Текст книги "Текст Праздничной минеи на церковнославянском языке"

Автор книги: Автор Неизвестен

сообщить о нарушении

Текущая страница: 26 (всего у книги 38 страниц)

Слава, глас 8. Иоанна монаха:

Го́споди, испо́лнити хотя́, / я́же уста́вил eси́ от ве́ка, / от всея́ тва́ри служи́тeли та́йны Твоея́ прия́л eси́: / от А́нгел – Гаврии́ла, от челове́к – Де́ву, / от Небе́с – звезду́ и от вод – Иoрда́н, / в не́мже беззако́ние мирско́е потреби́л eси́, / Спа́се наш, сла́ва Тебе́.

И ныне, глас тойже. Анатолиево:

Днесь всяка тварь просвеща́ется, / днесь вся́чeская веселя́тся, / Небе́сная вку́пе и земна́я, / А́нгели и челове́цы смеша́ются, / иде́же бо Царе́во прише́ствие, и чин прихо́дит. / Теце́м у́бо на Иoрда́н / и ви́дим вси Иоа́нна: / ка́ко креща́ет Верх Нерукотворе́нный и Безгре́шный? / Те́мже, апо́стольский глас припева́юще, согла́сно возопие́м: / яви́ся благода́ть Бо́жия спаси́тельная всем челове́ком, / озаря́ющи и подаю́щи ве́рным ве́лию ми́лость.

На стиховне стихиры самогласны, глас 2.

Анатолиево: На Иoрда́нстей реце́ / ви́дев Тя Иоа́нн, к себе́ гряду́ща, глаго́лаше: / Христе́ Бо́же, что к рабу́ прише́л eси́, / скве́рны не имы́й, Го́споди? / Во и́мя же чие́ Тя крещу́? / Oтца́? Но Того́ но́сиши в Себе́. / Сы́на? Но Сам eси́ воплоти́выйся. / Ду́ха Свята́го? / И Сего́ ве́си дая́ти ве́рным усты́. / Явле́йся Бо́же, поми́луй нас.

Стих: Мо́ре ви́де и побеже́, / Иoрда́н возврати́ся вспять.

Ви́деша Тя во́ды, Бо́же, / ви́деша Тя во́ды и убоя́шася: / к Твое́й бо сла́ве противозре́ти Херуви́ми не мо́гут, / ниже́ взира́ти Серафи́ми, / но, со стра́хом предстоя́ще, / óвии у́бо но́сят, / óвии же сла́вят си́лу Твою́. / С ни́миже, Ще́дре, возвеща́ем хвалу́ Твою́, глаго́люще: / явле́йся Бо́же, поми́луй нас.

Стих: Что ти eсть мо́ре, я́ко побе́гло eси́? / И тебе́, Иoрда́не, я́ко возврати́лся eси́ вспять?

Днесь Небесе́ и земли́ Творе́ц / прихо́дит пло́тию на Иoрда́н, / Креще́ния прося́ Безгре́шный, / да очи́стит мир от ле́сти вра́жия, / и креща́ется от раба́ Влады́ка вся́ческих, / и очище́ние водо́ю ро́ду челове́ческому да́рует. / Тому́ возопие́м: / явле́йся Бо́же наш, сла́ва Тебе́.

Слава, и ныне, глас 6. Феофаново:

Е́же от Де́вы Со́лнце, / ви́дя и́же от непло́дове свети́льник све́тлый, / во Иoрда́не прося́ща Креще́ния, / у́жасом и ра́достию вопия́ше к Нему́: / Ты мя освяти́, Влады́ко, / Боже́ственным явле́нием Твои́м.

Таже, Ны́не отпуща́еши: Трисвятое. И по О́тче наш:

Тропарь праздника, глас 1:

Во Иoрда́не креща́ющуся Тебе́, Го́споди, / Тро́йческое яви́ся поклоне́ние: / Роди́телев бо глас свиде́тельствоваше Тебе́, / возлю́бленнаго Тя Сы́на имену́я, / и Дух в ви́де голуби́не / изве́ствоваше словесе́ утвержде́ние. / Явле́йся Христе́ Бо́же / и мир просвеще́й, сла́ва Тебе́. (3)

И благословение хлебов по обычаю.

Таже, Бу́ди И́мя Госпо́дне: трижды. И псалом: Благословлю́ Го́спода на вся́кое вре́мя: до: не лиша́тся вся́каго бла́га.

И чтение праздника.

По чтении же и по шестопсалмии, на Бог Госпо́дь: тропарь праздника, трижды, и обычныя стихологии.

По 1–й стихологии седален, глас 3.

Подобен: Красоте́:

Я́вльшуся Тебе́ во Иорда́не, Спа́се, / и кре́щшуся Тебе́ от Предте́чи, Христе́, / возлю́бленный Сын свиде́тельствован был еси́, / те́мже и Собезнача́лен Отцу́ яви́лся еси́, / Дух же Святы́й на Тя схожда́ше, / И́мже и просвети́вшеся, вопие́м: / сла́ву Бо́гу, Су́щему в Тро́ице.

Слава, и ныне, глас 4.

Подобен: Ско́ро предвари́:

Струи́ освяти́л еси́ Иорда́нския, / держа́ву сокруши́л еси́ грехо́вную, Христе́ Бо́же наш, / приклони́л еси́ дла́ни Себе́ Предте́чеве / и спасл еси́ от ле́сти челове́ческий род. / Те́мже Тя мо́лим: спаси́ ду́ши на́ша.

И чтение праздника.

По 2–й стихологии седален, глас 5.

Подобен: Собезнача́льное Сло́во:

Иорда́нскими струя́ми обло́жся, / И́же све́том пресла́вно одева́яйся, / в ни́хже Ада́мово естество́ обнови́л еси́, / сокру́шшееся злым преслуша́нием, Сло́ве Бо́жий. / Те́мже Тя восхваля́ем и свято́е Твое́ вси славосло́вим явле́ние.

Слава, и ныне, глас 4.

Подобен: Удиви́ся Ио́сиф:

Иорда́не реко́, / что удиви́лся еси́, зря Неви́димаго на́га? / Ви́дех и вострепета́х, – рече́, – / и ка́ко бо Сего́ не хоте́х устраши́тися и зайти́? / А́нгели Его́ устраши́шася, зря́ще, / ужасе́ся Не́бо, и земля́ вострепета́, / и смяте́ся мо́ре, и вся ви́димая и неви́димая. / Христо́с яви́ся на Иорда́не освяти́ти во́ды.

И чтение праздника.

Величание:

Велича́ем Тя, / Живода́вче Христе́, / нас ра́ди ны́не пло́тию крести́вшагося / от Иоа́нна в вода́х Иорда́нских.

Псалом избранный:

Бо́же, уще́дри ны, и благослови́ ны. / Просвети́ лице́ Твое́ на ны, поми́луй ны. / Приступи́те к Нему́ и просвети́теся, / И ли́ца ва́ша не постыдя́тся. / Ре́чная устремле́ния веселя́т град Бо́жий. / Глас Госпо́день на вода́х. / Госпо́дь на вода́х мно́гих. / Взя́ша ре́ки, Го́споди, взя́ша ре́ки гла́сы своя́, / От гласо́в вод мно́гих. / Сего́ ра́ди помяну́х Тя от земли́ Иорда́нски и Ермонии́мски. / Я́ко у Тебе́ исто́чник живота́, во све́те Твое́м у́зрим свет. / Мо́ре ви́де и побеже́, Иорда́н возврати́ся вспять. / Ты утверди́л еси́ си́лою Твое́ю мо́ре. / Ты стерл еси́ главы́ змие́в в воде́. / Ты расто́ргл еси́ исто́чники и пото́ки. / Ви́деша Тя во́ды, Бо́же, ви́деша Тя во́ды, и убоя́шася. / В мо́ри путие́ Твои́, и стези́ Твоя́ в вода́х мно́гих. / Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́ия (3).

По полиелеи седален, глас 4.

Подобен: Удиви́ся Ио́сиф:

Прииди́те, уви́дим, ве́рнии, где крести́ся Христо́с, / да после́дуим про́чее ко Иорда́ну реце́, / ко гла́су вопию́щаго в пусты́ни, / и уви́дим та́мо Соде́теля Ада́мова, / дла́нию ра́бскою рукополага́ема за благоутро́бие неизрече́нное, / и к Нему́ велегла́сно возопии́м: / прише́л еси́ и яви́лся еси́ во Иорда́не освяти́ти во́ды.

Слава, и ныне, тойже, и чтение.

Степенна, 1–й антифон 4–го гласа.

Прокимен, глас 4: Мо́ре ви́де и побеже́, / Иорда́н возврати́ся вспять. Стих: Что ти есть, мо́ре, я́ко побе́гло еси́, и тебе́, Иорда́не, я́ко возврати́лся еси́ вспять?

Вся́кое дыха́ние:

Евангелие от Марка (зачало 2):

Во вре́мя о́но прии́де Иису́с от Назаре́та Галиле́йскаго и крестися от Иоанна во Иордане. И а́бие восходя́ от воды́, ви́де разводя́щася Небеса́ и Дух, я́ко го́лубь, сходя́щ Нань. И глас бысть с Небесе́: Ты еси́ Сын Мой возлю́бленный, о Не́мже благоволи́х.

По 50–м псалме, слава, глас 2:

Вся́ческая днесь да возра́дуются, / Христу́ я́вльшуся во Иорда́не.

И ныне, тойже.

Таже, стихира самогласна, глас 6:

Бог Сло́во яви́ся пло́тию ро́ду челове́ческому, / стоя́ше крести́тися во Иорда́не, / и глаго́лаше к Нему́ Предте́ча: / ка́ко простру́ ру́ку / и прикосну́ся верху́ Держа́щаго вся́ческая? / А́ще и от Мари́и еси́ Младе́нец, / но вем Тя, Бо́га Преве́чнаго, / по земли́ хо́диши, пева́емый от Серафи́м, / и раб Влады́ку креща́ти не научи́хся. / Непостижи́ме Го́споди, сла́ва Тебе́.

Каноны два: ирмосы обою канонов по дважды, тропари на 12, последи же первый лик перваго канона ирмос, вторый лик 2–го канона ирмос.

Канон первый, творение кир Космы монаха, егоже краегранесие: Креще́ние очище́ние земноро́дных грехо́в. Глас 2.

Песнь 1:

Ирмос: Глубины́ откры́л есть дно / и су́шею Своя́ влече́т, / в ней покры́в проти́вныя, / кре́пкий во бране́х Госпо́дь, / я́ко просла́вися.

Ада́ма истле́вшаго обновля́ет струя́ми Иорда́нскими / и змие́в главы́ гнездя́щихся сокруша́ет Царь веко́в, Госпо́дь, / я́ко просла́вися.

Огне́м Божества́ Невеще́ственным / в плоть веще́ственну оде́явся, Иорда́нскою облага́ется водо́ю / воплоще́йся от Де́вы Госпо́дь, я́ко просла́вися.

Скве́рну омыва́яй челове́ков, сим очи́щся во Иорда́не, / и́мже, восхоте́в, уподо́бися, е́же бе пребы́в, / су́щия во тьме просвеща́яй Госпо́дь, я́ко просла́вися.

Ин канон, творение Иоанна Дамаскина, глас 2:

Ирмос: Ше́ствует морску́ю волня́щуюся бу́рю, / су́шу а́бие Изра́иль я́вльшуюся. / Че́рмный же понт триста́ты еги́петския / покры ку́пно, водостла́нен гроб, / си́лою кре́пкою десни́цы Влады́чни.

У́тру я́вльшуся челове́ком светоно́сну / ны́не из пусты́ни, к вода́м Иорда́нским преклони́л еси́, Царю́ со́лнца, Твою́ вы́ю, / ли́ка мра́чна родонача́льника исхи́тити, / скве́рны же вся́кия очи́стити тварь.

Безнача́льне, струя́м спогре́бшася Тебе́, Сло́ве, / но́ваго прево́диши, истле́вшаго ле́стию, / Сего́ несказа́нно от Отца́ прие́м глас держа́вен: / Сей возлю́бленный, ра́вен же Мне О́трок естество́м.

Песнь 3:

Ирмос: Кре́пость дая́й царе́м на́шим Госпо́дь / и рог пома́занных Свои́х вознося́й / от Де́вы ражда́ется, гряде́т же ко Креще́нию. / Тому́, ве́рнии, возопие́м: / несть свят, я́ко Бог наш.

Непло́дная дре́вле и безча́дная лю́те, днесь весели́ся, Христо́ва Це́рковь: / водо́ю бо и Ду́хом сы́нове тебе́ роди́шася, ве́рою взыва́юще: / несть свят, я́коже Бог наш.

Ве́лиим гла́сом в пусты́ни вопие́т Предте́ча: / Христу́ угото́вайте пути́ / и стези́ Бо́гу на́шему пра́вы соде́лайте, ве́рою взыва́юще: / несть свят, я́коже Бог наш.

Ин:

Ирмос: Ели́цы дре́вних изреши́хомся се́тей / бра́шен львов, сотре́нных члено́вными, / ра́дуимся и разшири́м уста́, / сло́во плету́ще от слове́с сладкопе́ния, / и́мже к нам наслажда́ется дарова́ний.

Умерщвле́ние пе́рвее насади́вый тва́ри, / зве́ря злоде́йственнаго вообра́жься в естество́, / омрача́ется плотски́м прише́ствием: / у́тру я́вльшуся, прирази́вся Влады́це сокруши́ти свою́ вражде́бную главу́.

Влече́т к себе́ Богозда́нное естество́, утро́бы мучи́теля, погребе́нное преде́лы; / ражда́ется па́ки земноро́дных Обновле́ние, / де́ло держа́вно соверша́я Влады́ка: / прии́де бо, то́е очи́стити хотя́.

Ипакои, глас 5:

Егда́ явле́нием Твои́м просвети́л еси́ вся́ческая, / тогда́ сла́ное неве́рия мо́ре побеже́, / и Иорда́н, до́ле теки́й, возврати́ся, / к Небеси́ возвыша́я нас. / Но высото́ю Боже́ственных за́поведей Твои́х / соблюди́, Христе́ Бо́же, моли́твами Богоро́дицы и поми́луй нас.

Песнь 4:

Ирмос: Услы́шах, Го́споди, глас Твой, его́же рекл еси́, / глас вопию́щаго в пусты́ни, / я́ко возгреме́л еси́ над вода́ми мно́гими, / Твоему́ свиде́тельствуяй Сы́ну, / весь быв соше́дшаго Ду́ха, возопи́: / Ты еси́ Христо́с, Бо́жия му́дрость и си́ла.

Очища́емо со́лнце кто ви́де, – / пропове́дник вопие́т, – пресве́тлое естество́м? / Да Тебе́ вода́ми, сия́ние Сла́вы, Отца́ о́браз Присносу́щнаго, омы́ю / и, се́но сый, Огню́ прикосну́ся Твоего́ Божества́? / Ты бо еси́ Христо́с, Бо́жия му́дрость и си́ла.

Яви́ Боже́ственное, е́же име́, благогове́ние Моисе́й, прилучи́вся Тебе́, / я́ко бо из купины́ Тя, возгласи́вша, разуме́, а́бие отврати́ лице́. / Аз же ка́ко Тя уви́жу я́сно? / Или́ ка́ко руку́ положу́ на Тя? / Ты бо еси́ Христо́с, Бо́жия му́дрость и си́ла.

Душе́вное соверша́я му́дре и сло́вом почте́нный, безду́шных стыжду́ся. / А́ще бо крещу́ Тя, клеве́тна ми есть огне́м дымя́щаяся гора́, / побе́гшее же мо́ре на дво́е и Иорда́н сей, возврати́выйся: / Ты бо еси́ Христо́с, Бо́жия му́дрость и си́ла.

Ин:

Ирмос: Огне́м очи́щся та́йнаго зре́ния, / поя́ проро́к челове́ков новоде́йство, / возглаша́ет глас, Ду́хом пле́щущ, / воплоще́ние явля́ющ неизрече́нна Сло́ва, / И́мже си́льных держа́вы сотро́шася.

По́слан от Отца́, всесве́тлое Сло́во, но́щи отгна́ти зломра́чное стремле́ние, / и искорени́ти гряде́ши челове́ков грехи́, / сы́ны же привлещи́, Твои́м Креще́нием, Бла́же, / све́тлы от струй Иорда́нских.

Са́мое прови́дев нарече́нное Сло́во, я́сно пропове́дник вопие́т тва́ри: / Сей пре́жде мене́, вторы́й пло́тию сообра́зен, / просия́ Боже́ственною си́лою вражде́бный наш отъя́ти грех.

Па́жить у Себе́ животво́рну нося́, уловля́ет змие́в, / гне́здам натека́я мно́гими сетьми́, низлага́я, Бог Сло́во, / запина́ет же уязви́вшаго всеми́рный род, / сего́ потре́бль, избавля́ет тварь.

Песнь 5:

Ирмос: Иису́с, живота́ Нача́льник, / разреши́ти осужде́ние гряде́т Ада́ма первозда́ннаго, / очище́ний же, я́ко Бог, не тре́буя, / па́дшаго очища́ет во Иорда́не, / в не́мже вражду́ уби́в, / преиму́щ всяк ум мир да́рует.

Сше́дшимся без числа́ лю́дем от Иоа́нна крести́тися, сам посреде́ их ста. / Провозгласи́ же предстоя́щим: / кто показа́, непокори́вии, гне́ва вам уклони́тися, хотя́щаго бы́ти? / Плоды́ досто́йны Христу́ сотвори́те: / Предстоя́й бо ны́не мир да́рует.

Де́латель и Зижди́тель, посреде́ стоя́й, я́ко Еди́н всех сердца́ испыту́ет, / чисти́тельную же лопа́ту руко́ю прие́м, / всеми́рное гумно́ всему́дре разлуча́ет, непло́дие паля́, / благопло́дным ве́чный живо́т да́рует.

Ин:

Ирмос: Врага́ те́мнаго и оскверне́ннаго я́да / очище́нием Ду́ха измове́ни, / к но́вой приста́хом небла́зненной стези́, / вводя́щей в непристу́пную ра́дость, Еди́нем присту́пну, / и́мже Бог примири́ся.

Ви́дев Зижди́тель во мра́це прегреше́ний плени́цами неизбе́жными / его́же вообрази́ персты́, поставля́ет на обою́ ра́му, воздвиг горе́, ны́не во многотеку́щих вода́х омыва́я студа́ дре́вняго / Ада́мова зла́го нра́ва.

Со благоче́стием притеце́м приле́жно ко исто́чником пречи́стым тече́ния спаси́тельнаго, / Сло́во усмотря́юще от Нетле́нныя, / почерпа́ла принося́ще жа́жди Боже́ственныя, / ми́ра сла́достне исцеля́я неду́г.

Песнь 6:

Ирмос: Глас Словесе́, свети́льник Све́та, / денни́ца Со́лнца, Предте́ча в пусты́ни, – / пока́йтеся́ – всем вопие́т лю́дем, – и предочи́ститеся: / се бо предстои́т Христо́с, / от тли мир избавля́яй.

Ро́ждься нетле́нно от Бо́га и Отца́, / от Де́вы кроме́ скве́рны воплоща́ется Христо́с, / Ему́же реме́нь, я́же от нас Сло́ва сочта́ния, разреши́ти неудо́б, учи́т Предте́ча, / земноро́дныя от ле́сти избавля́я.

Огне́м крести́т коне́чным Христо́с проти́вныя, / а не Бо́га му́дрствующих Его́, / Ду́хом же обновля́ет водо́ю благода́ти разумли́выя Божества́ Его́, / от прегреше́ний избавля́я.

Ин:

Ирмос: Вожделе́ннаго я́вствова со всеблаже́нным гла́сом Оте́ц, / Его́же из чре́ва отры́гну: / ей, – глаго́лет, – Сей соесте́ствен Сын, / Сый светоза́рен, / произни́че из челове́ча ро́да: / Сло́во же Мое́ жи́во и Челове́к промышле́нием.

От глуби́ннаго льва, тревече́рний стра́нне проро́к во вну́тренних валя́яся, / а́бие произы́де, пакибытия́ спасе́ние / от зми́я человекоуби́йцы всем предъявля́я в после́дняя ле́та.

Отве́рсту Не́бу всесве́тлых писа́ний, учени́к зрит от Отца́ посыла́емый, / пребыва́ющ же Дух на Пречи́стем Сло́ве, / наше́д я́ко го́лубь неизрече́нным о́бразом, / лю́дем же явля́ется, прише́дшим ко Влады́це.

Кондак, глас 4:

Яви́лся еси́ днесь вселе́нней, / и свет Твой, Го́споди, зна́менася на нас, / в ра́зуме пою́щих Тя: / прише́л еси́ и яви́лся еси́, / Свет Непристу́пный.

Икос: Галиле́и язы́честей, Завуло́нстей стране́ и Неффали́мстей земли́, / я́коже рече́ проро́к, Свет вели́к возсия́, Христо́с. / Омраче́нным све́тла яви́ся Заря́, из Вифлее́ма облиста́ющая, / па́че же из Мари́и Госпо́дь, всей вселе́нней возсиява́ет лучи́ Со́лнце пра́вды. / Те́мже, и́же от Ада́ма нази́и, прииди́те вси, облече́мся в Него́, да согре́емся, / покрыва́ет бо наги́я и просвеща́ет те́мныя. / Прише́л еси́ и яви́лся еси́, Свет Непристу́пный.

Песнь 7:

Ирмос: Ю́ноши благочести́выя, пе́щи о́гненней приобщи́вшияся, / шумя́щ дух ро́сный невреди́мы сохрани́ / и Бо́жия А́нгела снизхожде́ние. / Те́мже, в пла́мени ороша́еми, благода́рственно воспева́ху: / препе́тый отце́в Го́споди и Бо́же, благослове́н еси́.

Я́коже на Небеси́, с тре́петом и чу́дом предстоя́ху / во Иорда́не си́лы А́нгельския, смотря́юще толи́ка Бо́жия схожде́ния: / я́ко Держа́й превы́шних вод соста́в, в вода́х Плотоно́сец стоя́ше, / Бог отце́в на́ших.

О́блак дре́вле и мо́ре Боже́ственнаго прообража́ху Креще́ния чу́до, / в ни́хже дре́внии крести́шася, исходя́ще зако́ннии лю́дие. / Мо́ре же бе о́браз воды́, и о́блак – Ду́ха. / И́миже соверша́еми, – благослове́н еси́, – зове́м, – Го́споди Бо́же, во ве́ки.

Вси ве́рнии, в Не́мже соверше́ние прия́хом, / богосло́вяще немо́лчно со А́нгелы, просла́вим Отца́, и Сы́на, и Ду́ха Свята́го: / се бо – Тро́ица, Ипоста́сьми Единосу́щная, Еди́н же Бог. / Ему́же пое́м: благослове́н еси́, Го́споди Бо́же, во ве́ки.

Ин:

Ирмос: Опали́ струе́ю зми́евы главы́ пе́щный высо́кий пла́мень, / ю́ноши нося́щ благочести́выя, / ути́шивый неудободержи́мую мглу из греха́ / всю же омыва́ет росо́ю Ду́ха.

Тебе́ живопису́ющий ассири́йский пла́мень ужа́сен поставля́еши, в ро́су преведе́н; / те́мже вода́ ны́не, я́коже пла́мень, одева́яй, вре́дную зло́бу, Христе́, прикрове́нную опаля́ет, / от поползнове́нныя стези́ призыва́ющи.

Разде́льшуся Иорда́ну дре́вле, по су́ху прехо́дят лю́дие Изра́ильстии, / Тебе́, Держа́внейшаго, содержа́ща тварь некосни́тельне, / ны́не в вода́х напису́ющии, к нетле́нней и поле́зней стези́.

Ве́мы, пе́рвее всепа́губный пото́п / ми́лостивно Тя всех во тлю привести́, / о, тревели́кия сотворя́я и стра́нная́ / Ны́не же пото́пльша, Христе́, грех за благосе́рдие и челове́ческое спасе́ние.

Песнь 8:

Ирмос: Та́йну пресла́вную вавило́нская показа́ пещь, / источи́вшая ро́су, / я́ко струя́ми имя́ше невеще́ственный Огнь восприя́ти Иорда́н / и объя́ти пло́тию креща́ема Зижди́теля, / Его́же благословя́т лю́дие и превозно́сят во вся ве́ки.

Отложи́ страх весь, – Изба́витель Предте́чи рече́, – / Мне же повини́ся, я́ко Благо́му, / Мне приступи́, сие́ бо естество́м бых, / Мои́м повеле́нием покори́ся и крести́ Мя, соше́дшаго, / Его́же благословя́т лю́дие и превозно́сят во вся ве́ки.

Глаго́лы я́коже услы́ша Крести́тель Влады́чни, с тре́петом длань простира́ет, / оба́че же, руко́ю косну́вся верху́ Зижди́теля своего́, Кре́щшемуся вопия́ше: / освяти́ мя, Ты бо еси Бог мой, / Его́же благословя́т лю́дие и превозно́сят во вся ве́ки.

Тро́ицы явле́ние во Иорда́не бысть, / са́мое бо Пребоже́ственное Естество́, Оте́ц, возгласи́: / Сей креща́емый – Сын возлю́бленный Мой, / Дух же прии́де к Подо́бному, / Его́же благословя́т лю́дие и превозно́сят во вся ве́ки.

Ин:

Ирмос: Свобо́дна у́бо тварь познава́ется / и сы́нове Све́та пре́жде омраче́ннии; / еди́н сте́нет тьмы предста́тель. / Ны́не да благослови́т усе́рдно Вино́внаго / пре́жде окая́нное язы́ков всенасле́дие.

Трие́ Богови́днии, во огни́ ороша́еми, озаря́ющеся треми́ всесве́тле святы́нями, / я́ве показова́ху Превы́шнее Естество́ смеше́нием челове́ческим, / огнепаля́щее росо́ю ми́лостивно вся́ку па́губную лесть.

Да убели́тся вся́кое земно́е естество́, / от паде́ния ны́не на Не́бо возводи́мо, / И́мже бо вся соблюда́ются, Сло́вом, теку́щими струя́ми омы́вшеся, / прегреше́ний пре́жних убеже́, пресве́тло измове́но.

На 9–й песни паки вжигают свещи братия. Честне́йшую: не поем, но поем припевы праздника:

Велича́й, душе́ моя́, / Честне́йшую го́рних во́инств, / Де́ву Пречи́стую Богоро́дицу.

И ирмос: Недоуме́ет всяк язы́к благохвали́ти по достоя́нию, / изумева́ет же ум и преми́рный пе́ти Тя, Богоро́дице, / оба́че, Блага́я су́щи, ве́ру приими́, / и́бо любо́вь ве́си Боже́ственную на́шу: / Ты бо христиа́н еси́ Предста́тельница, Тя велича́ем.

Посем вторый лик поет тойже припев и ирмос. И прочих шесть припевов припевают на кийждо тропарь по единожды:

Велича́й, душе́ моя́, / от Предте́чи Креще́ния Прося́ща.

Велича́й, душе́ моя́, / во Иорда́не Прише́дшаго крести́тися.

Дави́де, прииди́ Ду́хом к просвеще́нным, – / ны́не приступи́те, – пой к Бо́гу, – / ве́рою, – глаго́ля, – просвети́теся́ / Сей ни́щий воззва́ Ада́м в паде́нии, и́бо Того́ услы́ша Госпо́дь, / прише́д, струя́ми Иорда́нскими тле́ннаго же обнови́.

Велича́й, душе́ моя́, / от Оте́ческаго гла́са Свиде́тельствованна.

Велича́й, душе́ моя́, / Еди́наго от Тро́ицы, прекло́ньшаго вы́ю и Креще́ние прие́мша.

Иса́ия, – измы́йтеся, очи́ститеся́ – глаго́лет, – / лука́вствия пред Го́сподем оста́вите. / Жа́ждущии, на во́ду жи́ву иди́те: / кропи́т бо водо́ю, обновля́я, Христо́с приступа́ющия к Нему́ ве́рою / и к животу́ нестаре́емому креща́ет Ду́хом.

Проро́че, прииди́ ко Мне, / простри́ ру́ку и крести́ Мя ско́ро.

Проро́че, оста́ви ны́не и крести́ Мя, хотя́ща: / испо́лнити бо приидо́х вся́ку пра́вду.

Соблюда́емся благода́тию, ве́рнии, и печа́тию. / Я́ко бо губи́теля, бежа́ша пра́га евре́и, дре́вле окрова́влена, / та́ко и нам исхо́дное Боже́ственное сие́ пакибытия́ ба́ня бу́дет. / Отсю́ду и Тро́ицы у́зрим Свет Незаходи́мый.

Посем первый лик поет втораго канона припев:

Днесь Влады́ка / преклоня́ет вы́ю под ру́ку Предте́чеву.

И ирмос: О, па́че ума́ Рождества́ Твоего́ чуде́с́ / Неве́сто Всечи́стая, Ма́ти Благослове́нная, / Е́юже получи́вше всесоверше́нное спасе́ние, / досто́йно хва́лим, я́ко Благоде́теля, / дар нося́ще – песнь благодаре́ния.

И вторый лик такожде поет припев и ирмос. И прочия пять припевы, един дважды:

Днесь Иоа́нн креща́ет Влады́ку, / во струя́х Иорда́нских.

Днесь Влады́ка / вода́ми погреба́ет челове́ческий грех.

Уве́дехом Моисе́ю купино́ю явле́нная, гряди́, стра́нными уста́вы соде́ланная: / я́ко бо спасе́ся, Огнь нося́щи, Де́ва, Светоно́сна ро́ждши Благоде́теля, / во Иорда́нских же струя́х явле́нна.

Днесь Влады́ка свы́ше свиде́тельствуется, / Сын возлю́бленный.

Днесь Влады́ка / прии́де освяти́ти естество́ водно́е.

Днесь Влады́ка / Креще́ние прие́млет руко́ю Предте́чевою.

Помазу́еши, соверша́я челове́ческое существо́, Царю́ Безнача́льне, / Ду́ха обще́нием, струя́ми чи́стыми отмы́в / и тьмы кре́пость же посра́мль возвы́шенную, / ны́не в безпреста́ннем возда́ти житии́.

Таже оба лика, сошедшеся вкупе, поют первый припев праздника. И ирмос: Недоуме́ет всяк язы́к: Посем втораго канона припев. И ирмос: О, па́че ума́: И поклон.

Светилен:

Подобен: Посети́л ны:

Яви́ся Спас, благода́ть и и́стина, во струя́х Иорда́нских / и су́щия во тьме и се́ни спя́щия просвети́л есть, / и́бо прии́де и яви́ся Свет Непристу́пный. (3)

На хвалитех стихиры на 4, глас 1:

Германа патриарха: Свет от Све́та, / возсия́ ми́рови Христо́с, Спас наш, / явле́йся Бог. / Сему́, лю́дие, поклони́мся.

Ка́ко Тя, Христе́, / раби́, Влады́ку досто́йно почти́м? / Я́ко в вода́х всех нас обнови́л eси́.

Ты, во Иoрда́не кре́щся, Спа́се наш, / во́ды освяти́л eси́, / дла́нию раба́ рукополага́емый / и стра́сти ми́ра исцеля́яй. / Ве́лие та́инство явле́ния Твоего́, / Человеколю́бче Го́споди, сла́ва Тебе́.

И́стинный Свет яви́ся / и всем просвеще́ние да́рует, / креща́ется Христо́с с на́ми, / И́же вся́кия вы́шши чистоты́, / влага́ет свяще́ние воде́, / и душа́м сие́ очище́ние быва́ет, / земно́е явля́емое и вы́ше Небе́с разумева́емое. / Ба́нею – спасе́ние, водо́ю же – Дух, / погруже́ния ра́ди, и́же к Бо́гу, наш восхо́д быва́ет. / Чудéсна дела́ Твоя́, Го́споди, сла́ва Тебе́.

Слава, глас 6. Анатолия:

Вода́ми Иoрда́нскими оде́ялся eси́, Спа́се, / одея́йся Све́том, я́ко ри́зою, / и приклони́л eси́ главу́ Предте́чи, И́же не́бо изме́ривый пя́дию. / Да обрати́ши мир от ле́сти и спасе́ши, / я́ко Человеколю́бец.

И ныне, глас 2, тогоже:

Днесь Христо́с на Иoрда́н прии́де крести́тися, / днесь Иоа́нн каса́ется верху́ Влады́чню. / Си́лы Небе́сныя ужасо́шася, / пресла́вное ви́дяще та́инство. / Мо́ре ви́де и побеже́, / Иoрда́н, ви́дев, возврати́ся. / Мы же, просве́щшеся, вопие́м: / сла́ва яви́вшемуся Бо́гу, / и на земли́ ви́денному, / и просвети́вшему мир.

Славословие великое. По трисвятом тропарь праздника, ектении.

Отпуст:

И́же во Иорда́не крести́тися изво́ливый от Иоа́нна на́шего ра́ди спасе́ния, Христо́с, и́стинный Бог наш, моли́твами пречи́стыя Своея́ Ма́тере, святы́х сла́вных и всехва́льных Апо́стол, и всех святы́х, поми́лует и спасе́т нас, я́ко Благ и Человеколю́бец.

И дается святый елей от кандила поющим нам стихиру праздника. Таже час 1. На 1–м часе тропарь праздника; по трисвятом кондак праздника, и прочее, и совершенный отпуст. В сий день литургия бывает порану труда ради бденнаго.

НА ЛИТУРГИИ

Антифон 1, псалом 113, глас 1:

Стих 1: Во исхо́де Изра́илеве от Еги́пта, / до́му Иа́ковля из люде́й ва́рвар.

Моли́твами Богоро́дицы, / Спа́се, спаси́ нас.

И другий лик. Стих 2: Бысть Иуде́я святы́ня Его́, / Изра́иль о́бласть Его́.

Моли́твами Богоро́дицы, / Спа́се, спаси́ нас.

Стих 3: Мо́ре ви́де и побеже́, / Иорда́н возврати́ся вспять.

Моли́твами Богоро́дицы, / Спа́се, спаси́ нас.

Стих 4: Что ти есть, мо́ре, я́ко побе́гло еси́? / И тебе́, Иорда́не, я́ко возврати́лся еси́ вспять?

Моли́твами Богоро́дицы:

Сла́ва, / и ны́не: Моли́твами Богоро́дицы:

Антифон 2, псалом 114, глас 2:

Стих 1: Возлюби́х, я́ко услы́шит Госпо́дь / глас моле́ния моего́.

Спаси́ ны, Сы́не Бо́жий, / во Иорда́не крести́выйся, пою́щия Ти: / аллилу́ия.

Стих 2: Я́ко приклони́ у́хо Свое́ мне, / и во дни моя́ призову́.

Спаси́ ны, Сы́не Бо́жий:

Стих 3: Объя́ша мя боле́зни сме́ртныя, беды́ а́довы обрето́ша мя, / скорбь и боле́знь обрето́х и И́мя Госпо́дне призва́х.

Спаси́ ны, Сы́не Бо́жий:

Стих 4: Ми́лостив Госпо́дь и пра́веден, / и Бог наш ми́лует.

Спаси́ ны, Сы́не Бо́жий:

Сла́ва, и ны́не: Единоро́дный Сы́не:

Антифон 3, псалом 117, глас 1:

Стих 1: Испове́дайтеся Го́сподеви, я́ко Благ, / я́ко в век ми́лость Его́.

Тропарь, глас 1:

Во Иoрда́не креща́ющуся Тебе́, Го́споди, / Тро́йческое яви́ся поклоне́ние: / Роди́телев бо глас свиде́тельствоваше Тебе́, / возлю́бленнаго Тя Сы́на имену́я, / и Дух в ви́де голуби́не / изве́ствоваше словесе́ утвержде́ние. / Явле́йся Христе́ Бо́же / и мир просвеще́й, сла́ва Тебе́.

Стих 2: Да рече́т у́бо дом Изра́илев: / я́ко Благ, я́ко в век ми́лость Его́.

Во Иoрда́не креща́ющуся Тебе́, Го́споди:

Стих 3: Да рече́т у́бо дом Ааро́нь: / я́ко Благ, я́ко в век ми́лость Его́.

Во Иoрда́не креща́ющуся Тебе́, Го́споди:

Стих 4: Да реку́т у́бо вси, боя́щиися Го́спода: / я́ко Благ, я́ко в век ми́лость Его́.

Во Иoрда́не креща́ющуся Тебе́, Го́споди:

Входное: Благослове́н гряды́й во И́мя Госпо́дне, / благослови́хом вы из до́му Госпо́дня, / Бог Госпо́дь и яви́ся нам.

Тропарь: Во Иoрда́не креща́ющуся Тебе́, Го́споди:

Слава, и ныне, кондак, глас 4:

Яви́лся еси́ днесь вселе́нней, / и свет Твой, Го́споди, зна́менася на нас, / в ра́зуме пою́щих Тя: / прише́л еси́ и яви́лся еси́, / Свет Непристу́пный.

Вместо же трисвятаго поем: Ели́цы во Христа́ крести́стеся, / во Христа́ облеко́стеся. Аллилу́ия. (3)

Прокимен, глас 4: Благослове́н гряды́й во И́мя Госпо́дне, / Бог Госпо́дь и яви́ся нам. Стих: Испове́дайтеся Го́сподеви, я́ко Благ, я́ко в век ми́лость Его́.

Апостол к Титу (зачало 302):

Ча́до Ти́те, яви́ся благода́ть Бо́жия спаси́тельная всем челове́ком, наказу́ющи нас, да отве́ргшеся нече́стия и мирски́х похоте́й, целому́дренно, и пра́ведно, и благоче́стно поживе́м в ны́нешнем ве́це, жду́ще блаже́ннаго упова́ния и явле́ния сла́вы Вели́каго Бо́га и Спа́са на́шего Иису́са Христа́. И́же дал есть Себе́ за ны, да изба́вит ны от вся́каго беззако́ния и очи́стит Себе́ лю́ди избра́нны, ревни́тели до́брым дело́м. Егда́ же благода́ть и человеколю́бие яви́ся Спа́са на́шего Бо́га, не от дел пра́ведных, и́хже сотвори́хом мы, но по Свое́й Его́ ми́лости, спасе́ нас ба́нею пакибытия́ и обновле́нием Ду́ха Свята́го, Его́же излия́ на нас оби́льно Иису́с Христо́м, Спаси́телем на́шим, да оправди́вшеся благода́тию Его́, насле́дницы бу́дем по упова́нию жи́зни ве́чныя.

Аллилуия, глас 4: Принеси́те Го́сподеви сы́нове Бо́жии, принеси́те Го́сподеви сы́ны о́вни. Стих: Глас Госпо́день на вода́х, Бог сла́вы возгреме́, Госпо́дь на вода́х мно́гих.

Евангелие от Матфея (зачало 6):

Во вре́мя о́но прии́де Иису́с от Галиле́и на Иорда́н ко Иоа́нну крести́тися от него́. Иоа́нн же возбраня́ше Ему́, глаго́ля: аз тре́бую Тобо́ю крести́тися, и Ты ли гряде́ши ко мне? Отвеща́в же, Иису́с рече́ к нему́: оста́ви ны́не, та́ко бо подо́бно есть нам испо́лнити вся́ку пра́вду. Тогда́ оста́ви Его́. И, крести́вся, Иису́с взы́де а́бие от воды́, и се отверзо́шася Ему́ Небеса́, и ви́де Ду́ха Бо́жия, сходя́ща, я́ко го́лубя, и гряду́ща на Него́. И се глас с Небесе́, глаго́ля: Сей есть Сын Мой возлю́бленный, о Не́мже благоволи́х.

Вместо Достойно:

Велича́й, душе́ моя́, / Честне́йшую го́рних во́инств, / Де́ву Пречи́стую Богоро́дицу.

Ирмос, глас 2: Недоуме́ет всяк язы́к благохвали́ти по достоя́нию, / изумева́ет же ум и преми́рный пе́ти Тя, Богоро́дице, / оба́че, Блага́я су́щи, ве́ру приими́, / и́бо любо́вь ве́си Боже́ственную на́шу: / Ты бо христиа́н еси́ Предста́тельница, Тя велича́ем. И до отдания.

Причастен: Яви́ся благода́ть Бо́жия спаси́тельная всем челове́ком.

На трапезе бывает утешение братии велие. И ядим рыбу, и сыр и яица, и пием вино; мирстии же мясо, аще будет и в среду или пяток. И чтется слово Златоустаго, емуже начало: Вси вы, во благоду́шии: