауала

Осҡан көйө ирейҙәр.

Күҙ йәштәре тама ергә.

Ҡыш илай, ә яҙ көлә.

…Мөхәббәт ғүмер миҙгелен

Ҡыш менән яҙға бүлә.

Һинһеҙ мин – аҙашып күктә

Йөрөгән ҡар бөртөгө.

Һинең янда – яҙ йылыһы

Ярған имән бөрөһө.

04. 03. 2012 й., Сибай.

Елеү

Үҙ үҙемә урын табалмайым.

Ер шарында миңә урын тар.

Икһеҙ-сикһеҙ Йыһан киңлегенә

Алып китегеҙсе, болоттар.

Үҙем менән йәндән артыҡ күреп

Һөйгән һылыуымды алайым.

Йондоҙҙарҙан – утлы хәрефтәрҙән

«Яратам» тип күккә яҙайым.

Мөхәббәт бит, беләм, Ерҙә тыуа,

Йәшәй бейеклектә – Йыһанда.

…Аҡ болотта – Аҡбуҙатта икәү

Беҙ еләбеҙ әле һаман да.

02. 09. 2011 й., Сибай.

Һөйөү уты

Һине уйлап йоҡлап китәм,

Һине уйлап уянам.

Төндәрен дә, көндәрен дә

Һөйөү утында янам.

Һөйөү уты эҫе түгел,

Һөйөү уты бешермәй.

Осҡон итеп осора ла

Ергә ҡабат төшөрмәй.

18. 04. 2006 й., Сибай.

Йөрәк осоп сығып китер төҫлө…

Ҡулдарымды ҡулдарыңа һалам,

Ҡулдарыңдың cихри көcө бар.

Йөрәк осоп сығып китер төҫлө…

Һөйөүемә – йөрәк, ә йөрәккә

Күкрәк cитлегенең эсе тар.

23. 06. 1990 й., Өфө.

Мөхәббәт у c ағында

Утыҙ минут – утыҙ мең ут

Мөхәббәт уcағында.

Утыҙ минут тороп торҙоң

Һин минең ҡосағымда.

Өнһөҙ ҡалып, эй, тыңланың

Йөрәктәр һөйләшеүен.

Ғашиҡтарҙың бәхетенән

Йәшермәй көнләшеүен,

Яңғыҙ ҡайын ағасына

Кәкүк килеп ултырҙы.

Ултырҙы ла: «Мин кәкүк!» – тип

Утыҙ тапҡыр ҡысҡырҙы.

Кәкүк шулай өҙгөләнде

Яңғыҙаҡ булғанына.

... Утыҙ тапҡыр бышылданым

«Һөйәм» тип ҡолағыңа.

12. 04. 1989 й., Өфө

Тереһыу

Һинең менән ҡайтҡым килә,

Ҡайтып булмай – эшем бар.

Һине үлер cиккә етеп

Яратыусы кеше бар.

Ул – мин. Һөйөү тулҡынында

Кәмә булып сайҡалам.

Түңкәреләм, күтәреләм,

Күккә теймәй саҡ ҡалам.

Көлдөрәһең, үлтерәһең,

Эсерәһең тереһыу.

…Һине һөйөү – мең ҡат үлеп,

Мең ҡат ҡабат терелеү.

11.11. 2006 й., Сибай – Стәрлетамаҡ районы.

Һөйөүебеҙ көслө үлемдән

Бөтә донъя миңә үлгән кеүек,

Үле тынлыҡ беҙҙең бүлмәлә.

Ишегемде эләм, асаһым юҡ,

Батша ҡыҙы үҙе килһә лә.

Һурып-һурып иренеңдән үбәм,

Ҡосаҡлайым ҡыҫып билеңдән.

Бөтә донъя миңә үлгән кеүек…

Һөйөүебеҙ көслө үлемдән.

21. 03. 1990 й., Өфө.

Ҡояштарым

Ҡояшым икәү. Береһе

Бик өҫтә.

Икенсеһе күренмәй ҙә -

Ул эстә.

Өҫтәгеһе иртән ҡалҡа,

Кис бата.

Эстәгеһе йөрәгемдә

Тик ята.

Тик ятһа ла, үҙе мине

Йүгертә.

Үлеп барған ерҙән хатта

Терелтә,

Салауаттай батыр, ғорур

Ир итә,

Ҡайһы саҡта май шикелле

Иретә.

Ул ҡояштың исеме бар –

Мөхәббәт.

Өҫтәге ҡояштан ул ҙур,

Мөһабәт.

20. 04. 2010 й., Сибай.

Яуап

Бәхет, бәхет… Нимә һуң ул бәхет?

Ниндәй төҫтә, ниндәй ҙурлыҡта?

Ҡиәфәте нисек? Шәжәрәһе?

Ярала ул ниндәй орлоҡтан?

Яуап эҙләп, күҙҙәреңә баҡтым -

Һинең күҙҙәр китап шикелле…

Аңлай алмай торҙом тәүге мәлдә -

Белемемә ҡуйҙың «икеле».

Ә күҙҙәрең, китап бите кеүек,

Бер асылды, берсә ябылды.

Һине һөйөү үҙе бәхет икән –

Уҡый торғас, яуап табылды.

16. 02. 2010 й., Сибай.

Йөҙөк

Исемең матур һинең, үҙең дә -

Мең төрлө нур балҡый йөҙөңдә.

Һин юҡ саҡта мине оҡшаталар

Ҡашы төшөп ҡалған йөҙөккә.

Ҡашы төшөп ҡалған ул йөҙөктөң

Кәрәге юҡ, урыны – сүплектә.

Һинән башҡа мин – сүп. Һинең янда

Әйләнәмен ҡашлы йөҙөккә.

09. 03. 2010 й., Сибай.

Ҡотҡарыусым

Үҙ-үҙемде аңламайым,

Мин үҙем – үҙем түгел.

Күңелдәге көсһөҙлөктө

Булмайсы бөгөн еңеп.

Ҡулым бығаулы, йөрөмәй,

Аяҡтарым тышаулы.

Иҙелгәнмен, әйтерһең дә,

Өҫтән өҫкә таш яуҙы.

Ҡотҡарҙың мине был хәлдән -

Алдымда пәйҙә булдың.

Мин бит һине һағыныуҙан

Көн буйы бәйҙә булдым.

07. 08. 2010 й., Иҫке Сибай.

Юғалттым

Юл сатында

«Ҡыҙғы» тигән яҙыу күреп,

Туҡтап ҡалдым юл сатында.

Шул ауылдан бер һылыуҙы

Яратҡайным йәш сағымда.

Хәҙер инде ҡартайғанмын,

Ә һөйөүем һаман да йәш.

Күҙ алдымдан китмәй әле

Ҡыҙғылағы сибәр кәләш.

Күҙ алдымда тора яҙыу,

Уҡ күрһәтә Ҡыҙғы яғын.

Юл сатында торған ҡартты –

Үҙ-үҙемде ҡыҙғанамын.

Артта – яҙмыш ҡапҡалары,

Һул яғымда – хаталарым.

Уң яғымда ята Ҡыҙғы -

Юл сатында ғүмер уҙҙы.

01. 05. 2010 й., Сибай.

Арғымаҡ

Яңғыҙ йәшәһәм дә яңғыҙ

Булманым мин һис ҡасан.

Төштәремдә һин килгәндә,

Ишегемде шар асам.

Өйрәтелмәгән арғымаҡ -

Ярһып саба йөрәгем.

Йүгәнләргә теләүселәр

Булды – башын бирмәне.

Минән дә эйәр һалдырмай –

Тора ла һиңә ҡаса.

Арғымағыма атланып,

Төшөмдә түгел, өнөмдә

Килерһең икән ҡасан?

22. 02. 2011 й., Сибай

Төн менән көн

Тәбиғәткә нур таратып

Арығандыр инде көн,

Йоҡлап китте. Ипләп кенә

Ҡосаҡланы уны төн.

Хас та беҙҙең һөйөү кеүек…

Ул йоҡлағас башлана:

Төштәремдә һине күреп,

Ҡосағыңа ташланам.

Һин дә ҡасып-боҫоп ҡына

Йоҡлап ятҡан иреңдән,

Төштәремә килеп кереп,

Үбәһең бит ирендән.

09. 05., 2006 й., Сибай.

Йоҙаҡ

Ҡанаттарым булһа, осор инем,

Осор инем башың осонда.

Хыялымды һинең бер ҡарашың

Әйләндерер ине ысынға.

Ҡарамайһың. Һуҡыр кеше кеүек

Күрмәйһең дә мине, белмәйһең.

Ҡанат ҡуйыу түгел, киреһенсә,

Аяғыма бығау эләһең.

Һинһеҙ, белһәң, мин – тышаулы толпар,

Ҡанатһыҙ ҡош – иркем сикләнгән.

Йөрәгемдә һөйөүемдең хисе

Һинең йоҙаҡ менән бикләнгән.

13. 09. 2011 й., Сибай.

Йомаҡ

Йомаҡ сисеү – фәһемле эш,

Кеше өсөн оло һабаҡ.

– Йомаҡ әйтәм, яуабын тап:

Үҙе һыуыҡ, үҙе ап-аҡ.

– Аҡ ҡар, – тинең, аҫҡа ҡарап.

– Юҡ, яуабың дөрөҫ түгел.

«Үҙе һыуыҡ, үҙе ап-аҡ» -

Һинең менән минең күңел.

Һөйөү ҡасҡан һинән, минән,

Ә һөйөүһеҙ күңел һыуыҡ,

Шундай һыуыҡ. Өҫтөбөҙгә

Яуып торған аҡ ҡар кеүек.

24. 02. 2010 й., Сибай– Белорет.

Ағыулы уҡ

Тышта аяҙ, тышта йылы…

Эстә буран ҡотора.

Йөрәгемде уста тотоп,

Өйҙә яңғыҙ ултырам.

Хыянатың – ағыулы уҡ,

Тишеп кереп күкрәкте,

Уcтарыма алып һалды

Һине һөйгән йөрәкте.

… Тышта аяҙ, тышта йылы…

Эстә дауыл ҡотора.

Йөрәгемде уста тотоп,

Һине уйлап ултырам.

13. 03. 2006 й., Сибай.

Усаҡ

Яҙмы, ҡышмы, аңлап булмай,

Әле ошо ваҡытта.

Ҡайнап торған көйө туңған

Һыу ҙа тимер һауытта.

Йөрәгемдә оло һөйөү

Урғыла, таша, ҡайнай.

Ул һөйөүҙең усағы һин.

Усағы һүнгән, янмай.

Усаҡһыҙ һөйөү – ҡосаҡһыҙ

Ҡосаҡлашыуға оҡшаш.

Күкрәгемдә йөрәк түгел,

Йоҙороҡ ҙурлыҡ бер таш

Усаҡһыҙ утта ҡайнай,

Ҡанай.

28. 08.2011 й., Сибай.

Килештәр

Төп килеш – һин.

Һиңә – төбәү.

Мин килешһеҙ,

Шуға үгәй.

Һин теләйһең

Бар донъяның

Һиңә генә

Төбәлеүен.

Онотаһың

Килештәрҙең

Берәү генә

Түгеллеген.

Эйәлек бар,

Эйеү кәрәк

Башты алға.

Ана, алда

Көтөп тора

Беҙҙе аллаһ.

Урын –ваҡыт

Килеш тә бар.

Берәүҙәрҙең

Күңелендә

Ята аҡ ҡар.

Шундай саҡта

Изгелекте

Сығар тышҡа.

Күңелдәрҙе

Ҡотҡар ҡарҙан -

Һыуыҡ ҡыштан.

Был сығанаҡ

Килеш булыр.

Бөтә донъя

Изгелеккә,

Шунда тулыр.

Төшөм килеш

Төшөндөрә.

Килештәрҙең

Теүәллеген.

Кешеләрҙең

Бере ала,

Бере аллаһ

Түгеллеген.

31. 01.11., Сибай.

Һағыныу

Аштарым аш, йоҡом йоҡо түгел,

Үҙ– үҙемә урын тапмайым.

Дарыу эсәм. Ләкин файҙаһы юҡ -

Һау сағыма кире ҡайтмайым.

Баш ауырта. Күҙҙәр насар күрә.

Ҡолаҡтарым бер ни ишетмәй.

Сирҙәремде еңеп сығыр өсөн

Нимәләрҙер миңә етешмәй.

Етмәйһең һин. Һине Һағыныуҙан

Йөрәккәйем тора тулышып.

…Һин янымда юҡта мин йөрөйөм

Үҙем менән үҙем һуғышып.

13. 05. 2010 й., Сибай.

Төндә торһаң, күккә ҡара

Шиғырҙарым күңелемдә

Көндөҙөн яралалар.

Улар ятҡан ут-бөрөләр

Төндәрен ярылалар.

Күктең көмбәҙе асыла,

Бөрөләр ярылғанда.

Күк йөҙөнә йондоҙҙарҙан

Шиғырҙар яҙылалар.

Төндә торһаң, күккә ҡара.

Йондоҙҙар атылалар.

Минең һөйөүҙән тулышып,

Шиғырҙар ватылалар.

26. 08. 2010 й., Сибай.

Исемең

Йәшлегемдең хаталарын

Юйма-йылдар юйҙы, юйҙы.

Хәрефтәрҙе епкә теҙеп,

Исемеңде яҙып ҡуйҙым.

Исемеңде тиҫбе итеп,

Айға ҡарап доға ҡылам.

Һөйөүемдән алданһам да,

Мөхәббәткә тоғро ҡалам.

11. 09. 1990 й., Сибай.

Яҡтылыҡ

Тәҙрәләрең ҡап –ҡараңғы -

Өйөгөҙҙә ут һүнгән.

Ҡараңғылыҡ яҡтылыҡты

Һуғыша торғас, еңгән.

Ҡараңғыла ап-аҡ төҫ тә

Ҡара булып күренә.

Ҡара көстәр, рәхәтләнеп,

Бейеклеккә үрелә.

Ҡараңғының дошманы бар,

Ул да булһа – яҡтылыҡ.

Яҡты барҙа, юҡҡа сыға

Ҡара көстәр, ят ҡылыҡ.

Өйҙәрегеҙ яҡты булһын

Шәмдән түгел, һөйөүҙән.

Бер-береңә: «Һин – ҡояшым»,

«Ә һин – айым» тиеүҙән.

23. 08. 2010 й., Иҫке Сибай.

Дауыл

Һөйөү һине дауыл итеп

Йөрөй осороп.

Кисерәһең ғүмереңдең

Иң шәп осорон.

Емерәһең ни осрай -

Барын юлыңда.

Сәскәләр сүпкә әйләнгән,

Ана, болонда.

Бер ни күренмәй. Донъяны

Ҡаплаған туҙан.

Ер шары һинең һөйөүҙән

Эҫегән, ҡыҙған.

Йәнлектәр, ҡоштар, бөжәктәр

Үлгән, ҡырылған.

Балыҡтарға ла көн бөткән –

Һыуҙар ҡороған.

Һин көслө, һин ҡурҡмайһың

Ауырлыҡтарҙан.

Көсөң етмәгән һөйөүҙе

Ауыҙлыҡларға.

Һөйөү дауылмы, йәшенме…

Ул кешенеке.

Һөйөүеңә хужа бул -

Һөйөү һинеке.

26. 03. 2010 й., Сибай.

Атайым, әсәйем, туғандарым

Етешмәй

Атайым да, әсәйем дә

Юҡ инде хәҙер.

Донъям тулы кеүек, әммә

Етешмәй ниҙер.

Етешмәй әcәм ҡулдары,

Һыйпамай баштан.

Уны һағыныу хисенән

Йөрәгем ташҡан.

Етешмәй атай һүҙҙәре

Күҙемде асҡан.

Өрлөктәге сыбыҡ та

Ҡайҙалыр ҡасҡан.

Үҙем атайҙың йәшенә

Киләмен етеп.

…Ата-әcәһеҙ ҡарттар ҙа

Булалар етем.

01. 03. 2007 й., Сибай.

Сәй

Өнөмдә түгел, төшөмдә

Рәхәтерәк йәшәйем.

Бөгөн төштә һөтләп миңә

Сәй яһаны әсәйем.

Ләззәтләнеп, тел сылатып,

Яйлап ҡына эсәмен.

…Төшөм бөттө. Ожмахына

Ҡайтып китте әсәйем.

Әсәйемдең һөйөүенә

Һыуһаһам, сәй эсәмен.

Сәй эскәндә, миңә ҡарап

Тора һымаҡ әсәйем.

16. 01. 2011 й., Сибай.

Һандар

Бер, ике, өс… Йөҙгә тиклем һанап,

Йөҙөп киттем йылға үренә.

Йылға – кинолента. Тулҡындарҙа

Атай йорто, ана, күренә.

Утынлыҡта, шыбыр тиргә батып,

Утын ярып йөрөй атайым.

Ә мин үҙем тулҡындарҙа түгел,

Сәңгелдәктә, гүйә, ятамын.

Шундай рәхәт, бала булыу рәхәт!

Йөрәгемдә атай йылыһын

Әле булһа тоям. Ә бит быйыл

Атайымдың бер йөҙ йыллығы.

Йөҙ һанына ҡарап уйға ҡалам.

Бере – аңлатасы барлыҡты.

Атайым бар. Нолдәр юҡ тиһә лә,

Еңә алмай улар алтмыш йәшлек

Бала уйындағы хаҡлыҡты.

13. 04. 2010 й., Сибай.

Атай йорто

Тауға менәм төшөр өсөн,

Төшөр өсөн елдереп.

Тау көслө. Туған йортома

Мине ҡуя килтереп.

Ғүмер буйы тауға менәм,

Тауҙан төшәм – саңғысы.

Атай йортона ҡайтамын,

Унда – бәхет асҡысы.

Унда тыныс, унда рәхәт,

Унда йылы күңелгә.

Атай-әсәйгә һөйөүем

Тауҙай булып өйөлгән.

07. 12. 2011 й., Сибай.

Аҡ менән ҡара

Аҡыллы алдамай ҙа, алданмай ҙа

Башҡорт халыҡ мәҡәле

Һинең менән бер ҡарында

Ятыуыма оялам.

Ҡара ҡоромға буялған

Һин – бысыраҡ быяла.

Тыш яғың аҡ, эсең ҡара,

Ике төҫтән тораһың.

Ҡара хисте аҡҡа урап

Ҡулыма тоттораһың.

Алданамын. Һин алдауҙың

Ҙур түрәһе – аллаһы.

Беҙ туғандар. Һуҡыр күҙҙең

Мин– ағы, һин – ҡараһы.

13. 10. 2010 й., Сибай.

Тыуған ерем,

йырым,

илем,

телем

Тауҙар

Болоттармы тиһәм, тауҙар икән,

Тауҙар икән, Бөрйән тауҙары.

Был яҡтарҙа көҙ ҙә, ҡыш та булмай -

Был яҡта гел яҙ, йәй айҙары.

Күккә ашҡан тауҙар яҡынайта

Кеше менән Ҡояш араһын.

Тауға баҫып, Илһам ғаләмендә

Йондоҙ булып йөҙөп барамын.

Күңелдәге ҡаты, һалҡын боҙҙар

«Һә» тигәнсе бында ирейҙәр.

Ритм, рифма, тауҙан тауға һикереп,

Хистән шиғыр һуҙып йөрөйҙәр.

Йәнһеҙҙән дә, йәмһеҙ, йүнһеҙҙән дә

Шағир яһай Бөрйән тауҙары.

…Был яҡтарҙа көҙ ҙә, ҡыш та булмай,

Был яҡта гел яҙ, йәй айҙары.

21. 04. 2009 й., Сибай – Өфө..

Йыр-моң

Кеше өйрәнгәнме турғайҙарҙан,

Әллә ул отҡанмы кешенән?

Турғай йырлай. Имән шартлап һына –

Тышта һыуыҡ, ә ул өшөмәй.

Йыр йылыта уны. Ер йылыһы,

Ҡояш нуры йырҙың эсендә.

Тирләп китәм. Эҫе. Әйтерһең дә,

Турғай йырлай минең исемдән.

Ҡушыламын йырға. Йәнлектәр ҙә

Өндәрендә йырлап яталар.

Ҡар бөртөгө булып баш осонда

Осоп йөрөй, ана, ноталар.

Йырлай баҫыу, поезд, пассажирҙар...

Йыр тарала бөтә Уралға.

Һыуыҡ елдәр, йылынырға теләп,

Көнө-төнө өрә ҡурайға.

Ҡурай моңон тыңлап ҡоштар оса

Сит ерҙәрҙән беҙҙең яҡтарға.

…Өшөгәндә яҙҙы – йылы наҙҙы

Күңелдәргә йыр, моң ҡайтара.

19. 12. 2010 й., Сибай.

Ҡарҙар

Ҡарҙар иремәйҙәр. Улар илай.

Күҙ йәштәре аға, һыу түгел.

Ғәзиз ғүмер менән хушлашыуы

Әйтегеҙсе, кемгә һуң еңел?!

Урал батыр кеүек үлә ҡарҙар:

Әйләнәләр улар йылғаға.

Ер терелә, бөрөләнә хатта

Ергә ҡаҙап ҡуйған ҡолғалар.

Урал батыр өйрәнгәнме ҡарҙан,

Ҡарҙар өйрәнгәнме Уралдан

Үлеп терелергә? Яуап эҙләп

Китеп барам әле урамдан.

Бер аяғым баҫа еүеш ҡарға,

Икенсеһе – йәшел үләнгә.

Ышанмайым, «егет кеше яуҙа

Батырҙарса үлгән»тигәнгә.

Батыр үлмәй.

3. 04. 2010 й., Сибай.

Баҡса

Күңелемдә байлыҡ, муллыҡ…

Күңелем – көҙгө баҡса.

Ул баҡсала үҫемлектәр,

Емештәр ҙә башҡаса.

Изгелек, ғәҙеллек үҫә,

Тамыр йәйә ғорурлыҡ.

Яуызлыҡҡа, меҫкенлеккә

Был баҡсала урын юҡ.

Әҙәплелек, баҫалҡылыҡ

Бирәләр емештәрен:

Кәйефтәремде күтәрә

Һөйөүе кешеләрҙең.

Тырышлыҡ, ныҡышмалылыҡ

Көндә килтерә еңеү.

Бурҙарға, алдаҡсыларға

Баҡсама ҡыйын инеү.

Алсаҡлыҡ, ихласлыҡ, ана,

Үрмәле гөл шикелле,

Икәүләшеп, етәкләшеп,

Эҙләп йөрөй бейеклек.

Күңелемдең түбәһе юҡ,

Сиге лә юҡ дүрт яҡтан.

Баҡсамда сафлыҡ үҫтереп,

Шатлыҡ өләшәп ятам.

30. 07. 2011 й., Сибай.

Теләк

Йөҙә торғас, тамам арығанмын,

Аяҡ-ҡулым саҡ-саҡ ҡуҙғала.

Алға барам тиһәм, артҡа сигәм,

Әйтерһең дә, һыуҙа кеше түгел,

Йөҙөп йөрөй ҙур бер ҡыҫала.

Һауа етмәй. Әллә көсһөҙлөктән,

Хислелектән тыным ҡыҫыла.

Артҡа шыуған кеше булғанымса,

Булһам икән, тием, ҡыҫала.

25. 09. 2011 й., Сибай.

Яҙ

Һыуҙар, Һыуҙар. Тирә-яғым бөгөн

Әүерелгән оло ҡойоға.

Тыуған ерем, аҡ күлдәген сисеп,

Рәхәтләнеп ғөсөл ҡойона.

Аҡ ҡайындар, ана, сәсен йыуа,

Һылыу ҡыҙҙар, тиеп торорһоң.

Доға уҡып, ҡармағымды һалам,

Алтын балыҡ, бәлки, тотормон.

Балыҡтарҙың миндә ҡайғыһы юҡ.

Балыҡтар туҡ бөгөн бәхеттән.

Алданмайҙар хистәренә сумып,

Иҫәңгерәп торған егеттән.

Һыу өҫтөнә бер ҡош килеп төштө

Әллә аҡҡош, өйрәк, әллә ҡаҙ?

Бик теләгең булһа, аҡылдан яҙ,

Телең булһа, тот та шиғыр яҙ –

Тышта яҙ.

27. 03. 2010 й., Сибай.

Һуҡмаҡ

Юлдан яҙҙым. Юлһыҙ атлап барам.

Таш, соҡорға аяҡ эләгә.

Ҡояш артта ҡалды. Көнбайышҡа

Алып китеп бара күләгәм.

Юл аҙабы – гүр ғазабы тиҙәр,

Юлһыҙ йөрөү тиң мең ғазапҡа.

Аяҡтарым ҡорор, ғазаптарым

Һуҙылһалар әгәр оҙаҡҡа.

Маңлайыма әллә яҙылғанмы

Һинең янға кире ҡайтмаҫҡа?

…Күҙҙәремдән йәштәр, ә үҙем

Килеп сығам кескәй һуҡмаҡҡа.

Һуҡмаҡ, һуҡмаҡ! Һине бер ҡасан да

Алмаштырмайым мин алтынға.

Шатлыҡтарым эстәремә һыймай,

Шатлыҡтарым ала алҡымдан…

Ҡояш килеп баҫа алға – юлға,

Артта тороп ҡала күләгәм.

Һуҡмаҡ буйлап ут-тамуҡтан сығып,

Мин ожмахҡа килеп эләгәм.

18. 08. 2010 й., Иҫке Сибай.

Төнгө һүрәт

Ауыл йоҡлай. Һирәк-һаяҡ

Эт кенә өрөп ҡуя.

Ай – рәссам, төнгө һүрәттең

Ҡара таптарын юя.

Ә йондоҙҙар – һылыу ҡыҙҙар,

Тейәлгән дә болотҡа.

Ҡыуанышып китеп бара

Бейергә тип клубҡа.

Түңәрәк күл күсәрендә

Әйләнеп йөрөй, ана.

Һыу аҫты батшалығында

Мең төрлө уттар яна.

Етегән думбыраһында

Йондоҙҙарҙы бейетә.

Йомшаҡ елдәр ауылымды

Сәңгелдәктә бәүетә.

Ауыл йоҡлай. Һирәк-һаяҡ

Эт кенә ҡуя өрөп.

Хайран ҡалып баҫып торам

Төн матурлығын күреп.

08. 03. 2012 й., Сибай.

Дәрес

Ҡуяндар һоро күлдәген

Аҡ тунға алмаштыра.

Яланғас ҡалған ҡайындар

Оялып ҡына тора.

Бәләкәй генә турғайҙар

Бер минут буш тормайҙар.

Тыуған ерен ташлап китеп,

Ситтә оя ҡормайҙар.

Ат та ауырлыҡ төшөрмәй

Хужаһының иңенә.

Үҙе тамағын туйҙырып

Йөрөй, ана, тибендә.

Ә елдәр ерҙең өҫтөнә

Түшәп йөрөй аҡ ҡағыҙ.

Тәбиғәттә дәрес бара.

Тауышланмағыҙ.

30. 08. 2011 й., Сибай.

Осоу

Юҡ-бар шиғыр яҙып шағирмын тип

Йөрөүселәр бар шул арала.

Яҡшы шиғыр йөрәк эсендәге

Оҫтаханаларҙа ярала.

Насар шиғыр тел осонда тыуа,

Ҡәләм осо яҙа ҡағыҙға.

Хәтерҙән тиҙ осоп сығып китә,

Йөҙ, мең ҡабат уҡыһағыҙ ҙа.

Бал ҡорттары, сәскә балы тейәп,

Ҡайтып кергән кеүек ояға,

Яҡшы шиғыр осоп килеп керә

Күңелдәге рухи донъяға.

17. 09. 2011 й., Иҫке Сибай.

Орлоҡ

Йылы, яҡты йәй көндәре

Үтеп китә шулай тиҙ.

Көнө буйы бер туҡтауһыҙ

Ямғыр яуа – тышта көҙ.

Тәбиғәт ҡоро үләнде

Ебетеп баҫа кейеҙ.

Орлоҡтар, быйыл да һеҙҙең

Йылы булыр өйөгөҙ.

Кейеҙ өҫтөнә аҡ юрған

Килеп ятыр бер аҙҙан.

Орлоҡтар тәмле йоҡонан

Уянырҙар тик яҙҙа.

Йәйен тағы ла йәйелеп,

Үҫеп китер үләндәр.

Йәшел келәмдә өйрөлөп

Бейер бейей белгәндәр.

Кескәй орлоҡ йөрәгендә

Илаһи көс йөрөтә.

Көҙөн үлгән үлгәндәрҙе

Яҙын ҡабат терелтә,

Мәңгелектең тәгәрмәсен

Өйрөлтә лә өйрөлтә.

15. 10. 2011 й., Сибай.

Йәшереү

Күк-әсә Ерҙе – балаһын

Күкрәгенә күтәргән.

Әллә ире туҡмағанмы?

Күктең йөҙө күгәргән.

Ҡапыл томан, аҡ болоттар

Килеп сыға ла Ерҙән,

Күк-әсәне, Ер-баланы

Йәшерә яуыз ирҙән.

01.12. 2011 й., Сибай.

Иҫкәртеү

Быйыл йәй эҫе булды,

Ҡояш бик ныҡ ҡыҙҙырҙы.

Хоҙай ҡамсы – нур менән

Тәнебеҙҙе һыҙҙырҙы.

Гонаһтар бит күбәйгән…

Алдайбыҙ, урлашабыҙ.

Яҙыҡ-боҙоҡ уй менән

Тултырылған башыбыҙ.

Хоҙай ҡулында эҫе –

Көслө яза ҡоралы.

Эҫе һыу, эҫе утта

Тороп һин ҡара әле!

Хоҙай иҫкәртә бөгөн:

Яуызлыҡ ҡылһаң, кеше,

Һине тамуҡта көтә

Мең градуслыҡ эҫе.

10. 10. 2010 й., Сибай.

Доға

Ҡарт мулла – хоҙай илсеһе

Уҡый ҙа уҡый доға.

Ваҡыт туҡтаған. Бар донъя

Тынып ҡалған, йоҡлаған.

Ғәләмде бишеккә һалып

Бәүетә генә мулла.

Доға тыңлаһам, яңынан

Мин тыуған кеүек булам.

Гонаһтарым, хаталарым

Юҡ була шул минутта.

…Мин бишектә йоҡлап ятам,

Кемдер ята тамуҡта.

06. 03. 2012 й., Сибай.

Аҡыллы ҡайындар

Ҡайындарҙы һағыш баҫҡан:

Һарғайған япраҡтары.

Артта ҡалған йәшеллеккә

Сорналған йәш саҡтары.

Ҡыштың килеүен ҡайындар

Бигерәк иртә тоя.

Көҙ буйына берәм-берәм

Япрағын ергә ҡоя.

Шәрә ҡала (аҙғын түгел)

Юғары аңлылыҡтан:

Күлдәген биреп йылыта

Ерҙе ҡышҡы һыуыҡта.

– Ерем булһа, – ти ҡайындар, -

Япраҡтар йәшәрерҙәр.

Тәнемдәге ҡышын алған

Яраны йәшерерҙәр.

18. 09. 2010 й., Сибай – Салауат

Ай менән Ҡояш

Ҡояш бөгөн иртә ҡалҡты,

Ай ҙа юғалмағайны.

Төндән алған татлы хистәр

Әле юйылмағайны.

Яртылаш төн, яртылаш көн

Килде әле еремә.

Татлы хистәр төндән көнгә

Күсенешеп йөрөйҙәр.

Төн менән көн – ғәләмдең

Ике бөртөк нөктәһе.

Төн менән көн алмашҡанда

Шул араны үтәбеҙ.

Төн тапшыра беҙҙе көнгә,

Көндөҙ шунда ҡалабыҙ.

Кеше – Ай менән Ҡояштың

Иң ҡәҙерле балаһы.

08. 10. 2010 й., Сибай.

Ҡараңғы уйҙар

Төн уртаһы. Илем йоҡлай.

Минең күҙҙәрем асыҡ.

Йәнде өйкәгән уйҙарҙан

Булмай икән ул ҡасып.

Хәмер эсеп ауған ирҙәй

Иҫереп йоҡлай илем.

Хәҙер бында беҙ хужа тип,

Йүгереп йөрөй Үлем.

Тыуым ҡасҡан. Салауаттар,

Вәлидиҙәр юҡ – тыумай.

Халҡым һөйләр һүҙен һөйләп,

Көйөн көйләп тә туймай.

Яҡшы ғәҙҙәттәр юғалған.

Ҡайҙа булған һуң улар?

…Күҙ йоморға ҡурҡып ятам,

Ҡараңғыла

Килә ҡараңғы уйҙар.

28. 02. 2007 й., Сибай.

Сер

Урлап байығандарҙан

Көнләшмәйем һис кенә.

Урлап алған байлыҡтың

Бер сере бар кескенә.

Ул бәхетен урлай бурҙың,

Бур бәхете ғүмерһеҙ.

Бал эсенә килеп төшкән

Ҡомһоҙ себен тиерһең…

Бал ҡортоноң алһыҙ-ялһыҙ

Йыйған хәләл емешен

Урлап себен, асып инә

«Баллы» тамуҡ ишеген.

09. 08. 2011 й., Сибай.

Ҡараҡ

Мыйығың булмаһа, һине

Әбей тип уйлар инем.

Тешһеҙ әбей һымаҡ эшһеҙ

Ятаһың йылдар буйы.

Ҡатын саба, ҡатын таба

Донъя кәрәк-ярағын.

Ә һин өйҙә мыйыҡ менән

Уйнап тик ултыраһың.

Мыйығындың бәхете бар -

Иркәләп үҫтерәһең.

Мыйыҡ йәшәй, ә ирлекте

Үҙеңдә үлтергәнһең.

Ҡатын саба, ҡатын таба,

Һиңә кәрәк-яраҡты.

Эй, ҡәҙерләй үҙ бәхетен

Урлап ятҡан ҡараҡты.

31. 01. 2011 й., Сибай.

Баҙар

Көн дә бөгөн «һә» тигәнсе

Килеп етте аҙағына.

Төн башланды. Карауатта –

Бер урынлыҡ самолетта

Киттем әүен баҙарына.

Был баҙарҙа мал, бал түгел,

Был баҙарҙа ял һаталар.

Һатыусылар, алыусылар

Йөрөмәйҙәр, ә яталар.

Берәүҙе лә алдамайҙар,

Әрләмәйҙәр. Урламайҙар.

Ял төрҙәрен кабинала

Йәшеренеп һайламайҙар.

Илдә баҙар. Телен, үҙен,

Ерен, ирен һата кеше

Сама белмәй аҙ ғына ла.

Ваҡыт үтә. Көн дә, ана,

Килеп етә аҙағына.

Төн башлана. Карауатта –

Бер урынлыҡ самолетта

Китәм әүен баҙарына.

28. 09. 2011 й., Сибай.

Ил асыуы

Бөгөн төндә бик яман төш күреп,

Мин уянып киттем йоҡонан.

Ҡурҡышымдан белгән доғаларҙы

Барлап алып, ҡат-ҡат уҡынам.

Иле, теле, халҡы өсөн йәнен

Йәлләмәгән ысын башҡорттан

Әйләнгәнмен, имеш, илен һөймәҫ,

Телен белмәҫ моңһоҙ манҡортҡа.

Туған һүҙҙәр, бал ҡорттары булып,

Һырып алалар ҙа сағалар.

Мине туҡмай атам, әсәм, күршем,

Оләсәйҙәр, бала-сағалар…

Үлдем. Тик намыҫым тере икән:

Мәйет булһам да бит тирләтә.

Ил асыуы – ай-һай, дәһшәтле көс!

Үлтерә лә, ҡабат терелтә.

Шул төшөмдән – түбән төшөүемдән –

Илен, телен һөймәҫ манҡорттан

Мин өнөмә һәм илемә ҡайтам,

Әйләнәм дә кире башҡортҡа.

7. 01. 2011 й.,Сибай.

Туған тел

Маҡтанырға алтыным юҡ,

Байлығым – туған телем.

Ул минең рухты байыта:

Бирә хис, аҡыл, белем.

Туған телемдә йырлайым,

Туған телем – үҙе йыр.

Ҡырҡлаған өнгә – нотаға

Халҡым моңо ғына түгел,

Донъялыҡ үҙе һыйыр.

Телем мине һөйөндөрә,

Кейендөрә, туйҙыра.

Халҡыма, тыуған еремә,

Илгә һөйөү тыуҙыра.

Астан үлеп барыусыға

Бирһәләр икмәк телеп,

Ул терелә. Милләтемдең

Икмәге – туған теле.

19. 01. 2011 й., Сибай.

Ваҡыт

Сәғәт

Сәғәт, сәғәт булһа ла,

Эше сәғәтле түгел.

Көн менән төндө ялғап,

Йөрөй ҙә тора ул гел.

Ваҡытын әрәм итмәй,

Ел артынан да ҡыумай.

Ял да итмәй. Ял итһә,

Сәғәт булыуҙан туҡтай.

Ялҡау сәғәткә ҡарай

Ҡыл ҡыбырлатҡан Һайын.

Сәғәт эсенән эҙләй

Үткән ваҡыттың һанын.

Ул һандан ғына тормай,

Сәғәттең бар теле лә.

Шундай ябай. Уны еңел

Аңлай ала тиле лә.

– Бәхет хеҙмәттә, ти ул, -

Ялҡауланмай эшләгеҙ.

Ваҡыттың үткәнен түгел,

Үтмәгәнен эҙләгеҙ.

30. 08. 2010 й., Сибай.

Сәғәт теле

Бер туҡтамай йөрөп тора

Сәғәт теле.

Ниҙер һөйләй. Аңламайым

Уның телен.

– Тек, тек, – тиме, – йөрәгеңдең

Яраларын.

Текһәң, бәлки, онотолор

Яфаларың.

– Бер туҡтауһыҙ кит, кит, – тиме, -

Алға табан.

Туҡтап ҡалһаң, ташлап китер

Һине заман.

– Миңә ҡара: йөрөмәһәм,

Кемгә кәрәк?

…Шул һүҙҙәрҙән өшөп китте

Минең йөрәк.

«Тек-тек, тек-тек, кит-кит, кит-кит»…

Бер туҡтамай йөрөп тора

Сәғәт теле.

24. 02. 2010 й.,Сибай.

Ваҡыт

Ваҡыт һанап арый сәғәт,

Иҫкерә, үлә.

Сәғәт туҡтаһа ла, Ваҡыт

Туҡтамай – елә.

Үлә дәүләттәр, милләттәр,

Диңгеҙҙәр кибә.

Ваҡыт – үлемһеҙ. Йөрәге

Тибә лә тибә.

Ваҡыт сикһеҙ, ә бүленә

Сикләп, һаналып.

Ниңә улай? Быны миңә

Ҡыйын аңлауы.

Ҡояш та мәңгелек түгел,

Ай ҙа, Ерем дә.

Һиңә лә, миңә лә ваҡыт

Үлсәп бирелгән…

Сәғәт уғына атланып,

Еләм дә еләм.

Бирелгән ваҡыт әҙәйә -

Уныһын беләм.

Ҡунаҡ хөрмәтле ваҡытлы

Китеүе менән.

Изгелектәрем йәшәһен

Күберәк минән.

25. 01. 2011 й., Сибай.

Иҫке йылдың һуңғы төнө

Иҫке йылдың һуңғы төнө

Ҡыҙыл, йәшел, аҡ төҫтә.

Ғүмерем ҡапҡаһына ул

Тағы бер мәрәй өҫтәй.

Мин – ҡапҡасы. Ул мәрәйҙе

Шатланып ҡабул итәм.

Ерҙе етәкләп йыл һайын

Ҡояшты урап үтәм.

Төнө буйы ерҙән күккә

Йондоҙҙар атылалар.

Ергә ҡабат ҡайтыр өсөн,

Нурҙарға ватылалар.

Ғүмерем – ҡараңғылыҡҡа

Атылған яҡты йондоҙ.

…Иҫке йылдың һуңғы төнө

Төн түгел – көпә-көндөҙ.

31.12. 2010 й., Сибай.

Яңы йыл теләге

Бөгөн миңә бөтә донъя

Яңынан тыуған кеүек.