Текст книги "ПСАЛТИРЬ"

Автор книги: Автор Неизвестен

сообщить о нарушении

Текущая страница: 4 (всего у книги 9 страниц)

Псалом 55.

Помилуй мя, Боже, яко попра мя человек; весь день боря стужи ми. Попраша мя врази мои весь день; яко мнози борющiи мя с высоты. В день не убоюся, аз же уповаю на тя. О Бозе похвалю словеса моя; на Бога уповах, не убоюся; что сотворит мне плоть? Весь день словес моих гнушахуся; на мя вся помышлeнiя их на зло. Вселятся и скрыют, тiи пяту мою сохранят, якоже потерпеша душу мою. Ни о чесомже отринеши я, гневом люди низведеши. Боже, живот мой возвестих тебе; положил eси слезы моя пред тобою, яко и во обетованiи твоем. Да возвратятся врази мои вспять, в oньже аще день призову тя; се, познах, яко Бог мой eси ты. О Бозе похвалю глагол, о Господе похвалю слово. На Бога уповах, не убоюся; что сотворит мне человек? Во мне, Боже, молитвы, яже воздам хвалы твоея; яко избавил eси душу мою от смерти, oчи мои от слез и нозе мои от поползновенiя; благоугожду пред Господем во свете живых.

Псалом 56.

Помилуй мя, Боже, помилуй мя; яко на тя упова душа моя, и на сень крилу твоeю надеюся, дондеже прейдет беззаконiе. Воззову к Богу вышнему, Богу благодеявшему мне. Посла с небесе и спасе мя, даде в поношенiе попирающыя мя; посла Бог милость свою и истину свою, и избави душу мою от среды скимнов. Поспах смущен; сынове человечестiи, зубы их oружiя и стрелы, и язык их мечь oстр. Вознесися на небеса, Боже, и по всей земли слава твоя. Сеть уготоваша ногам моим, и слякоша душу мою; ископаша пред лицем моим яму, и впадоша в ню. Готово сердце мое, Боже, готово сердце мое; воспою и пою во славе моей. Востани, слава моя, востани, псалтирю и гусли; востану рано. Исповемся тебе в людех, Господи, воспою тебе во языцех; яко возвеличися до небес милость твоя и даже до облак истина твоя. Вознесися на небеса, Боже, и по всей земли слава твоя.

Псалом 57.

Аще воистинну убо правду глаголете, правая судите, сынове человечестiи. Ибо в сердцы беззаконiе делаете на земли, неправду руки вашя сплетают. Очуждишася грешницы от ложесн, заблудиша от чрева, глаголаша лжу. Ярость их по подобiю змiину, яко аспiда глуха и затыкающаго уши свои, иже не услышит гласа обавающих, обаваемь обавается от премудра. Бог сокрушит зубы их во устех их; членовныя львов сокрушил eсть Господь. Уничижатся яко вода мимотекущая; напряжет лук свой, дондеже изнемогут. Яко воск растаяв отимутся; паде oгнь на них, и не видеша солнца. Прежде eже разумети тeрнiя вашего рамна, яко живы, яко во гневе пожрет я. Возвеселится праведник, eгда увидит отмщенiе; руце свои умыет в крови грешника. И речет человек; аще убо eсть плод праведнику, убо eсть Бог судя им на земли.

Псалом 58.

Изми мя от враг моих, Боже, и от востающих на мя избави мя; избави мя от делающих беззаконiе, и от муж кровей спаси мя. Яко се, уловиша душу мою, нападоша на мя крепцыи; ниже беззаконiе мое, ниже грех мой, Господи; без беззаконiя текох и исправих; востани в сретенiе мое и виждь. И ты, Господи Боже сил, Боже Израилев, вонми посетити вся языки; да не ущедриши вся делающыя беззаконiе. Возвратятся на вечер, и взалчут яко пес, и обыдут град. Се, тiи отвещают усты своими, и мечь во устнах их; яко кто слыша? И ты, Господи, посмеешися им, уничижиши вся языки. Державу мою к тебе сохраню; яко ты, Боже, заступник мой eси. Бог мой, милость eго предварит мя; Бог мой, явит мне на вразех моих. Не убiй их, да не когда забудут закон твой; расточи я силою твоею и низведи я, защитниче мой, Господи, Грех уст их, слово устен их; и яти да будут в гордыни своей, и от клятвы и лжи возвестятся в кончине, во гневе кончины, и не будут; и уведят, яко Бог владычествует iаковом и концы земли. Возвратятся на вечер, и взалчут яко пес, и обыдут град; тiи разыдутся ясти; аще ли же не насытятся, и поропщут. Аз же воспою силу твою и возрадуюся заутра о милости твоей; яко был eси заступник мой и прибежище мое в день скорби моея. Помощник мой eси, тебе пою; яко Бог заступник мой eси, Боже мой, милость моя.

Псалом 59.

Боже, отринул ны eси и низложил eси нас, разгневался eси и ущедрил eси нас. Стрясл eси землю и смутил eси ю; исцели сокрушенiе eя, яко подвижеся. Показал eси людем твоим жестокая; напоил eси нас вiном умиленiя. Дал eси боящымся тебe знаменiе, eже убежати от лица лука. Яко да избавятся возлюбленнiи твои, спаси десницею твоею и услыши мя. Бог возгла во святем своем; возрадуюся, и разделю сiкиму, и юдоль жилищ размерю. Мой eсть галаад, и мой eсть манассiй, eфрем крепость главы моея, iуда царь мой. Моав коноб упованiя моего; на iдумею простру сапог мой; мне иноплемeнницы покоришася. Кто введет мя во град огражденiя? или кто наставит мя до iдумеи? Не ты ли, Боже, отринувый нас? и не изыдеши, Боже, в силах наших? Даждь нам помощь от скорби; и суетно спасенiе человеческо. О Бозе сотворим силу; и той уничижит стужающыя нам.

Псалом 60.

Услыши, Боже, моленiе мое, вонми молитве моей; от конeц земли к тебе воззвах, внегда уны сердце мое; на камень вознесл мя eси, наставил мя eси, яко был eси упованiе мое, столп крепости от лица вражiя. Вселюся в селенiи твоем во веки, покрыюся в крове крил твоих. Яко ты, Боже, услышал eси молитвы моя, дал eси достоянiе боящымся имене твоего. Дни на дни царeвы приложиши, лета eго до дне рода и рода. Пребудет в век пред Богом; милость и истину eго кто взыщет? Тако воспою имени твоему во веки, воздати ми молитвы моя день от дне.

Псалом 61.

Не Богу ли повинется душа моя? от того бо спасенiе мое. Ибо той Бог мой и спас мой, заступник мой; не подвижуся наипаче. Доколе належите на человека? убиваете вси вы, яко стене преклонене и оплоту возриновену. Oбаче цену мою совещаша отринути, текоша в жажди; усты своими благословляху, и сердцем своим кленяху. Oбаче Богови повинися, душе моя; яко от того терпенiе мое. Ибо той Бог мой и спас мой, заступник мой; не преселюся. О Бозе спасенiе мое и слава моя; Бог помощи моея, и упованiе мое на Бога. Уповайте на него, весь сонм людiй; излiяйте пред ним сердца ваша, яко Бог помощник наш. Oбаче суетни сынове человечестiи, лживи сынове человечестiи в мерилех eже неправдовати; тiи от суеты вкупе. Не уповайте на неправду, и на восхищенiе не желайте; богатство аще течет, не прилагайте сердца. Единою гла Бог, двоя сiя слышах, зане держава Божiя, и твоя, Господи, милость; яко ты воздаси комуждо по делом eго.

Псалом 62.

Боже, Боже мой, к тебе утренюю; возжада тебе душа моя, коль множицею тебе плоть моя, в земли пусте и непроходне и безводне. Тако во святем явихся тебе, видети силу твою и славу твою. Яко лучши милость твоя паче живот; устне мои похвалите тя. Тако благословлю тя в животе моем и о имени твоем воздежу руце мои. Яко от тука и масти да исполнится душа моя, и устнама радости восхвалят тя уста моя. Аще поминах тя на постели моей, на утренних поучахся в тя; яко был eси помощник мой, и в крове крилу твоeю возрадуюся. Прильпе душа моя по тебе; мене же прiят десница твоя. Тiи же всуе искаша душу мою; внидут в преисподняя земли; предадятся в руки oружiя, части лисовом будут. Царь же возвеселится о Бозе; похвалится всяк кленыйся им, яко заградишася уста глаголющих неправeдная.

Псалом 63.

Услыши, Боже, глас мой, внегда молитимися к тебе; от страха вражiя изми душу мою. Покрый мя от сонма лукавнующих, от множества делающих неправду; иже изостриша яко мечь языки своя, напрягоша лук свой, вещь горьку, состреляти в тайных непорочна; внезапу состреляют eго, и не убоятся. Утвердиша себе слово лукавое; поведаша скрыти сеть, реша; кто узрит их? Испыташа беззаконiе; исчезоша испытающiи испытанiя; приступит человек, и сердце глубоко. И вознесется Бог; стрелы младенeц быша язвы их, и изнемогоша на ня языцы их; смутишася вси видящiи их. И убояся всяк человек; и возвестиша дела Божiя, и творeнiя eго разумеша. Возвеселится праведник о Господе и уповает на него; и похвалятся вси правiи сердцем.

Псалом 64.

Тебе подобает песнь, Боже, в Сiоне, и тебе воздастся молитва во Iерусалиме. Услыши молитву мою; к тебе всяка плоть прiидет. Словеса беззаконник премогоша нас; и нечeстiя наша ты очтиши. Блажен, eгоже избрал eси и прiял, вселится во дворех твоих. Исполнимся во благих дому твоего; свят храм твой. Дивен в правде, услыши ны, Боже, спасителю наш, упованiе всех концей земли и сущих в мори далече; уготовляяй горы крепостiю своею, препоясан силою; смущаяй глубину морскую, шуму волн eго кто постоит? смятутся языцы, и убоятся живущiи в концах от знаменiй твоих; исходы утра и вечера украсиши. Посетил eси землю и упоил eси ю, умножил eси обогатити ю; река Божiя наполнися вод; уготовал eси пищу им, яко тако eсть уготованiе. Бразды eя упой, умножи жита eя; в каплях eя возвеселится прозябающи. Благословиши венец лета благости твоея, и поля твоя исполнятся тука; разботеют красная пустыни, и радостiю холми препояшутся. Одеяшася oвни oвчiи, и удолiя умножат пшеницу; воззовут, ибо воспоют.

Псалом 65.

Воскликните Господеви вся земля, пойте же имени eго, дадите славу хвале eго. Рцыте Богу; коль страшна дела твоя? во множестве силы твоея солжут тебе врази твои. Вся земля да поклонится тебе и поет тебе, да поет же имени твоему, вышнiй. Прiидите и видите дела Божiя, коль страшен в советех паче сынов человеческих. Обращаяй море в сушу, в реце пройдут ногами; тамо возвеселимся о нем, владычествующем силою своею веком; oчи eго на языки призираете; преогорчевающiи да не возносятся в себе. Благословите, языцы, Бога нашего, и услышан сотворите глас хвалы eго, положшаго душу мою в живот, и не давшаго во смятенiе ног моих. Яко искусил ны eси, Боже, разжегл ны eси, якоже разжизается сребро. Ввел ны eси в сеть, положил eси скорби на хребте нашем. Возвел eси человеки на главы нашя; проидохом сквозе oгнь и воду, и извел eси ны в покой. Вниду в дом твой со всесожженiем, воздам тебе молитвы моя, яже изрекосте устне мои, и глаголаша уста моя в скорби моей. Всесожжeнiя тучна вознесу тебе с кадилом, и oвны, вознесу тебе волы с козлы. Прiидите, услышите, и повем вам, вси боящiися Бога, eлика сотвори души моей. К нему усты моими воззвах, и вознесох под языком моим. Неправду аще узрех в сердцы моем, да не услышит менe Господь. Сего ради услыша мя Бог, внят гласу моленiя моего. Благословен Бог, иже не отстави молитву мою и милость свою от менe.

Псалом 66.

Боже, ущедри ны и благослови ны, просвети лице твое на ны и помилуй ны; Познати на земли путь твой, во всех языцех спасенiе твое. Да исповедятся тебе людiе, Боже, да исповедятся тебе людiе вси. Да возвеселятся и да возрадуются языцы; яко судиши людем правотою, и языки на земли наставиши. Да исповедятся тебе людiе, Боже, да исповедятся тебе людiе вси. Земля даде плод свой; благослови ны, Боже, Боже наш, благослови ны, Боже; и да убоятся eго вси концы земли.

Псалом 67.

Да воскрснет Бог, и расточатся врази eго, и да бежат от лица eго ненавидящiи eго. Яко изчезает дым, да изчезнут; яко тает воск от лица oгня, тако да погибнут грешницы от лица Божiя; а праведницы да возвеселятся, да возрадуются пред Богом, да насладятся в веселiи. Воспойте Богу, пойте имени eго; путесотворите возшедшему на запады, Господь имя eму; и радуйтеся пред ним. Да смятутся от лица eго, oца сирых и судiи вдовиц; Бог в месте святем своем. Бог вселяет eдиномыслeнныя в дом, изводя окованныя мужеством, такожде преогорчевающыя живущыя во гробех. Боже, внегда исходити тебе пред людьми твоими, внегда мимоходити тебе в пустыни, земля потрясеся, ибо небеса кануша от лица Бога сiнаина, от лица Бога Израилева. Дождь волен отлучиши, Боже, достоянiю твоему, и изнеможе, ты же совершил eси e. Животная твоя живут на ней; уготовал eси благостiю твоею нищему, Боже. Господь даст глагол благовествующым силою многою; царь сил возлюбленнаго, красотою дому разделити корысти. Аще поспите посреде предел, криле голубине посребрeне, и междорамiя eя в блещанiи злата; внегда разнствит небесный цари на ней, оснежатся в селмоне. Гора Божiя, гора тучная, гора усыренная, гора тучная. Вскую непщуете, горы усырeнныя? гора, юже благоволи Бог жити в ней; ибо Господь вселится до конца. Колесница Божiя тмами тем, тысяща гобзующих; Господь в них в сiнаи во святем. Возшел eси на высоту, пленил eси плен; прiял eси даянiя в человецех, ибо не покаряющыяся, eже вселитися. Господь Бог благословен, благословен Господь день дне; поспешит нам Бог спасенiй наших. Бог наш Бог eже спасати; и Господня, Господня исходища смeртная. Oбаче Бог сокрушит главы врагов своих, верх влас преходящих в прегрешенiих своих. Рече Господь; от васана обращу, обращу во глубинах морских; яко да омочится нога твоя в крови, язык пeс твоих от враг от него. Видена быша шeствiя твоя, Боже, шeствiя Бога моего царя, иже во святем. Предвариша князи близ поющих, посреде дев тимпанниц. В церквах благословите Бога, Господа от источник Израилевых. Тамо венiамiн юнейшiй во ужасе, князи iудовы владыки их, князи завулони, князи неффалiмли. Заповеждь, Боже, силою твоею; укрепи, Боже, сiе, eже соделал eси в нас. От храма твоего во Iерусалим тебе принесут царiе дары. Запрети зверeм тростным; сонм юнeц в юницах людских, eже затворити искушeнныя сребром; расточи языки хотящыя бранем. Прiидут молитвенницы от eгипта; eфiопiа предварит руку свою к Богу. Царства земная, пойте Богу, воспойте Господеви, возшедшему на нбо небесе на востоки; се, даст гласу своему глас силы. Дадите славу Богови; на Израили велелепота eго, и сила eго на облацех. Дивен Бог во святых своих; Бог Израилев, той даст силу и державу людем своим. Благословен Бог.

Псалом 68.

Спаси мя, Боже, яко внидоша воды до души моея. Углебох в тименiи глубины, и несть постоянiя; прiидох во глубины морскiя, и буря потопи мя. Утрудихся зовый, измолче гортань мой; исчезосте oчи мои, от eже уповати ми на Бога моего. Умножишася паче влас главы моея ненавидящiи мя туне; укрепишася врази мои, изгонящiи мя неправедно; яже не восхищах, тогда воздаях. Боже, ты уведел eси безумiе мое, и прегрешeнiя моя от тебe не утаишася. Да не постыдятся о мне терпящiи тебе, Господи, Господи сил; ниже да посрамятся о мне ищущiи тебе, Боже Израилев. Яко тебe ради претерпех поношенiе, покры срамота лице мое. Чуждь бых братiи моей и странен сыновом матере моея; яко ревность дому твоего снеде мя, и поношeнiя поносящих ти нападоша на мя. И покрых постом душу мою, и бысть в поношенiе мне; и положих одеянiе мое вретище, и бых им в притчу. О мне глумляхуся седящiи во вратех, и о мне пояху пiющiи вiно. Аз же молитвою моею к тебе, Боже; время благоволенiя, Боже; во множестве милости твоея услыши мя, во истине спасенiя твоего. Спаси мя от бренiя, да не углебну; да избавлюся от ненавидящих мя и от глубоких вод. Да не потопит мене буря водная, ниже да пожрет мене глубина, ниже сведет о мне ровенник уст своих. Услыши мя, Господи, яко блага милость твоя; по множеству щедрот твоих призри на мя. Не отврати лица твоего от oтрока твоего, яко скорблю; скоро услыши мя. Вонми души моей и избави ю; враг моих ради избави мя. Ты бо веси поношенiе мое, и студ мой, и срамоту мою; пред тобою вси оскорбляющiи мя. Поношенiе чаяше душа моя и страсть; и ждах соскорбящаго, и не бе, и утешающих, и не обретох. И даша в снедь мою желчь, и в жажду мою напоиша мя oцта. Да будет трапеза их пред ними в сеть и в воздаянiе и в соблазн. Да помрачатся oчи их, eже не видети, и хребет их выну сляцы. Пролiй на ня гнев твой, и ярость гнева твоего да постигнет их. Да будет двор их пуст, и в жилищих их да не будет живый. Зане eгоже ты поразил eси, тiи погнаша, и к болезни язв моих приложиша. Приложи беззаконiе к беззаконiю их, и да не внидут в правду твою. Да потребятся от книги живых, и с праведными да не напишутся. Нищ и боляй eсмь аз; спасенiе твое, Боже, да прiимет мя. Восхвалю имя Бога моего с песнiю, возвеличу eго во хваленiи; и угодно будет Богу паче телца юна, роги износяща и пазнокти. Да узрят нищiи и возвеселятся; взыщите Бога, и жива будет душа ваша. Яко услыша убогiя Господь, и окованныя своя не уничижи. Да восхвалят eго небеса и земля, море и вся живущая в нем. Яко Бог спасет Сiона, и созиждутся гради iудейстiи, и вселятся тамо и наследят и; и семя рабов твоих удержит и, и любящiи имя твое вселятся в нем.

Псалом 69.

Боже, в помощь мою вонми; Господи, помощи ми потщися. Да постыдятся и посрамятся ищущiи душу мою. да возвратятся вспять и постыдятся хотящiи ми злая; да возратятся абiе стыдящеся глаголющiи ми; благоже, благоже. Да возрадуются и возвеселятся о тебе вси ищущiи тебе, Боже; и да глаголют выну, да возвеличится Господь, любящiи спасенiе твое. Аз же нищ eсмь и убог, Боже, помози ми; помощник мой и избавитель мой eси ты, Господи, не закосни.

Псалом 70.

На тя, Господи, уповах, да не постыжуся в век. Правдою твоею избави мя и изми мя; приклони ко мне ухо твое и спаси мя. Буди ми в Бога защитителя и в место крепко спасти мя; яко утвержденiе мое и прибежище мое eси ты. Боже мой, избави мя из руки грешнаго, из руки законопреступнаго и обидящаго; Яко ты eси терпенiе мое, Господи, Господи, упованiе мое от юности моея. В тебе утвердихся от утробы, от чрева матере моея ты eси мой покровитель; о тебе пенiе мое выну. Яко чудо бых многим; и ты помощник мой крепок. Да исполнятся уста моя хваленiя, яко да воспою славу твою, весь день великолепiе твое. Не отвержи менe во время старости; внегда оскудевати крепости моей, не остави менe. Яко реша врази мои мне, и стрегущiи душу мою совещаша вкупе, глаголюще; Бог оставил eсть eго, пожените и имите eго, яко несть избавляяй. Боже мой, не удалися от менe; Боже мой, в помощь мою вонми. Да постыдятся и изчезнут оклеветающiи душу мою, да облекутся в студ и срам ищущiи злая мне. Аз же всегда возуповаю на тя, и приложу на всяку похвалу твою. Уста моя возвестят правду твою, весь день спасенiе твое, яко не познах книжная. Вниду в силе Господни; Господи, помяну правду тебe eдинаго. Боже мой, имже научил мя eси от юности моея, и донне возвещу чудеса твоя. И даже до старости и престаренiя, Боже мой, не остави менe, дондеже возвещу мышцу твою роду всему грядущему, силу твою и правду твою, Боже, даже до вышних, яже сотворил ми eси величiя; Боже, кто подобен тебе? Елики явил ми eси скорби многи и злы? и обращься оживотворил мя eси и от бездн земли возвел мя eси. Умножил eси на мне величествiе твое, и обращься утешил мя eси, и от бездн земли паки возвел мя eси. Ибо аз исповемся тебе в людех, Господи, в сосудех псаломских истину твою, Боже; воспою тебе в гуслех, стый Израилев. Возрадуетеся устне мои, eгда воспою тебе, и душа моя, юже eси избавил; eще же и язык мой весь день поучится правде твоей, eгда постыдятся и посрамятся ищущiй злая мне.

Псалом 71.

Боже, суд твой цареви даждь, и правду твою сыну цареву; судити людем твоим в правде и нищым твоим в суде. Да воспрiимут горы мир людем и холми правду. Судит нищым людским, и спасет сыны убогих, и смирит клеветника. И пребудет с солнцем, и прежде луны рода родов. Снидет яко дождь на руно, и яко капля каплющая на землю. Возсiяет во днех eго правда и множество мира, дондеже отимется луна. И обладает от моря до моря, и от рек до конeц вселенныя. Пред ним припадут eфiопляне, и врази eго персть полижут. Царiе фарсiйстiи и oстрови дары принесут, царiе аравстiи и сава дары приведут; и поклонятся eму вси царiе земстiи, вси языцы поработают eму. Яко избави нища от сильна, и убога, eмуже не бе помощника. Пощадит нища и убога, и душы убогих спасет; от лихвы и от неправды избавит душы их, и честно имя eго пред ними. И жив будет, и дастся eму от злата аравiйска; и помолятся о нем выну, весь день благословят eго. Будет утвержденiе на земли на версех гор; превознесется паче лiвана плод eго, и процветут от града яко трава земная. Будет имя eго благословено во веки, прежде солнца пребывает имя eго; и благословятся в нем вся колена земная, вси языцы ублажат eго. Благословен Господь Бог Израилев, творяй чудеса eдин, и благословено имя славы eго во век и в век века; и исполнится славы eго вся земля; буди, буди.

Псалом 72.

Коль благ Бог Израилев правым сердцем. Мои же вмале не подвижастеся нозе; вмале не пролiяшася стопы моя; яко возревновах на беззаконныя, мир грешников зря; яко несть восклоненiя в смерти их и утвержденiя в ране их; в трудех человеческих не суть, и с человеки не прiимут ран. Сего ради удержа я гордыня их до конца; одеяшася неправдою и нечестiем своим. Изыдет яко из тука неправда их; преидоша в любовь сердца. Помыслиша и глаголаша в лукавстве, неправду в высоту глаголаша; положиша на небеси уста своя, и язык их прейде по земли. Сего ради обратятся людiе мои семо, и днiе исполнени обрящутся в них. И реша; како уведе Бог? и аще eсть разум в вышнем? Се, сiи грешницы и гобзующiи в век удержаша богатство. И рех; eда всуе оправдих сердце мое и умых в неповинных руце мои, и бых язвен весь день, и обличенiе мое на утрених? Аще глаголах, повем тако; се, роду сынов твоих, eмуже обещахся; и непщевах разумети; сiе труд eсть предо мною, дондеже вниду во святило Божiе и разумею в последняя их. Oбаче за льщeнiя их положил eси им злая, низложил eси я, внегда разгордешася. Како быша в запустенiе? внезапу изчезоша, погибоша за беззаконiе свое. Яко сонiе востающаго, Господи, во граде твоем образ их уничижиши. Яко разжжеся сердце мое, и утробы моя изменишася; и аз уничижен, и не разумех, скотен бых у тебe. И аз выну с тобою; удержал eси руку десную мою, и советом твоим наставил мя eси, и со славою прiял мя eси. Что бо ми eсть на небеси? и от тебe что восхотех на земли? Изчезе сердце мое и плоть моя, Боже сердца моего, и часть моя, Боже, во век. Яко се, удаляющiи себе от тебe погибнут; потребил eси всякаго любодеющаго от тебe. Мне же прилеплятися Богови благо eсть, полагати на Господа упованiе мое, возвестити ми вся хвалы твоя, во вратех дщере Сiони.