Текст книги "ПСАЛТИРЬ"

Автор книги: Автор Неизвестен

сообщить о нарушении

Текущая страница: 7 (всего у книги 9 страниц)

Псалом 106.

Исповедайтеся Господеви, яко благ, яко в век милость eго. Да рекут избавленнiи Господем, ихже избави из руки врага, и от стран собра их, от восток и запад, и севера и моря; заблудиша в пустыни безводней, пути града обителнаго не обретоша; алчуще и жаждуще, душа их в них изчезе. И воззваша ко Господу, внегда скорбети им, и от нужд их избави я; и настави я на путь прав, внити во град обителный. Да исповедят Господеви милости eго и чудеса eго сыновом человечeским; яко насытил eсть душу тщу, и душу алчущу исполни благ; седящыя во тме и сени смертней, окованныя нищетою и железом, яко преогорчиша словеса Божiя, и совет вышняго раздражиша. И смирися в трудех сердце их, и изнемогоша, и не бе помагаяй. И воззваша ко Господу, внегда скорбети им, и от нужд их спасе я; и изведе я из тмы и сени смертныя, и узы их растерза. Да исповедят Господеви милости eго и чудеса eго сыновом человечeским; яко сокруши врата медная, и верeи железныя сломи. Воспрiят я от пути беззаконiя их; беззаконiй бо ради своих смиришася. Всякаго брашна возгнушася душа их, и приближишася до врат смертных. И воззваша ко Господу, внегда скорбети им, и от нужд их спасе я; посла слово свое, и изцели я, и избави я от растлений их. Да исповедят Господеви милости eго и чудеса eго сыновом человечeским; и да пожрут eму жертву хвалы и да возвестят дела eго в радости. Сходящiи в море в кораблех, творящiи деланiя в водах многих, тiи видеша дела Господня и чудеса eго во глубине. Рече, и ста дух бурен, и вознесошася волны eго; восходят до небес и низходят до бездн; душа их в злых таяше; смятошася, подвигошася яко пiяный, и вся мудрость их поглощена бысть. И воззваша ко Господу, внегда скорбети им, и от нужд их изведе я; и повеле бури, и ста в тишину, и умолкоша волны eго. И возвеселишася, яко умолкоша, и настави я в пристанище хотенiя своего. Да исповедят Господеви милости eго и чудеса eго сыновом человечeским; да вознесут eго в церкви людстей, и на седалищи старeц восхвалят eго. Положил eсть реки в пустыню и исходиша водная в жажду, землю плодоносную в сланость, от злобы живущих на ней. Положил eсть пустыню во eзера водная и землю безводную во исходища водная. И насели тамо алчущыя, и составиша грады обитeлны; и насеяша села, и насадиша вiнограды, и сотвориша плод житен. И благослови я, и умножишася зело; и скоты их не умали. И умалишася и озлобишася от скорби зол и болезни; излiяся уничиженiе на князи их, и заблуждати сотвори я по непроходней, а не по пути. И поможе убогу от нищеты и положи яко oвцы oтечeствiя. Узрят правiи и возвеселятся, и всякое беззаконiе заградит уста своя. Кто премудр и сохранит сiя? и уразумеют милости Господни.

Псалом 107.

Готово сердце мое, Боже, готово сердце мое; воспою и пою во славе моей. Востани, слава моя, востани, псалтирю и гусли; востану рано. Исповемся тебе в людех, Господи, пою тебе во языцех; яко велiя верху небес милость твоя и до облак истина твоя. Вознесися на небеса, Боже, и по всей земли слава твоя, яко да избавятся возлюбленнiи твои; спаси десницею твоею и услыши мя. Бог возгла во святем своем; вознесуся и разделю сiкiму, и удоль селенiй размерю. Мой eсть галаад, и мой eсть манассiй, и eфрем заступленiе главы моея; iуда царь мой, моав коноб упованiя моего; на iдумею наложу сапог мой; мне иноплемeнницы покоришася. Кто введет мя во град огражденiя? или кто наставит мя до iдумеи? Не ты ли, Боже, отринувый нас, и не изыдеши, Боже, в силах наших? Даждь нам помощь от скорби; и суетно спасенiе человеческо. О Бозе сотворим силу, и той уничижит враги нашя.

Псалом 108.

Боже, хвалы моея не премолчи; яко уста грешнича и уста льстиваго на мя отверзошася, глаголаша на мя языком льстивым, и словесы ненавистными обыдоша мя, и брашася со мною туне. Вместо eже любити мя, оболгаху мя, аз же моляхся; и положиша на мя злая за благая, и ненависть за возлюбленiе мое. Постави на него грешника, и дiавол да станет одесную eго; внегда судитися eму, да изыдет осужден, и молитва eго да будет в грех. Да будут днiе eго мали, и eпiскопство eго да прiимет ин; да будут сынове eго сири, и жена eго вдова; движущеся да преселятся сынове eго и воспросят, да изгнани будут из домов своих. Да взыщет заимодавец вся, eлика суть eго; и да восхитят чуждiи труды eго. Да не будет eму заступника, ниже да будет ущедряяй сироты eго; да будут чада eго в погубленiе, в роде eдинем да потребится имя eго. Да воспомянется беззаконiе oтeц eго пред Господем, и грех матере eго да не очистится; да будут пред Господем выну, и да потребится от земли память их; занеже не помяну сотворити милость, и погна человека нища и убога, и умилена сердцем умертвити. И возлюби клятву, и прiидет eму; и не восхоте благословенiя, и удалится от него. И облечеся в клятву яко в ризу, и вниде яко вода во утробу eго и яко eлей в кости eго; да будет eму яко риза, в нюже облачится, и яко пояс, имже выну опоясуется. Сiе дело оболгающих мя у Господа и глаголющих лукавая на душу мою. И ты, Господи, Господи, сотвори со мною имене ради твоего, яко блага милость твоя; избави мя, яко нищ и убог eсмь аз, и сердце мое смятеся внутрь менe. Яко сень, внегда уклонитися eй, отяхся; стрясохся яко прузи. Колена моя изнемогоста от поста, и плоть моя изменися eлеа ради. И аз бых поношенiе им; видеша мя, покиваша главами своими. Помози ми, Господи Боже мой, и спаси мя по милости твоей; и да разумеют, яко рука твоя сiя, и ты, Господи, сотворил eси ю. Прокленут тiи, и ты благословиши; востающiи на мя да постыдятся, раб же твой возвеселится. Да облекутся оболгающiи мя в срамоту и одеждутся яко oдеждою студом своим. Исповемся Господеви зело усты моими и посреде многих восхвалю eго; яко преста одесную убогаго, eже спасти от гонящих душу мою.

Псалом 109.

Рече Господь Господеви моему; седи одесную менe, дондеже положу враги твоя подножiе ног твоих. Жезл силы послет ти Господь от Сiона, и Господствуй посреде врагов твоих. С тобою начало в день силы твоея, во светлостех святых твоих; из чрева прежде денницы родих тя. Клятся Господь и не раскается; ты iерей во век по чину мелхiседекову. Господь одесную тебe сокрушил eсть в день гнева своего цари; судит во языцех, исполнит падeнiя, сокрушит главы на земли многих. От потока на пути пiет; сего ради вознесет главу.

Псалом 110.

Исповемся тебе, Господи, всем сердцем моим в совете правых и сонме. Вeлiя дела Господня, изыскана во всех волях eго; исповеданiе и великолепiе дело eго, и правда eго пребывает в век века. Память сотворил eсть чудес своих; милостив и щедр Господь. Пищу даде боящымся eго; помянет в век завет свой. Крепость дел своих возвести людем своим, дати им достоянiе язык. Дела рук eго истина и суд, верны вся заповеди eго, утвержeны в век века, сотворeны во истине и правоте. Избавленiе посла людем своим; заповеда в век завет свой; свято и страшно имя eго. Начало премудрости страх Господень, разум же благ всем творящым и; хвала eго пребывает в век века.

Псалом 111.

Блажен муж бояйся Господа, в заповедех eго восхощет зело. Сильно на земли будет семя eго, род правых благословится; слава и богатство в дому eго, и правда eго пребывает в век века. Возсiя во тме свет правым; милостив и щедр и праведн. Благ муж щедря и дая; устроит словеса своя на суде, яко в век не подвижится. В память вечную будет праведник. От слуха зла не убоится; готово сердце eго уповати на Господа; утвердися сердце eго, не убоится, дондеже воззрит на враги своя. Расточи, даде убогим; правда eго пребывает во век века; рог eго вознесется в славе. Грешник узрит и прогневается зубы своими поскрежещет и растает; желанiе грешника погибнет.

Псалом 112.

Хвалите, oтроцы, Господа, хвалите имя Господне. Буди имя Господне благословено отнне и до века. От восток солнца до запад хвально имя Господне. Высок над всеми языки Господь; над небесы слава eго. Кто яко Господь Бог наш? на высоких живый, и на смирeнныя призираяй на небеси и на земли; воздвизаяй от земли нища, и от гноища возвышаяй убога; посадити eго с князи, с князи людiй своих; вселяя неплодовь в дом, матерь о чадех веселящуся.

Псалом 113.

Во исходе Израилеве от eгипта, дому iаковля из людiй варвар, бысть iудеа святыня eго, Израиль область eго. Море виде и побеже, ioрдан возвратися вспять; горы взыграшася яко oвни, и холми яко агнцы oвчiи. Что ти eсть, море, яко побегло eси, и тебе, ioрдане, яко возвратился eси вспять? горы, яко взыграстеся яко oвни, и холми яко агнцы oвчiи? От лица Господня подвижеся земля, от лица Бога iаковля; обращшаго камень во eзера водная и несекомый во источники водныя. Не нам, Господи, не нам, но имени твоему даждь славу о милости твоей и истине твоей; да не когда рекут языцы; Господе eсть Бог их? Бог же наш на небеси и на земли, вся eлика восхоте, сотвори. Iдоли язык сребро и злато, дела рук человеческих; уста имут, и не возглаголют; oчи имут, и не узрят; ушы имут, и не услышат; ноздри имут, и не обоняют; руце имут, и не осяжут; нозе имут, и не пойдут; не возгласят гортанем своим. Подобни им да будут творящiи я и вси надеющiися на ня. Дом Израилев упова на Господа; помощник и защититель им eсть. Дом ааронь упова на Господа; помощник и защититель им eсть. Боящiися Господа уповаша на Господа; помощник и защититель им eсть. Господь помянув ны благословил eсть нас; благословил eсть дом Израилев, благословил eсть дом ааронь, благословил eсть боящыяся Господа, малыя с великими. Да приложит Господь на вы, на вы и на сыны вашя; благословени вы Господеви, сотворшему нбо и землю. Нбо небесе Господеви, землю же даде сыновом человечeским. Не мертвiи восхвалят тя, Господи, ниже вси низходящiи во ад; но мы живiи благословим Господа отнне и до века.

Псалом 114.

Возлюбих, яко услышит Господь глас моленiя моего, яко приклони ухо свое мне; и во дни моя призову. Обяша мя болезни смeртныя, беды адовы обретоша мя; скорбь и болезнь обретох и имя Господне призвах; О, Господи, избави душу мою; милостив Господь и праведн, и Бог наш милует. Храняй младенцы Господь; смирихся, и спасе мя. Обратися, душе моя, в покой твой, яко Господь благодействова тя; яко изят душу мою от смерти, oчи мои от слез и нозе мои от поползновенiя. Благоугожду пред Господем во стране живых.

Псалом 115.

Веровах, темже возглаголах; аз же смирихся зело. Аз же рех во изступленiи моем; всяк человек лож. Что воздам Господеви о всех, яже воздаде ми? Чашу спасенiя прiиму и имя Господне призову; молитвы моя Господеви воздам пред всеми людьми eго. Чтна пред Господем смерть преподобных eго. О, Господи, аз раб твой, аз раб твой и сын рабыни твоея; растерзал eси узы моя. Тебе пожру жертву хвалы, и во имя Господне призову. Молитвы моя Господеви воздам пред всеми людьми eго, во дворех дому Господня, посреде тебe, Iерусалиме.

Псалом 116.

Хвалите Господа, вси языцы, похвалите eго, вси людiе; яко утвердися милость eго на нас, и истина Господня пребывает во век.

Псалом 117.

Исповедайтеся Господеви, яко благ, яко в век милость eго. Да речет убо дом Израилев; яко благ, яко в век милость eго. Да речет убо дом ааронь; яко благ, яко в век милость eго. Да рекут убо вси боящiися Господа; яко благ, яко в век милость eго. От скорби призвах Господа, и услыша мя в пространство. Господь мне помощник, и не убоюся; что сотворит мне человек? Господь мне помощник, и аз воззрю на враги моя. Благо eсть надеятися на Господа, нежели надеятися на человека; благо eсть уповати на Господа, нежели уповати на князи. Вси языцы обыдоша мя, и именем Господним противляхся им; обышедше обыдоша мя, и именем Господним противляхся им; обыдоша мя яко пчелы сот, и разгорешася яко oгнь в тернiи; и именем Господним противляхся им. Отриновен превратихся пасти, и Господь прiят мя. Крепость моя и пенiе мое Господь, и бысть ми во спасенiе. Глас радости и спасенiя в селенiих праведных; десница Господня сотвори силу. Десница Господня вознесе мя, десница Господня сотвори силу. Не умру, но жив буду и повем дела Господня. Наказуя наказа мя Господь, смерти же не предаде мя. Отверзите мне врата правды; вшед в ня, исповемся Господеви. Сiя врата Господня; праведнiи внидут в ня. Исповемся тебе, яко услышал мя eси и был eси мне во спасенiе. Камень, eгоже небрегоша зиждущiи, сей бысть во главу угла; от Господа бысть сей, и eсть дивен во oчесех наших. Сей день, eгоже сотвори Господь, возрадуемся и возвеселимся в oнь. О, Господи, спаси же, О Господи, поспеши же. Благословен грядый во имя Господне; благословихом вы из дому Господня. Бог Господь, и явися нам; составите праздник во учащающих до рог oлтаревых. Бог мой eси ты, и исповемся тебе; Бог мой eси ты, и вознесу тя; исповемся тебе, яко услышал мя eси и был eси мне во спасенiе. Исповедайтеся Господеви, яко благ, яко в век милость eго.

Псалом 118.

Блажени непорочнiи в пути, ходящiи в законе Господни. Блажени испытающiи свиденiя eго, всем сердцем взыщут eго. Не делающiи бо беззаконiя в путех eго ходиша. Ты заповедал eси заповеди твоя сохранити зело; дабы исправилися путiе мои, сохранити оправданiя твоя. Тогда не постыжуся, внегда призрети ми на вся заповеди твоя. Исповемся тебе в правости сердца, внегда научитимися судбам правды твоея. Оправданiя твоя сохраню; не остави мене до зела. В чесом исправит юнейшiй путь свой? внегда сохранити словеса твоя. Всем сердцем моим взысках тебе; не отрини мене от заповедiй твоих. В сердцы моем скрых словеса твоя, яко да не согрешу тебе. Благословен eси, Господи; научи мя оправданieм твоим. Устнама моима возвестих вся судбы уст твоих. На пути свиденiй твоих насладихся, яко о всяком богатстве. В заповедех твоих поглумлюся, и уразумею пути твоя. Во оправданiих твоих поучуся; не забуду словес твоих. Воздаждь рабу твоему; живи мя, и сохраню словеса твоя. Открый oчи мои, и уразумею чудеса от закона твоего. Пришлец аз eсмь на земли; не скрый от менe заповеди твоя. Возлюби душа моя возжелати судбы твоя на всякое время. Запретил eси гордым; прокляти уклоняющiися от заповедiй твоих. Отими от менe поношенiе и уничиженiе, яко свиденiй твоих взысках. Ибо седоша князи и на мя клеветаху, раб же твой глумляшеся во оправданiих твоих; ибо свиденiя твоя поученiе мое eсть, и совети мои оправданiя твоя. Прильпе земли душа моя; живи мя по словеси твоему. Пути моя возвестих, и услышал мя eси; научи мя оправданieм твоим. Путь оправданiй твоих вразуми ми, и поглумлюся в чудесех твоих. Воздрема душа моя от унынiя; утверди мя в словесех твоих. Путь неправды отстави от менe и законом твоим помилуй мя. Путь истины изволих и судбы твоя не забых. Прилепихся свиденieм твоим, Господи, не посрами мене. Путь заповедiй твоих текох, eгда разширил eси сердце мое. Законоположи мне, Господи, путь оправданiй твоих, и взыщу и выну; вразуми мя, и испытаю закон твой и сохраню и всем сердцем моим. Настави мя на стезю заповедiй твоих, яко тую восхотех. Приклони сердце мое во свиденiя твоя, а не в лихоимство. Отврати oчи мои eже не видети суеты; в пути твоем живи мя. Постави рабу твоему слово твое в страх твой. Отими поношенiе мое, eже непщевах; яко судбы твоя благи. Се, возжелах заповеди твоя; в правде твоей живи мя. И да прiидет на мя милость твоя, Господи, спасенiе твое по словеси твоему; и отвещаю поношающым ми слово, яко уповах на словеса твоя. И не отими от уст моих словесе истинна до зела, яко на судбы твоя уповах; и сохраню закон твой выну, в век и в век века. И хождах в широте, яко заповеди твоя взысках; и глаголах о свиденiих твоих пред цари и не стыдяхся; и поучахся в заповедех твоих, яже возлюбих зело; и воздвигох руце мои к заповедем твоим, яже возлюбих, и глумляхся во оправданiих твоих. Помяни словеса твоя рабу твоему, ихже упованiе дал ми eси. То мя утеши во смиренiи моем, яко слово твое живи мя. Гордiи законопреступоваху до зела; от закона же твоего не уклонихся. Помянух судбы твоя от века, Господи, и утешихся. Печаль прiят мя от грешник, оставляющих закон твой. Пета бяху мне оправданiя твоя на месте пришелствiя моего. Помянух в нощи имя твое, Господи, и сохраних закон твой. Сей бысть мне, яко оправданiй твоих взысках. Часть моя eси, Господи; рех сохранити закон твой. Помолихся лицу твоему всем сердцем моим; помилуй мя по словеси твоему. Помыслих пути твоя и возвратих нозе мои во свиденiя твоя. Уготовихся и не смутихся сохранити заповеди твоя. Ужя грешник обязашася мне, и закона твоего не забых. Полунощи востах исповедатися тебе о судбах правды твоея. Причастник аз eсмь всем боящымся тебe и хранящым заповеди твоя. Милости твоея, Господи, исполнь земля; оправданieм твоим научи мя. Благость сотворил eси с рабом твоим, Господи, по словеси твоему; благости и наказанiю и разуму научи мя, яко заповедем твоим веровах. Прежде даже не смиритимися, аз прегреших; сего ради слово твое сохраних. Благ eси ты, Господи; и благостiю твоею научи мя оправданieм твоим. Умножися на мя неправда гордых; аз же всем сердцем моим испытаю заповеди твоя. Усырися яко млеко сердце их; аз же закону твоему поучихся. Благо мне, яко смирил мя eси, яко да научуся оправданieм твоим. Благ мне закон уст твоих паче тысящ злата и сребра. Руце твои сотвористе мя и создасте мя; вразуми мя, и научуся заповедем твоим. Боящiися тебe узрят мя и возвеселятся, яко на словеса твоя уповах. Разумех, Господи, яко правда судбы твоя, и воистинну смирил мя eси. Буди же милость твоя, да утешит мя, по словеси твоему рабу твоему; да прiидут мне щедроты твоя, и жив буду, яко закон твой поученiе мое eсть; Да постыдятся гордiи, яко неправедно беззаконноваша на мя; аз же размышляти буду в заповедех твоих. Да обратят мя боящiися тебe и ведящiи свиденiя твоя. Буди сердце мое непорочно во оправданiих твоих, яко да не постыжуся. Изчезает во спасенiе твое душа моя, на словеса твоя уповах; изчезоша oчи мои в слово твое, глаголюще; когда утешиши мя? зане бых яко мех на слане; оправданiй твоих не забых. Колико eсть днiй раба твоего? когда сотвориши ми от гонящих мя суд? Поведаша мне законопреступницы глумлeнiя, но не яко закон твой, Господи. Вся заповеди твоя истина; неправедно погнаша мя, помози ми. Вмале не скончаша мене на земли; аз же не оставих заповедiй твоих. По милости твоей живи мя, и сохраню свиденiя уст твоих. Во век, Господи, слово твое пребывает на небеси. В род и род истина твоя; основал eси землю, и пребывает. Учиненiем твоим пребывает день; яко всячeская работна тебе. Яко аще бы не закон твой поученiе мое был, тогда убо погибл бых во смиренiи моем; во век не забуду оправданiй твоих, яко в них оживил мя eси. Твой eсмь аз, спаси мя; яко оправданiй твоих взысках. Мене ждаша грешницы погубити мя; свиденiя твоя разумех. Всякiя кончины видех конец; широка заповедь твоя зело. Коль возлюбих закон твой, Господи; весь день поученiе мое eсть. Паче враг моих умудрил мя eси заповедiю твоею, яко в век моя eсть. Паче всех учащих мя разумех, яко свиденiя твоя поученiе мое eсть. Паче старeц разумех, яко заповеди твоя взысках. От всякаго пути лукава возбраних ногам моим, яко да сохраню словеса твоя; от судеб твоих не уклонихся, яко ты законоположил ми eси. Коль сладка гортани моему словеса твоя; паче меда устом моим. От заповедiй твоих разумех; сего ради возненавидех всяк путь неправды. Светилник ногама моима закон твой, и свет стезям моим. Кляхся и поставих сохранити судбы правды твоея. Смирихся до зела; Господи, живи мя по словеси твоему. Вольная уст моих благоволи же, Господи, и судбам твоим научи мя. Душа моя в руку твоeю выну, и закона твоего не забых. Положиша грешницы сеть мне; и от заповедiй твоих не заблудих. Наследовах свиденiя твоя во век, яко радованiе сердца моего суть; приклоних сердце мое сотворити оправданiя твоя в век за воздаянiе. Законопрeступныя возненавидех, закон же твой возлюбих. Помощник мой и заступник мой eси ты; на словеса твоя уповах. Уклонитеся от менe, лукавнующiи, и испытаю заповеди Бога моего. Заступи мя по словеси твоему, и жив буду; и не посрами мене от чаянiя моего; помози ми, и спасуся, и поучуся во оправданiих твоих выну. Уничижил eси вся отступающыя от оправданiй твоих; яко неправедно помышленiе их. Преступающыя непщевах вся грешныя земли; сего ради возлюбих свиденiя твоя. Пригвозди страху твоему плоти моя; от судеб бо твоих убояхся. Сотворих суд и правду; не предаждь мене обидящым мя. Воспрiими раба твоего во благо, да не оклеветают мене гордiи. Oчи мои изчезосте во спасенiе твое и в слово правды твоея; сотвори с рабом твоим по милости твоей, и оправданieм твоим научи мя. Раб твой eсмь аз; вразуми мя, и увем свиденiя твоя. Время сотворити Господеви; разориша закон твой. Сего ради возлюбих заповеди твоя паче злата и топазiа. Сего ради ко всем заповедем твоим направляхся, всяк путь неправды возненавидех. Дивна свиденiя твоя; сего ради испыта я душа моя. Явленiе словес твоих просвещает и вразумляет младенцы. Уста моя отверзох и привлекох дух, яко заповедiй твоих желах. Призри на мя и помилуй мя, по суду любящих имя твое. Стопы моя направи по словеси твоему, и да не обладает мною всякое беззаконiе; избави мя от клеветы человеческiя, и сохраню заповеди твоя. Лице твое просвети на раба твоего и научи мя оправданieм твоим. Исходища водная изведосте oчи мои, понеже не сохраних закона твоего. Праведен eси, Господи, и прави суди твои; заповедал eси правду свиденiя твоя, и истину зело. Истаяла мя eсть ревность твоя; яко забыша словеса твоя врази мои. Разжжено слово твое зело, и раб твой возлюби e. Юнейшiй аз eсмь и уничижен; оправданiй твоих не забых. Правда твоя правда во век, и закон твой истина. Скорби и нужди обретоша мя; заповеди твоя поученiе мое. Правда свиденiя твоя в век; вразуми мя, и жив буду. Воззвах всем сердцем моим, услыши мя, Господи; оправданiя твоя взыщу. Воззвах ти, спаси мя, и сохраню свиденiя твоя. Предварих в безгодiи и воззвах; на словеса твоя уповах. Предваристе oчи мои ко утру, поучитися словесeм твоим. Глас мой услыши, Господи, по милости твоей; по судбе твоей живи мя. Приближишася гонящiи мя беззаконiем; от закона же твоего удалишася. Близ eси ты, Господи, и вси путiе твои истина. Исперва познах от свиденiй твоих, яко в век основал я eси. Виждь смиренiе мое и изми мя; яко закона твоего не забых. Суди суд мой и избави мя; словесе ради твоего живи мя. Далече от грешник спасенiе, яко оправданiй твоих не взыскаша. Щедроты твоя многи, Господи; по судбе твоей живи мя. Мнози изгонящiи мя и стужающiи ми; от свиденiй твоих не уклонихся. Видех неразумевающыя и истаях; яко словес твоих не сохраниша. Виждь, яко заповеди твоя возлюбих; Господи, по милости твоей живи мя. Начало словес твоих истина, и во век вся судбы правды твоея. Князи погнаша мя туне; и от словес твоих убояся сердце мое. Возрадуюся аз о словесех твоих, яко обретаяй корысть многу. Неправду возненавидех и омерзих; закон же твой возлюбих. Седмерицею днем хвалих тя о судбах правды твоея. Мир мног любящым закон твой, и несть им соблазна. Чаях спасенiя твоего, Господи, и заповеди твоя возлюбих. Сохрани душа моя свиденiя твоя и возлюби я зело. Сохраних заповеди твоя и свиденiя твоя, яко вси путiе мои пред тобою, Господи. Да приближится моленiе мое пред тя, Господи; по словеси твоему вразуми мя. Да внидет прошенiе мое пред тя; Господи, по словеси твоему избави мя. Отрыгнут устне мои пенiе, eгда научиши мя оправданieм твоим. Провещает язык мой словеса твоя, яко вся заповеди твоя правда. Да будет рука твоя eже спасти мя, яко заповеди твоя изволих. Возжелах спасенiе твое, Господи, и закон твой поученiе мое eсть. Жива будет душа моя и восхвалит тя; и судбы твоя помогут мне. Заблудих яко oвча погибшее; взыщи раба твоего, яко заповедiй твоих не забых.