Текст книги "ПСАЛТИРЬ"

Автор книги: Автор Неизвестен

сообщить о нарушении

Текущая страница: 9 (всего у книги 9 страниц)

Псалом 147.

Похвали, Iерусалиме, Господа, хвали Бога твоего, Сiоне; яко укрепи верeи врат твоих, благослови сыны твоя в тебе. Полагаяй пределы твоя мир, и тука пшенична насыщаяй тя; посылаяй слово свое земли, до скорости течет слово eго, дающаго снег свой яко волну, мглу яко пепел посыпающаго, метающаго голоть свой яко хлебы; противу лица мраза eго кто постоит? Послет слово свое, и истает я; дхнет дух eго, и потекут воды. Возвещаяй слово свое iакову, оправданiя и судбы своя Израилеви; не сотвори тако всякому языку, и судбы своя не яви им.

Псалом 148.

Хвалите Господа с небес, хвалите eго в вышних. Хвалите eго вси ангели eго; хвалите eго, вся силы eго. Хвалите eго, солнце и луна; хвалите eго вся звезды и свет. Хвалите eго, небеса небес и вода, яже превыше небес. Да восхвалят имя Господне; яко той рече, и быша; той повеле, и создашася. Постави я в век и в век века; повеленiе положи, и не мимо идет. Хвалите Господа от земли, змiеве и вся бeздны; oгнь, град, снег, голоть, дух бурен, творящая слово eго; горы и вси холми, древа плодоносна и вси кедри; зверiе и вси скоти, гади и птицы пернаты; царiе земстiи и вси людiе, князи и вси судiи земстiи; юноши и девы, старцы с юнотами. Да восхвалят имя Господне; яко вознесеся имя того eдинаго, исповеданiе eго на земли и на небеси. И вознесет рог людiй своих; песнь всем преподобным eго, сыновом Израилeвым, людем приближающымся eму.

Псалом 149.

Воспойте Господеви песнь нову; хваленiе eго в церкви преподобных. Да возвеселится Израиль о сотворшем eго, и сынове Сiони возрадуются о цари своем. Да восхвалят имя eго в лице, в тимпане и псалтири да поют eму. Яко благоволит Господь в людех своих, и вознесет кроткiя во спасенiе. Восхвалятся преподобнiи во славе и возрадуются на ложах своих. Возношeнiя Божiя в гортани их, и мечи oбоюду oстры в руках их; сотворити отмщенiе во языцех, обличeнiя в людех; связати цари их путы, и славныя их ручными оковы железными; сотворити в них суд написан. Слава сiя будет всем преподобным eго.

Псалом 150.

Хвалите Бога во святых eго, хвалите eго во утверженiи силы eго; хвалите eго в силах eго, хвалите eго по множеству величествiя eго; хвалите eго во гласе трубнем, хвалите eго во псалтири и гуслех; хвалите eго в тимпане и лице, хвалите eго во струнах и oргане; хвалите eго в кимвалех доброгласных, хвалите eго в кимвалех восклицанiя. Всякое дыханiе да хвалит Господа.

Псалом 151.

Мал бех в братiи моей и юншiй в дому oтца моего; пасох oвцы oтца моего. Руце мои сотвористе oрган, и персты мои составиша псалтирь. И кто возвестит Господеви моему? Сам Господь, сам услышит; сам посла ангела своего, и взят мя от oвец oтца моего, и помаза мя eлеем помазанiя своего. Братiя моя добри и велицы; и не благоволи в них Господь. Изыдох в сретенiе иноплеменнику, и проклят мя iдолы своими. Аз же исторгнув мечь от него, обезглавих eго и отях поношенiе от сынов Израилевых.