Текст книги "ПСАЛТИРЬ"

Автор книги: Автор Неизвестен

сообщить о нарушении

Текущая страница: 3 (всего у книги 9 страниц)

Псалом 37.

Господи, да не яростiю твоею обличиши мене, ниже гневом твоим накажеши мене; яко стрелы твоя унзоша во мне, и утвердил eси на мне руку твою. Несть изцеленiя в плоти моей от лица гнева твоего, несть мира в костех моих от лица грех моих. Яко беззаконiя моя превзыдоша главу мою, яко бремя тяжкое отяготеша на мне. Возсмердеша и согниша раны моя, от лица безумiя моего. Пострадах и слякохся до конца, весь день сетуя хождах; яко лядвiя моя наполнишася поруганiй, и несть изцеленiя в плоти моей. Озлоблен бых и смирихся до зела, рыках от воздыханiя сердца моего. Господи, пред тобою все желанiе мое, и воздыханiе мое от тебe не утаися. Сердце мое смятеся, остави мя сила моя, и свет oчiю моeю, и той несть со мною. Друзи мои и искреннiи мои прямо мне приближишася и сташа. И ближнiи мои отдалече менe сташа, и нуждахуся ищущiи душу мою; и ищущiи злая мне глаголаху суeтная, и льстивным весь день поучахуся. Аз же яко глух не слышах, и яко нем не отверзаяй уст своих; и бых яко человек не слышай и не имый во устех своих обличенiя. Яко на тя, Господи, уповах, ты услышиши, Господи Боже мой. Яко рех; да не когда порадуютмися врази мои; и внегда подвижатися ногам моим, на мя велеречеваша. Яко аз на раны готов, и болезнь моя предо мною eсть выну. Яко беззаконiе мое аз возвещу и попекуся о гресе моем. Врази же мои живут и укрепишася паче менe, и умножишася ненавидящiи мя без правды; воздающiи ми злая воз благая оболгаху мя, зане гонях благостыню. Не остави мене, Господи Боже мой, не отступи от менe; вонми в помощь мою, Господи спасенiя моего.

Псалом 38

Рех; сохраню пути моя, eже не согрешати ми языком моим; положих устом моим хранило, внегда востати грешному предо мною. Онемех и смирихся, и умолчах от благ, и болезнь моя обновися. Согреяся сердце мое во мне, и в поученiи моем разгорится oгнь; глаголах языком моим; скажи ми, Господи, кончину мою и число днiй моих, кое eсть, да разумею, что лишаюся аз. Се, пяди положил eси дни моя, и состав мой яко ничтоже пред тобою; oбаче всячeская суета всяк человек живый. Убо образом ходит человек, oбаче всуе мятется; сокровищствует, и не весть, кому соберет я. И ныне кто терпенiе мое? не Господь ли? и состав мой от тебe eсть. От всех беззаконiй моих избави мя; поношенiе безумному дал мя eси. Онемех и не отверзох уст моих, яко ты сотворил eси. Отстави от менe раны твоя; от крепости бо руки твоея аз исчезох. Во обличенiих о беззаконiи наказал eси человека, и истаял eси яко паучину душу eго; oбаче всуе всяк человек. Услыши молитву мою, Господи, и моленiе мое внуши, слез моих не премолчи; яко преселник аз eсмь у тебe и пришлец, якоже вси oтцы мои. Ослаби ми, да почiю, прежде даже не отиду, и ктому не буду.

Псалом 39.

Терпя потерпех Господа, и внят ми и услыша молитву мою; и возведе мя от рова страстей и от бренiя тины, и постави на камени нозе мои и исправи стопы моя; и вложи во уста моя песнь нову, пенiе Богу нашему. Узрят мнози и убоятся, и уповают на Господа. Блажен муж, eмуже eсть имя Господне упованiе eго, и не призре в суeты и неистовлeнiя ложная. Многа сотворил eси ты, Господи Боже мой, чудеса твоя, и помышленieм твоим несть кто уподобится тебе; возвестих и глаголах; умножишася паче числа. Жертвы и приношенiя не восхотел eси, тело же свершил ми eси; всесожженiй и о гресе не взыскал eси. Тогда рех; се, прiиду; в главизне книжне писано eсть о мне; eже сотворити волю твою, Боже мой, восхотех, и закон твой посреде чрева моего. Благовестих правду в церкви велицей, се, устнам моим не возбраню; Господи, ты разумел eси. Правду твою не скрых в сердцы моем, истину твою и спасенiе твое рех, не скрых милость твою и истину твою от сонма многа. Ты же, Господи, не удали щедрот твоих от менe; милость твоя и истина твоя выну да заступите мя. Яко одержаша мя злая, имже несть числа; постигоша мя беззаконiя моя, и не возмогох зрети; умножишася паче влас главы моея, и сердце мое остави мя. Благоволи, Господи, избавити мя; Господи, во eже помощи ми, вонми. Да постыдятся и посрамятся вкупе ищущiи душу мою, изяти ю; да возвратятся вспять и постыдятся хотящiи ми злая. Да прiимут абiе студ свой глаголющiи ми; благоже, благоже. Да возрадуются и возвеселятся о тебе вси ищущiи тебе, Господи, и да рекут выну, да возвеличится Господь, любящiи спасенiе твое. Аз же нищ eсмь и убог, Господь попечется о мне; помощник мой и защититель мой eси ты, Боже мой, не закосни.

Псалом 40.

Блажен разумеваяй на нища и убога, в день лют избавит eго Господь. Господь да сохранит eго и живит eго, и да ублажит eго на земли и да не предаст eго в руки врагов eго. Господь да поможет eму на oдре болезни eго; все ложе eго обратил eси в болезни eго. Аз рех; Господи, помилуй мя, исцели душу мою, яко согреших ти. Врази мои реша мне злая; когда умрет, и погибнет имя eго? И вхождаше видети, всуе глаголаше сердце eго; собра беззаконiе себе, исхождаше вон и глаголаше вкупе. На мя шептаху вси врази мои, на мя помышляху злая мне. Слово законопреступное возложиша на мя; eда спяй не приложит воскреснути? Ибо человек мира моего, на негоже уповах, ядый хлебы моя, возвеличи на мя запинанiе. Ты же, Господи, помилуй мя и возстави мя, и воздам им. В сем познах, яко восхотел мя eси, яко не возрадуется враг мой о мне. Мене же за незлобiе прiял, и утвердил мя eси пред тобою в век. Благословен Господь Бог Израилев от века и до века; буди, буди.

Псалом 41.

Имже образом желает eлень на источники водныя, сице желает душа моя к тебе, Боже. Возжада душа моя к Богу крепкому, живому; когда прiиду и явлюся лицу Божiю? Быша слезы моя мне хлеб день и нощь, внегда глаголатися мне на всяк день; Господе eсть Бог твой? Сiя помянух, и излiях на мя душу мою; яко пройду в место селенiя дивна, даже до дому Божiя, во гласе радованiя и исповеданiя, шума празднующаго. Вскую прискорбна eси, душе моя? и вскую смущаеши мя? уповай на Бога, яко исповемся eму, спасенiе лица моего и Бог мой. Ко мне самому душа моя смятеся; сего ради помянух тя от земли ioрдански и eрмонiимски, от горы малыя. Бездна бездну призывает во гласе хлябiй твоих; вся высоты твоя и волны твоя на мне преидоша. В день заповесть Господь милость свою, и нощiю песнь eго у менe, молитва Богу живота моего. Реку Богу; заступник мой eси, почто мя забыл eси? и вскую сетуя хожду, внегда оскорбляет враг? Внегда сокрушатися костем моим, поношаху ми врази мои, внегда глаголати им мне на всяк день; Господе eсть Бог твой? Вскую прискорбна eси, душе моя? и вскую смущаеши мя? уповай на Бога, яко исповемся eму, спасенiе лица моего и Бог мой.

Псалом 42.

Суди ми, Боже, и разсуди прю мою; от языка не преподобна, от человека неправедна и льстива избави мя. Зане ты eси, Боже, крепость моя, вскую отринул мя eси? и вскую сетуя хожду, внегда оскорбляет враг? Посли свет твой и истину твою; та мя настависта, и введоста мя в гору святую твою и в селeнiя твоя. И вниду к жертвеннику Божiю, к Богу веселящему юность мою; исповемся тебе в гуслех, Боже, Боже мой. Вскую прискорбна eси, душе моя? и вскую смущаеши мя? уповай на Бога, яко исповемся eму, спасенiе лица моего и Бог мой.

Псалом 43.

Боже, ушима нашима услышахом, и oтцы наши возвестиша нам дело, eже соделал eси во днех их, во днех древних. Рука твоя языки потреби, и насадил я eси; озлобил eси люди и изгнал eси я. Не бо мечем своим наследиша землю, и мышца их не спасе их, но десница твоя и мышца твоя и просвещенiе лица твоего, яко благоволил eси в них. Ты eси сам царь мой и Бог мой, заповедаяй спасeнiя iаковля. О тебе враги нашя избодем роги, и о имени твоем уничижим востающыя на ны. Не на лук бо мой уповаю, и мечь мой не спасет мене; спасл бо eси нас от стужающих нам, и ненавидящих нас посрамил eси. О Бозе похвалимся весь день, и о имени твоем исповемыся во век. Ныне же отринул eси и посрамил eси нас, и не изыдеши, Боже, в силах наших. Возвратил eси нас вспять при вразех наших, и ненавидящiи нас расхищаху себе. Дал eси нас яко oвцы снеди, и во языцех разсеял ны eси. Отдал eси люди твоя без цены, и не бе множество в восклицанiих наших. Положил eси нас поношенiе соседом нашым, подражненiе и поруганiе сущым окрест нас. Положил eси нас в притчу во языцех, покиванiю главы в людех. Весь день срам мой предо мною eсть, и студ лица моего покры мя, от гласа поношающаго и оклеветающаго, от лица вражiя и изгонящаго. Сiя вся прiидоша на ны, и не забыхом тебe, и не неправдовахом в завете твоем, и не отступи вспять сердце наше; и уклонил eси стези нашя от пути твоего, яко смирил eси нас на месте озлобленiя, и прикры ны сень смертная. Аще забыхом имя Бога нашего, и аще воздехом руки нашя к богу чуждему, не Бог ли взыщет сих? той бо весть тайная сердца. Зане тебe ради умерщвляемся весь день, вменихомся яко oвцы заколенiя. Востани, вскую спиши, Господи? воскрсни, и не отрини до конца. Вскую лице твое отвращаеши? забываеши нищету нашу и скорбь нашу? Яко смирися в персть душа наша, прильпе земли утроба наша. Воскрсни, Господи, помози нам, и избави нас имене ради твоего.

Псалом 44.

Отрыгну сердце мое слово благо, глаголю аз дела моя цареви; язык мой трость книжника скорописца. Красен добротою паче сынов человеческих, излiяся благодать во устнах твоих; сего ради благослови тя Бог во век. Препояши мечь твой по бедре твоей, сильне, красотою твоею и добротою твоею; и наляцы, и успевай, и царствуй истины ради и кротости и правды; и наставит тя дивно десница твоя. Стрелы твоя изощрeны, сильне; людiе под тобою падут в сердцы враг царевых. Престол твой, Боже, в век века; жезл правости жезл цартвiя твоего. Возлюбил eси правду и возненавидел eси беззаконiе; сего ради помаза тя, Боже, Бог твой eлеем радости паче причастник твоих. Смирна и стакти и касiа от риз твоих, от тяжестей слоновых, из нихже возвеселиша тя. Дщeри царей в чести твоей; предста царица одесную тебe, в ризах позлащенных одеяна преиспещрена. Слыши, дщи, и виждь, и приклони ухо твое, и забуди люди твоя и дом oтца твоего; и возжелает царь доброты твоея, зане той eсть Господь твой, и поклонишися eму, и дщи тирова с дары; лицу твоему помолятся богатiи людстiи. Вся слава дщере царевы внутрь; рясны златыми одеяна и преиспещрена. Приведутся царю девы вслед eя, искрeннiя eя приведутся тебе; приведутся в веселiи и радованiи, введутся в храм царев. Вместо oтeц твоих быша сынове твои; поставиши я князи по всей земли. Помяну имя твое во всяком роде и роде; сего ради людiе исповедятся тебе в век и во век века.

Псалом 45.

Бог нам прибежище и сила, помощник в скорбех обретших ны зело. Сего ради не убоимся, внегда смущается земля, и прелагаются горы в сердца морская. Возшумеша и смятошася воды их, смятошася горы крепостiю eго. Речная устремлeнiя веселят град Божiй; остил eсть селенiе свое вышнiй. Бог посреде eго, и не подвижится; поможет eму Бог утро заутра. Смятошася языцы, уклонишася царствiя; даде глас свой вышнiй, подвижеся земля. Господь сил с нами, заступник наш Бог iаковль. Прiидите и видите дела Божiя, яже положи чудеса на земли; отемля брани до конeц земли, лук сокрушит и сломит oружiе, и щиты сожжет oгнем. Упразднитеся и разумейте, яко аз eсмь Бог; вознесуся во языцех, вознесуся на земли. Господь сил с нами, заступник наш Бог iаковль.

Псалом 46.

Вси языцы восплещите руками, воскликните Богу гласом радованiя; яко Господь вышнiй страшен, царь велiй по всей земли; покори люди нам и языки под ноги наша; избра нам достоянiя свое, доброту iаковлю, юже возлюби. Взыде Бог в воскликновенiи, Господь во гласе трубне. Пойте Богу нашему, пойте; пойте цареви нашему, пойте. яко царь всея земли Бог, пойте разумно. Воцарися Бог над языки; Бог седит на престоле святем своем. Князи людстiи собрашася с Богом авраамлим; яко Божiи державнiи земли зело вознесошася.

Псалом 47.

Велiй Господь и хвален зело во граде Бога нашего, в горе святей eго, благокоренным радованiем всея земли; горы Сiонскiя, ребра северова, град царя великаго. Бог в тяжестех eго знаемь eсть, eгда заступает и. Яко се, царiе земстiи собрашася, снидошася вкупе; тiи видевше тако, удивишася, смятошася, подвигошася; трепет прiят я тамо, болезни яко раждающiя. Духом бурным сокрушиши корабли фарсiйскiя. Якоже слышахом, тако и видехом во граде Господа сил, во граде Бога нашего; Бог основа и в век. Прiяхом, Боже, милость твою посреде людiй твоих. По имени твоему, Боже, тако и хвала твоя на концах земли; правды исполнь десница твоя. Да возвеселится гора Сiонская, и да возрадуются дщeри iудeйскiя, судеб ради твоих, Господи. Обыдите Сiон и обымите eго, поведите в столпех eго; положите сердца ваша в силу eго, и разделите домы eго, яко да повесте в роде инем. Яко той eсть Бог наш во век и в век века; той упасет нас во веки.

Псалом 48.

Услышите сiя вси языцы, внушите, вси живущiи по вселенней, земнороднiи же и сынове человечестiи, вкупе богат и убог. Уста моя возглаголют премудрость, и поученiе сердца моего разум. Приклоню в притчу ухо мое, отверзу во псалтири гананiе мое. Вскую боюся в день лют? беззаконiе пяты моея обыдет мя. Надеющiися на силу свою и о множестве богатства своего хвалящiися; брат не избавит, избавит ли человек? не даст Богу измены за ся, и цену избавленiя души своея; и утрудися в век, и жив будет до конца, не узрит пагубы. Егда увидит премудрыя умирающыя, вкупе безумен и несмыслен погибнут, и оставят чуждим богатство свое. И гроби их жилища их во век, селeнiя их в род и род, нарекоша имена своя на землях. И человек в чести сый не разуме, приложися скотом несмыслeнным и уподобися им. Сей путь их соблазн им, и по сих во устех своих благоволят. Яко oвцы во аде положени суть, смерть упасет я; и обладают ими правiи заутра, и помощь их обетшает во аде; от славы своея изриновени быша. Oбаче Бог избавит душу мою из руки адовы, eгда прiемлет мя. Не убойся, eгда разбогатеет человек, или eгда умножится слава дому eго; яко внегда умрети eму, не возмет вся, ниже снидет с ним слава eго. Яко душа eго в животе eго благословится, исповестся тебе, eгда благосотвориши eму. Внидет даже до рода oтeц своих, даже до века не узрит света. И человек в чести сый не разуме, приложися скотом несмыслeнным и уподобися им.

Псалом 49.

Бог богов Господь ***гла, и призва землю от восток солнца до запад. От Сiона благолепiе красоты eго; Бог яве прiидет, Бог наш, и не премолчит; oгнь пред ним возгорится, и окрест eго буря зелна. Призовет небо свыше, и землю, разсудити люди своя. Соберите eму преподобныя eго, завещающыя завет eго о жертвах. И возвестят небеса правду eго; яко Бог судiя eсть. Услышите, людiе мои, и возглю вам, Израилю, и засвидетелствую тебе; Бог, Бог твой eсмь аз. Не о жертвах твоих обличу тя, всесожжeнiя же твоя предо мною суть выну; не прiиму от дому твоего телцeв, ниже от стад твоих козлов. Яко мои суть вси зверiе дубравнiи, скоти в горах и волове; познах вся птицы небeсныя, и красота селная со мною eсть. Аще взалчу, не реку тебе; моя бо eсть вселенная и исполненiе eя. Еда ям мяса юнча? или кровь козлов пiю? Пожри Богови жертву хвалы и воздаждь вышнему молитвы твоя; и призови мя в день скорби твоея, и изму тя, и прославиши мя. Грешнику же рече Бог; вскую ты поведаеши оправданiя моя и воспрiемлеши завет мой усты твоими? Ты же возненавидел eси наказанiе и отвергл eси словеса моя вспять. Аще видел eси татя, текл eси с ним, и с прелюбодеем участiе твое полагал eси; уста твоя умножиша злобу, и язык твой сплеташе льщeнiя; седя на брата твоего клеветал eси и на сына матере твоея полагал eси соблазн. Сiя сотворил eси, и умолчах, вознепщевал eси беззаконiе, яко буду тебе подобен; обличу тя и представлю пред лицем твоим грехи твоя. Разумейте убо сiя, забывающiи Бога, да не когда похитит, и не будет избавляяй. Жертва хвалы прославит мя, и тамо путь, имже явлю eму спасенiе мое.

Псалом 50.

Помилуй мя, Боже, по велицей милости твоей, и по множеству щедрот твоих очисти беззаконiе мое. Наипаче омый мя от беззаконiя моего и от греха моего очисти мя; яко беззаконiе мое аз знаю, и грех мой предо мною eсть выну. Тебе eдиному согреших и лукавое пред тобою сотворих; яко да оправдишися во словесех твоих и победиши, внегда судити ти. Се бо, в беззаконiих зачат eсмь, и во гресех роди мя мати моя. Се бо, истину возлюбил eси, безвестная и тайная премудрости твоея явил ми eси. Окропиши мя иссопом, и очищуся; омыеши мя, и паче снега убелюся. Слуху моему даси радость и веселiе; возрадуются кости смирeнныя. Отврати лице твое от грех моих и вся беззаконiя моя очисти. Сердце чисто созижди во мне, Боже, и дух прав обнови во утробе моей. Не отвержи менe от лица твоего и дха твоего святаго не отими от менe. Воздаждь ми радость спасенiя твоего и дхом влчним утверди мя. Научу беззаконныя путeм твоим, и нечестивiи к тебе обратятся. Избави мя от кровей, Боже, Боже спасенiя моего; возрадуется язык мой правде твоей. Господи, устне мои отверзеши, и уста моя возвестят хвалу твою. Яко аще бы восхотел eси жертвы, дал бых убо; всесожжeнiя не благоволиши. Жертва Богу дух сокрушен; сердце сокрушенно и смиренно Бог не уничижит. Ублажи, Господи, благоволенiем твоим Сiона, и да созиждутся стены Iерусалимскiя; тогда благоволиши жертву правды, возношенiе и всесожегаeмая; тогда возложат на oлтарь твой телцы.

Псалом 51.

Что хвалишися во злобе, сильне? беззаконiе весь день. неправду умысли язык твой; яко бритву изощрену сотворил eси лесть. Возлюбил eси злобу паче благостыни, неправду неже глаголати правду; возлюбил eси вся глаголы потопныя, язык льстив. Сего ради Бог разрушит тя до конца; восторгнет тя, и преселит тя от селенiя твоего и корень твой от земли живых. Узрят праведнiи и убоятся, и о нем возсмеются и рекут; се, человек, иже не положи Бога помощника себе, но упова на множество богатства своего, и возможе суетою своею. Аз же яко маслина плодовита в дому Божiи; уповах на милость Божiю во век и в век века. Исповемся тебе в век, яко сотворил eси; и терплю имя твое, яко благо пред преподобными твоими.

Псалом 52.

Рече безумен в сердцы своем; несть Бог. Растлеша и омерзишася в беззаконiих, несть творяй благое. Бог с небесе приниче на сыны человечeскiя, видети, аще eсть разумеваяй или взыскаяй Бога. Вси уклонишася, вкупе непотребни быша; несть творяй благое, несть до eдинаго. Ни ли уразумеют вси делающiи беззаконiе, снедающiи люди моя в снедь хлеба? Господа не призваша. Тамо устрашишася страха, идеже не бе страх; яко Бог разсыпа кости человекоугодников; постыдешася, яко Бог уничижи их. Кто даст от Сiона спасенiе Израилево? внегда возвратит Бог плененiе людiй своих, возрадуется iаков и возвеселится Израиль.

Псалом 53.

Боже, во имя твое спаси мя и в силе твоей суди ми. Боже, услыши молитву мою, внуши глаголы уст моих; яко чуждiи восташа на мя, и крепцыи взыскаша душу мою, и не предложиша Бога пред собою. Се бо, Бог помогает ми, и Господь заступник души моей; отвратит злая врагом моим; истиною твоею потреби их. Волею пожру тебе, исповемся имени твоему, Господи, яко благо; яко от всякiя печали избавил мя eси, и на враги моя воззре oко мое.

Псалом 54.

Внуши, Боже, молитву мою и не презри моленiя моего; вонми ми и услыши мя; возскорбех печалiю моею, и смятохся от гласа вражiя и от стуженiя грешнича; яко уклониша на мя беззаконiе и во гневе враждоваху ми. Сердце мое смятеся во мне, и боязнь смерти нападе на мя; страх и трепет прiиде на мя, и покры мя тма. И рех; кто даст ми криле яко голубине? и полещу, и почiю. Се, удалихся бегая и водворихся в пустыни. Чаях Бога спасающаго мя от малодушiя и от бури. Потопи, Господи, и раздели языки их; яко видех беззаконiе и пререканiе во граде. Днем и нощiю обыдет и по стенам eго; беззаконiе и труд посреде eго, и неправда; и не оскуде от стогн eго лихва и лесть. Яко аще бы враг поносил ми, претерпел бых убо; и аще бы ненавидяй мя на мя велеречевал, укрылбыхся от него. Ты же, человече равнодушне, владыко мой и знаемый мой, иже купно наслаждался eси со мною брашен; в дому Божiи ходихом eдиномышленiем. Да прiидет же смерть на ня, и да снидут во ад живи; яко лукавство в жилищих их, посреде их. Аз к Богу воззвах, и Господь услыша мя. Вечер и заутра и полудне повем и возвещу, и услышит глас мой. Избавит миром душу мою от приближающихся мне; яко во мнозе бяху со мною. Услышит Бог, и смирит я сый прежде век; несть бо им измененiя, яко не убояшася Бога. Простре руку свою на воздаянiе; оскверниша завет eго. Разделишася от гнева лица eго, и приближишася сердца их; умякнуша словеса их паче eлеа, и та суть стрелы. Возверзи на Господа печаль твою, и той тя препитает; не даст в век молвы праведнику. Ты же, Боже, низведеши их в студенец истленiя; мужiе кровей и льсти не преполовят днiй своих. Аз же, Господи, уповаю на тя.