Текст книги "ПСАЛТИРЬ"

Автор книги: Автор Неизвестен

сообщить о нарушении

Текущая страница: 8 (всего у книги 9 страниц)

Псалом 119.

Ко Господу, внегда скорбети ми, воззвах, и услыша мя. Господи, избави душу мою от устен неправедных и от языка льстива. Что дастся тебе, или что приложится тебе к языку льстиву? Стрелы сильнаго изощрeны, со угльми пустынными. Увы мне, яко пришелствiе мое продолжися, вселихся с селeнiи кидарскими; много пришелствова душа моя; с ненавидящими мира бех мирен; eгда глаголах им, боряху мя туне.

Псалом 120.

Возведох oчи мои в горы, отнюдуже прiидет помощь моя. Помощь моя от Господа, сотворшаго небо и землю. Не даждь во смятенiе ноги твоея, ниже воздремлет храняй тя; се, не воздремлет, ниже уснет храняй Израиля. Господь сохранит тя, Господь покров твой на руку десную твою. Во дни солнце не ожжет тебе, ниже луна нощiю. Господь сохранит тя от всякаго зла, сохранит душу твою Господь; Господь сохранит вхожденiе твое и исхожденiе твое, отнне и до века.

Псалом 121.

Возвеселихся о рекших мне; в дом Господень пойдем. Стояще бяху ноги нашя во дворех твоих, Iерусалиме. Iерслим зиждемый яко град, eмуже причастiе eго вкупе. Тамо бо взыдоша колена, колена Господня, свиденiе Израилево, исповедатися имени Господню; яко тамо седоша престоли на суд, престоли в дому Давидове. Вопросите же яже о мире Iерусалима; и oбилiе любящым тя. Буди же мир в силе твоей, и oбилiе в столпостенах твоих. Ради братiй моих и ближних моих глаголах убо мир о тебе. Дому ради Господа Бога нашего взысках благая тебе.

Псалом 122.

К тебе возведох oчи мои, живущему на небеси. Се, яко oчи раб в руку господiй своих, яко oчи рабыни в руку госпожи своея; тако oчи наши ко Господу Богу нашему, дондеже ущедрит ны. Помилуй нас, Господи, помилуй нас, яко помногу исполнихомся уничиженiя; наипаче наполнися душа наша поношенiя гобзующих и уничиженiя гордых.

Псалом 123.

Яко аще не Господь бы был в нас, да речет убо Израиль; яко аще не Господь бы был в нас, внегда востати человеком на ны, убо живых пожерли быша нас; внегда прогневатися ярости их на ны, убо вода потопила бы нас. Поток прейде душа наша; убо прейде душа наша воду непостоянную. Благословен Господь, иже не даде нас в ловитву зубом их. Душа наша яко птица избавися от сети ловящих; сеть сокрушися, и мы избавлени быхом. Помощь наша во имя Господа, сотворшаго небо и землю.

Псалом 124.

Надеющiися на Господа, яко гора Сiон; не подвижится в век живый во Iерусалиме. Горы окрест eго, и Господь окрест людей своих, отнне и до века. Яко не оставит Господь жезла грешных на жребiй праведных, яко да не прострут праведнiи в беззаконiя рук своих. Ублажи, Господи, благiя и правыя сердцем. Уклоняющыяся же в развращeнiя отведет Господь с делающими беззаконiе; мир на Израиля.

Псалом 125.

Внегда возвратити Господу плен Сiонь, быхом яко утешени. Тогда исполнишася радости уста наша, и язык наш веселiя; тогда рекут во языцех; возвеличил eсть Господь сотворити с ними. Возвеличил eсть Господь сотворити с нами; быхом веселящеся. Возврати, Господи, плененiе наше, яко потоки югом. Сеющiи слезами, радостiю пожнут. Ходящiи хождаху и плакахуся, метающе семена своя; грядуще же прiидут радостiю, вземлюще рукояти своя.

Псалом 126.

Аще не Господь созиждет дом, всуе трудишася зиждущiи; аще не Господь сохранит град, всуе бде стрегiй. Всуе вам eсть утреневати; востанете по седенiи ядущiи хлеб болезни, eгда даст возлюблeнным своим сон. Се, достоянiе Господне сынове, мзда плода чревняго. Яко стрелы в руце сильнаго, тако сынове оттрясенных. Блажен, иже исполнит желанiе свое от них; не постыдятся, eгда глаголют врагом своим во вратех.

Псалом 127.

Блажени вси боящiися Господа, ходящiи в путех eго; труды плодов твоих снеси; блажен eси, и добро тебе будет. Жена твоя яко лоза плодовита в странах дому твоего; сынове твои яко новосаждeнiя масличная окрест трапезы твоея. Се, тако благословится человек бояйся Господа. Благословит тя Господь от Сiона, и узриши благая Iерусалима вся дни живота твоего, и узриши сыны сынов твоих; мир на Израиля.

Псалом 128.

Множицею брашася со мною от юности моея, да речет убо Израиль; множицею брашася со мною от юности моея, ибо не премогоша мя. На хребте моем делаша грешницы, продолжиша беззаконiе свое. Господь праведн ссече выя грешников. Да постыдятся и возвратятся вспять вси ненавидящiи Сiона; да будут яко трава на кровех, яже прежде восторженiя изсше; eюже не исполни руки своея жняй, и недра своего рукояти собираяй; и не реша мимоходящiи; благословенiе Господне на вы, благословихом вы во имя Господне.

Псалом 129.

Из глубины воззвах к тебе, Господи; Господи, услыши глас мой. Да будут уши твои внемлюще гласу моленiя моего. Аще беззаконiя назриши, Господи, Господи, кто постоит? яко у тебe очищенiе eсть. Имене ради твоего потерпех тя, Господи, потерпе душа моя в слово твое; упова душа моя на Господа. От стражи утреннiя до нощи, от стражи утреннiя да уповает Израиль на Господа; яко у Господа милость, и многое у него избавленiе; и той избавит Израиля от всех беззаконiй eго.

Псалом 130.

Господи, не вознесеся сердце мое, ниже вознесостеся oчи мои; ниже ходих в великих, ниже в дивных паче менe. Аще не смиреномудрствовах, но вознесох душу мою, яко отдоеное на матерь свою, тако воздаси на душу мою. Да уповает Израиль на Господа отнне и до века.

Псалом 131.

Помяни, Господи, Давида и всю кротость eго; яко клятся Господеви, обещася Богу iаковлю; аще вниду в селенiе дому моего, или взыду на oдр постели моея; аще дам сон oчима моима, и веждома моима дреманiе, и покой скранiама моима; дондеже обрящу место Господеви, селенiе Богу iаковлю. Се, слышахом я во eифрафе, обретохом я в полях дубравы; внидем в селeнiя eго, поклонимся на место, идеже стоясте нозе eго. Воскресни, Господи, в покой твой, ты и кiвот святыни твоея. Сщенницы твои облекутся правдою, и преподобнiи твои возрадуются. Двда ради раба твоего, не отврати лице помазаннаго твоего. Клятся Господь Давиду истиною, и не отвержется eя; от плода чрева твоего посажду на престоле твоем. Аще сохранят сынове твои завет мой и свиденiя моя сiя, имже научу я, и сынове их до века сядут на престоле твоем. Яко избра Господь Сiона, изволи и в жилище себе. Сей покой мой во век века, зде вселюся, яко изволих и. Ловитву eго благословляяй благословлю, нищыя eго насыщу хлебы; сщенники eго облеку во спасенiе, и преподобнiи eго радостiю возрадуются. Тамо возращу рог Давидови, уготовах светилник помазанному моему. Враги eго облеку студом, на нем же процветет святыня моя.

Псалом 132.

Се, что добро, или что красно, но eже жити братiи вкупе? Яко миро на главе, сходящее на браду, браду аароню, сходящее на ометы oдежды eго; яко роса аермонская сходящая на горы Сiонскiя; яко тамо заповеда Господь благословенiе и живот до века.

Псалом 133.

Се, ныне благословите Господа, вси раби Господни, стоящiи в храме Господни, во дворех дому Бога нашего. В нощех воздежите руки вашя во святая и благословите Господа. Благословит тя Господь от Сiона, сотворивый небо и землю.

Псалом 134.

Хвалите имя Господне, хвалите, раби Господа, стоящiи во храме Господни, во дворех дому Бога нашего. Хвалите Господа, яко благ Господь; пойте имени eго, яко добро; яко iакова избра себе Господь, Израиля в достоянiе себе; яко аз познах, яко велiй Господь, и Господь наш над всеми боги; вся, eлика восхоте Господь, сотвори на небеси и на земли, в морях и во всех безднах. Возводя облаки от последних земли, молнiи в дождь сотвори, изводяй ветры от сокровищ своих. Иже порази первенцы eгипeтскiя от человека до скота; посла знамeнiя и чудеса посреде тебe, eгипте, на фараона и на вся рабы eго. Иже порази языки многи и изби цари крепки; сиона царя аморрейска и ога царя васанска, и вся царствiя ханаанска; и даде землю их достоянiе, достоянiе Израилю людем своим. Господи, имя твое в век, и память твоя в род и род; яко судити имать Господь людем своим, и о рабех своих умолится. Iдоли язык сребро и злато, дела рук человеческих; уста имут, и не возглаголют; oчи имут, и не узрят; уши имут, и не услышат; ниже бо eсть дух во устех их. Подобни им да будут творящiи я и вси надеющiися на ня. Доме Израилев, благословите Господа; доме ааронь, благословите Господа; доме леиiин, благословите Господа; боящiися Господа, благословите Господа. Благословен Господь от Сiона, живый во Iерусалиме.

Псалом 135.

Исповедайтеся Господеви, яко благ; яко в век милость eго. Исповедайтеся Богу богов; яко в век милость eго. Исповедайтеся Господеви господей; яко в век милость eго. Сотворшему чудеса вeлiя eдиному; яко в век милость eго. Сотворшему небеса разумом; яко в век милость eго. Утвердившему землю на водах; яко в век милость eго. Сотворшему светила вeлiя eдиному; яко в век милость eго; солнце во область дне; яко в век милость eго; луну и звезды во область нощи; яко в век милость eго. Поразившему eгипта с первeнцы eго; яко в век милость eго; и изведшему Израиля от среды их; яко в век милость eго; рукою крепкою и мышцею высокою; яко в век милость eго. Раздельшему чермное море в разделeнiя; яко в век милость eго; и проведшему Израиля посреде eго; яко в век милость eго; и истрясшему фараона и силу eго в море чермное; яко в век милость eго. Проведшему люди своя в пустыни; яко в век милость eго. Поразившему цари вeлiя; яко в век милость eго. И убившему цари крепкiя; яко в век милость eго; сиона царя аморрейска; яко в век милость eго; и ога царя васанска; яко в век милость eго. И давшему землю их достоянiе; яко в век милость eго; достоянiе Израилю рабу своему; яко в век милость eго. Яко во смиренiи нашем помяну ны Господь; яко в век милость eго. И избавил ны eсть от врагов наших; яко в век милость eго; даяй пищу всякой плоти; яко в век милость eго. Исповедайтеся Богу небесному; яко в век милость eго.

Псалом 136.

На реках вавилонских, тамо седохом и плакахом, внегда помянути нам Сiона; на вербiих посреде eго обесихом oрганы нашя. Яко тамо вопросиша ны пленшiи нас о словесех песней, и ведшiи нас о пенiи; воспойте нам от песней Сiонских. Како воспоем песнь Господню на земли чуждей? Аще забуду тебе, Iерусалиме, забвена буди десница моя. Прильпни язык мой гортани моему, аще не помяну тебe, аще не предложу Iерусалима, яко в начале веселiя моего. Помяни, Господи, сыны eдомскiя в день Iерусалимль глаголющыя; истощайте, истощайте до основанiй eго. Дщи вавилоня окаянная, блажен, иже воздаст тебе воздаянiе твое, eже воздала eси нам; блажен, иже имет и разбiет младенцы твоя о камень.

Псалом 137.

Исповемся тебе, Господи, всем сердцем моим, и пред ангелы воспою тебе, яко услышал eси вся глаголы уст моих; поклонюся ко храму святому твоему и исповемся имени твоему о милости твоей и истине твоей, яко возвеличил eси над всем имя твое святое. В oньже аще день призову тя, скоро услыши мя; умножиши мя в души моей силою твоею. Да исповедятся тебе, Господи, вси царiе земстiи, яко услышаша вся глаголы уст твоих; и да воспоют в путех Господних, яко велiя слава Господня; яко высок Господь, и смирeнныя призирает, и высокая издалеча весть. Аще пойду посреде скорби, живиши мя; на гнев враг моих простерл eси руку твою, и спасе мя десница твоя. Господь воздаст за мя; Господи, милость твоя во век; дел руку твоeю не презри.

Псалом 138.

Господи, искусил мя eси и познал мя eси; ты познал eси седанiе мое и востанiе мое. Ты разумел eси помышлeнiя моя издалеча; стезю мою и уже мое ты eси изследовал и вся пути моя провидел eси. Яко несть льсти в языце моем; се, Господи, ты познал eси вся последняя и дрeвняя; ты создал eси мя и положил eси на мне руку твою. Удивися разум твой от менe, утвердися, не возмогу к нему. Камо пойду от дха твоего? и от лица твоего камо бежу? Аще взыду на нбо, ты тамо eси; аще сниду во ад, тамо eси. Аще возму криле мои рано и вселюся в последних моря, и тамо бо рука твоя наставит мя, и удержит мя десница твоя. И рех; eда тма поперет мя? и нощь просвещенiе в сладости моей. Яко тма не помрачится от тебe, и нощь яко день просветится; яко тма eя, тако и свет eя. Яко ты создал eси утробы моя, воспрiял мя eси из чрева матере моея. Исповемся тебе, яко страшно удивился eси; чудна дела твоя, и душа моя знает зело. Не утаися кость моя от тебe, юже сотворил eси в тайне, и состав мой в преисподних земли. Несоделанное мое видесте oчи твои, и в книзе твоей вси напишутся; во днех созиждутся, и никтоже в них. Мне же зело честни быша друзи твои, Боже, зело утвердишася владычeствiя их; изочту их, и паче песка умножатся; востах, и eще eсмь с тобою. Аще избiеши грешники, Боже; мужiе кровей, уклонитеся от менe. Яко ревниви eсте в помышленiих, прiимут в суету грады твоя. Не ненавидящыя ли тя, Господи, возненавидех, и о вразех твоих истаях? Совершенною ненавистiю возненавидех я; во враги быша ми. Искуси мя, Боже, и увеждь сердце мое; истяжи мя и разумей стeзи моя; и виждь, аще путь беззаконiя во мне, и настави мя на путь вечен.

Псалом 139.

Изми мя, Господи, от человека лукава, от мужа неправедна избави мя; иже помыслиша неправду в сердцы, весь день ополчаху брани; изостриша язык свой яко змiин; яд аспiдов под устнами их. Сохрани мя, Господи, из руки грешничи, от человек неправедных изми мя, иже помыслиша запяти стопы моя. Скрыша гордiи сеть мне и ужы, препяша сеть ногама моима; при стези соблазны положиша ми. Рех Господеви; Бог мой eси ты, внуши, Господи, глас моленiя моего. Господи, Господи, сило спасенiя моего, осенил eси над главою моею в день брани. Не предаждь мене, Господи, от желанiя моего грешнику; помыслиша на мя, не остави мене, да не когда вознесутся. Глава окруженiя их, труд устен их покрыет я. Падут на них углiя oгнeнная, низложиши я во страстех, и не постоят. Муж язычен не исправится на земли; мужа неправедна злая уловят во истленiе. Познах, яко сотворит Господь суд нищым и месть убогим. Oбаче праведнiи исповедятся имени твоему, и вселятся правiи с лицем твоим.

Псалом 140.

Господи, воззвах к тебе, услыши мя; вонми гласу моленiя моего, внегда воззвати ми к тебе. Да исправится молитва моя яко кадило пред тобою; воздеянiе руку моeю, жертва вечерняя. Положи, Господи, храненiе устом моим и дверь огражденiя о устнах моих. Не уклони сердце мое в словеса лукавствiя, непщевати вины о гресех с человеки делающими беззаконiе; и не сочтуся со избранными их. Накажет мя праведник милостiю и обличит мя, eлей же грешнаго да не намастит главы моея; яко eще и молитва моя во благоволенiих их. Пожeрты быша при камени судiи их; услышатся глаголи мои, яко возмогоша. Яко толща земли проседеся на земли, расточишася кости их при аде. Яко к тебе, Господи, Господи, oчи мои; на тя уповах, не отими душу мою; сохрани мя от сети, юже составиша ми, и от соблазн делающих беззаконiе. Падут во мрежу свою грешницы; eдин eсм аз, дондеже прейду.

Псалом 141.

Гласом моим ко Господу воззвах, гласом моим ко Господу помолихся. Пролiю пред ним моленiе мое, печаль мою пред ним возвещу. Внегда изчезати от менe духу моему, и ты познал eси стeзи моя; на пути сем, по немуже хождах, скрыша сеть мне. Сматрях одесную и возглядах, и не бе знаяй мене; погибе бегство от менe, и несть взыскаяй душу мою. Воззвах к тебе, Господи, рех; ты eси упованiе мое, часть моя eси на земли живых. Вонми моленiю моему, яко смирихся зело; избави мя от гонящих мя, яко укрепишася паче менe. Изведи из темницы душу мою, исповедатися имени твоему; мене ждут праведницы, дондеже воздаси мне.

Псалом 142.

Господи, услыши молитву мою, внуши моленiе мое во истине твоей, услыши мя в правде твоей; и не вниди в суд с рабом твоим, яко не оправдится пред тобою всяк живый. Яко погна враг душу мою; смирил eсть в землю живот мой; посадил мя eсть в темных, яко мeртвыя века. И уны во мне дух мой, во мне смятеся сердце мое. Помянух дни дрeвнiя, поучихся во всех делех твоих, в творенiих руку твоeю поучахся. Воздех к тебе руце мои; душа моя яко земля безводная тебе. Скоро услыши мя, Господи, изчезе дух мой; не отврати лица твоего от менe, и уподоблюся низходящым в ров. Слышану сотвори мне заутра милость твою, яко на тя уповах; скажи мне, Господи, путь, в oньже пойду, яко к тебе взях душу мою. Изми мя от враг моих, Господи, к тебе прибегох. Научи мя творити волю твою, яко ты eси Бог мой; дх твой благiй наставит мя на землю праву. Имене твоего ради, Господи, живиши мя правдою твоею; изведеши от печали душу мою; и милостiю твоею потребиши враги моя и погубиши вся стужающыя души моей; яко аз раб твой eсмь.

Псалом 143.

Благословен Господь Бог мой, научаяй руце мои на ополченiе, персты моя на брань. Милость моя и прибежище мое, заступник мой и избавитель мой, защититель мой, и на него уповах; повинуяй люди моя под мя. Господи, что eсть человек, яко познался eси eму? или сын человечь, яко вменяеши eго? Человек суете уподобися; днiе eго яко сень преходят. Господи, преклони небеса, и сниди; коснися горам, и воздымятся; блесни молнiю, и разженеши я; посли стрелы твоя, и смятеши я. Посли руку твою с высоты, изми мя и избави мя от вод многих, из руки сынов чуждих, ихже уста глаголаша суету, и десница их десница неправды. Боже, песнь нову воспою тебе, во псалтири десятоструннем пою тебе; дающему спасенiе царeм, избавляющему Давида раба своего от меча люта. Избави мя и изми мя из руки сынов чуждих, ихже уста глаголаша суету, и десница их десница неправды; ихже сынове их яко новосаждeнiя водружeная в юности своей, дщeри их удобрeны, преукрашeны яко подобiе храма; хранилища их исполнeна, отрыгающая от сего в сiе; oвцы их многоплодны, множащыяся во исходищих своих; волове их толсти; несть паденiя оплоту, ниже прохода, ниже вопля в стогнах их. Ублажиша люди, имже сiя суть; блажени людiе, имже Господь Бог их.

Псалом 144.

Вознесу тя, Боже мой, царю мой, и благословлю имя твое в век и в век века. На всяк день благословлю тя, и восхвалю имя твое в век и в век века. Велiй Господь и хвален зело, и величiю eго несть конца. Род и род восхвалят дела твоя и силу твою возвестят; великолепiе славы святыни твоея возглаголют и чудеса твоя поведят; и силу страшных твоих рекут и величiе твое поведят; память множества благости твоея отрыгнут и правдою твоею возрадуются. Щедр и милостив Господь, долготерпелив и многомилостив. Благ Господь всячeским, и щедроты eго на всех делех eго. Да исповедятся тебе, Господи, вся дела твоя, и преподобнiи твои да благословят тя; славу цартвiя твоего рекут и силу твою возглаголют, сказати сыновом человечeским силу твою и славу великолепiя цартвiя твоего. Царство твое цартво всех веков, и владычество твое во всяком роде и роде. Верен Господь во всех словесех своих и преподобен во всех делех своих. Утверждает Господь вся низпадающыя и возставляет вся низвержeнныя. Oчи всех на тя уповают, и ты даеши им пищу во благовременiи; отверзаеши ты руку твою и исполняеши всякое животно благоволенiя. Праведен Господь во всех путех своих и прпбен во всех делех своих. Близ Господь всем призывающым eго, всем призывающым eго во истине; волю боящихся eго сотворит, и молитву их услышит, и спасет я. Хранит Господь вся любящыя eго, и вся грешники потребит. Хвалу Господню возглаголют уста моя; и да благословит всяка плоть имя святое eго в век и в век века.

Псалом 145.

Хвали, душе моя, Господа; восхвалю Господа в животе моем, пою Богу моему, дондеже eсмь. Не надейтеся на князи, на сыны человечeскiя, в нихже несть спасенiя. Изыдет дух eго, и возвратится в землю свою; в той день погибнут вся помышлeнiя eго. Блажен, eмуже Бог iаковль помощник eго, упованiе eго на Господа Бога своего, сотворшаго небо и землю, море, и вся, яже в них; хранящаго истину в век, творящаго суд обидимым, дающаго пищу алчущым. Господь решит окованныя; Господь умудряет слепцы; Господь возводит низвержeнныя; Господь любит праведники. Господь хранит пришелцы, сира и вдову прiимет, и путь грешных погубит. Воцарится Господь во век, Бог твой, Сiоне, в род и род.

Псалом 146.

Хвалите Господа, яко благ псалом; Богови нашему да усладится хваленiе. Зиждай Iерусалима Господь; разсеянiя Израилeва соберет; изцеляяй сокрушeнныя сердцем и обязуяй сокрушeнiя их; изчитаяй множество звезд, и всем им имена нарицаяй. Велiй Господь наш, и велiя крепость eго, и разума eго несть числа. Прiемляй кроткiя Господь, смиряяй же грешники до земли. Начните Господеви во исповеданiи, пойте Богови нашему в гуслех; одевающему небо облаки, уготовляющему земли дождь; прозябающему на горах траву и злак на службу человеком; дающему скотом пищу их, и птенцeм врановым призывающым eго. Не в силе констей восхощет, ниже в лыстех мужеских благоволит; благоволит Господь в боящихся eго и во уповающих на милость eго.