Текст книги "Текст Праздничной минеи на церковнославянском языке"

Автор книги: Автор Неизвестен

сообщить о нарушении

Текущая страница: 23 (всего у книги 38 страниц)

СВЯТОЕ БОГОЯВЛЕНИЕ. КРЕЩЕНИЕ ГОСПОДА БОГА И СПАСА НАШЕГО ИИСУСА ХРИСТА

6 января

ПОСЛЕДОВАНИЕ ЧАСОВ,

ПЕВАЕМЫХ В НАВЕЧЕРИИ ПРОСВЕЩЕНИЯ.

Час первый

В начале втораго часа знаменует в кампан, и, собравшеся во храм, облачится иерей в фелонь, диакон же в стихарь. И поставляет параекклисиарх аналогий украшен прямо царских врат, и вжигают свещу на свещнице. Иерей же исходит со Евангелием во храм или в трапезу царскими враты, предходящу ему диакону с кадилом. И полагает иерей святое Евангелие на аналоге и, став пред аналогом, творит начало по обычаю. И по начале чтец: Сла́ва Тебе́, Бо́же наш, сла́ва Тебе́. И Царю́ Небе́сный: и прочая. И по возгласе кадит священник святое Евангелие на аналогии окрест, и прочия иконы, и храм весь, и настоятеля, и братию. Чтец же чтет:

Псалом 5:

Глаго́лы моя́ внуши́, Го́споди, разуме́й зва́ние мое́. Вонми́ гла́су моле́ния моего́, Царю́ мой и Бо́же мой, я́ко к Тебе́ помолю́ся, Го́споди. Зау́тра услы́ши глас мой: Зау́тра предста́ну Ти, и у́зриши мя. Я́ко Бог, не хотя́й беззако́ния, Ты еси́, не присели́тся к Тебе́ лука́внуяй, ниже́ пребу́дут беззако́нницы пред очи́ма Твои́ма. Возненави́дел еси́ вся, де́лающия беззако́ние. Погуби́ши вся, глаго́лющия лжу, му́жа крове́й и льсти́ва гнуша́ется Госпо́дь. Аз же мно́жеством ми́лости Твоея́ вни́ду в дом Твой, поклоню́ся ко хра́му свято́му Твоему́ в стра́се Твое́м. Го́споди, наста́ви мя пра́вдою Твое́ю, враг мои́х ра́ди испра́ви пред Тобо́ю путь мой. Я́ко несть во усте́х их и́стины, се́рдце их су́етно, гроб отве́рст горта́нь их, язы́ки свои́ми льща́ху. Суди́ им, Бо́же, да отпаду́т от мы́слей свои́х, по мно́жеству нече́стия их изри́ни я, я́ко преогорчи́ша Тя, Го́споди. И да возвеселя́тся вси, упова́ющии на Тя, во век возра́дуются, и всели́шися в них. И похва́лятся о Тебе́ лю́бящии И́мя Твое́. Я́ко Ты благослови́ши пра́ведника, Го́споди, я́ко ору́жием благоволе́ния венча́л еси́ нас.

Псалом 22:

Госпо́дь пасе́т мя, и ничто́же мя лиши́т. На ме́сте зла́чне, та́мо всели́ мя, на воде́ поко́йне воспита́ мя. Ду́шу мою́ обрати́, наста́ви мя на стези́ пра́вды и́мене ра́ди Своего́. А́ще бо и пойду́ посреде́ се́ни сме́ртныя, не убою́ся зла, я́ко Ты со мно́ю еси́, жезл Твой и па́лица Твоя́, та мя уте́шиста. Угото́вал еси́ пре́до мно́ю трапе́зу, сопроти́в стужа́ющим мне, ума́стил еси́ еле́ом главу́ мою́, и ча́ша Твоя́ упоява́ющи мя, я́ко держа́вна. И ми́лость Твоя́ пожене́т мя вся дни живота́ моего́, и е́же всели́ти ми ся в дом Госпо́день, в долготу́ дний.

Псалом 26:

Госпо́дь просвеще́ние мое́ и Спаси́тель мой, кого́ убою́ся? Госпо́дь Защи́титель живота́ моего, от кого́ устрашу́ся? Внегда́ приближа́тися на мя зло́бующим, е́же сне́сти пло́ти моя́, оскорбля́ющии мя и врази́ мои́, ти́и изнемого́ша и падо́ша. А́ще ополчи́тся на мя полк, не убои́тся се́рдце мое́, а́ще воста́нет на мя брань, на Него́ аз упова́ю. Еди́но проси́х от Го́спода, то́ взыщу́: е́же жи́ти ми в дому́ Госпо́дни вся дни живота́ моего́, зре́ти ми красоту́ Госпо́дню и посеща́ти храм святы́й Его́. Я́ко скры мя в селе́нии Свое́м в день зол мои́х, покры́ мя в та́йне селе́ния Своего́, на ка́мень вознесе́ мя. И ны́не се вознесе́ главу́ мою́ на враги́ моя́. Обыдо́х и пожро́х в селе́нии Его́ же́ртву хвале́ния и воскликнове́ния, пою́ и воспою́ Го́сподеви. Услы́ши, Го́споди, глас мой, и́мже воззва́х: поми́луй мя и услы́ши мя. Тебе́ рече́ се́рдце мое́: Го́спода взыщу́. Взыска́ Тебе́ лице́ мое́, лица́ Твоего́, Го́споди, взыщу́. Не отврати́ лица́ Твоего́ от мене́ и не уклони́ся гне́вом от раба́ Твоего́, помо́щник мой бу́ди, не отри́ни мене́ и не оста́ви мене́, Бо́же, Спаси́телю мой. Я́ко оте́ц мой и ма́ти моя́ оста́виста мя, Госпо́дь же восприя́т мя. Законоположи́ ми, Го́споди, в пути́ Твое́м и наста́ви мя на стезю́ пра́вую враг мои́х ра́ди. Не преда́ждь мене́ в ду́ши стужа́ющих ми, я́ко воста́ша на мя свиде́телие непра́веднии и солга́ непра́вда себе́. Ве́рую ви́дети блага́я Госпо́дня на земли́ живы́х. Потерпи́ Го́спода, мужа́йся, и да крепи́тся се́рдце твое́, и потерпи́ Го́спода.

Сла́ва, и ны́не, Аллилу́ия, (3). Го́споди, поми́луй, (3).

Слава, тропарь, глас 4:

Возвраща́шеся иногда́ Иорда́н река́ ми́лотию Елиссе́евою, / возне́сшуся Илии́, / и разделя́хуся во́ды сю́ду и сю́ду, / и бысть ему́ сух путь, и́же мо́крый, / во о́браз вои́стинну Креще́ния, / и́мже мы теку́щее жития́ прехо́дим ше́ствие: / Христо́с яви́ся во Иорда́не освяти́ти во́ды.

И ныне, Богородичен:

Что Тя нарече́м, о Благода́тная? / Не́бо, я́ко возсия́ла еси́ Со́лнце Пра́вды. / Рай, я́ко прозябла́ еси́ цвет нетле́ния. / Де́ву, я́ко пребыла́ еси́ нетле́нна. / Чи́стую Ма́терь, я́ко име́ла еси́ на святы́х Твои́х объя́тиях Сы́на, всех Бо́га. / Того́ моли́ спасти́ся душа́м на́шим.

Таже тропари сия поем по дважды, глас 8. Творение Софрония, патриарха Иерусалимскаго:

Днесь вод освяща́ется естество́, / и разделя́ется Иорда́н / и свои́х вод возвраща́ет струи́, / Влады́ку зря креща́ема.

И вторый лик тойже тропарь без припева:

И паки первый лик припев: Сего́ ра́ди помяну́х Тя / от земли́ Иорда́нски и Ермонии́мски.

Яко Челове́к на реку́ прише́л еси́, Христе́ Царю́, / и ра́бское Креще́ние прия́ти тщи́шися, Бла́же, / от Предте́чеву руку́ / грех ра́ди на́ших, Человеколю́бче.

И вторый лик вторый припев: Ви́деша Тя во́ды, Бо́же, / ви́деша Тя во́ды и убоя́шася.

И паки тойже тропарь.

Слава: Ко гла́су вопию́щаго в пусты́ни: / угото́вайте путь Госпо́день, / прише́л еси́, Го́споди, зрак ра́бий прии́м, / Креще́ния прося́, не ве́дый греха́. / Ви́деша Тя во́ды и убоя́шася. / Тре́петен бысть Предте́ча и возопи́, глаго́ля: / ка́ко просвети́т свети́льник Све́та? / Ка́ко ру́ку положи́т раб на Влады́ку? / Освяти́ мене́ и во́ды, Спа́се, / взе́мляй ми́ра грех.

И ныне, паки тойже.

Таже прокимен, глас 4:

И возгреме́ с Небесе́ Госпо́дь, / и Вы́шний даде́ глас Свой.

Стих: Возлюблю́ Тя, Го́споди, кре́посте моя́, Госпо́дь утвержде́ние мое́.

Проро́чества Иса́иина чте́ние (глава 35):

Та́ко глаго́лет Госпо́дь: да возвесели́тся пусты́ня жа́ждущая, да возра́дуется пусты́ня и процвете́т, я́ко крин, и да прозя́бнет, и вся возвеселя́тся. И возра́дуются пусты́нная Иорда́нова, и сла́ва Лива́нова дана́ бысть ей и честь Карми́лова, и лю́дие Мои́ у́зрят сла́ву Госпо́дню и высоту́ Бо́жию. Укрепи́теся, ру́ки осла́бленныя, и, коле́на разсла́бленная, уте́шитеся, и рцы́те малоду́шным мы́слию: укрепи́теся и не бо́йтеся, се Бог наш суд воздае́т, Той прии́дет и спасе́т нас. Тогда́ отве́рзутся очеса́ слепы́х, и ушеса́ глухи́х услы́шат, тогда́ ско́чит хро́мый, я́ко еле́нь, и я́сен бу́дет язы́к гугни́вых, я́ко прорази́ся в пусты́ни вода́ и дебрь в земли́ жа́ждущей. И бу́дет безво́дная в бла́та, и в жа́ждущей земли́ исто́чник воды́ бу́дет. Та́мо бу́дет весе́лие птиц, водворе́ние си́ринов, и тро́стий, и бла́та. Та́мо бу́дет путь чист, и путь свят нарече́тся. И не мимои́дет та́мо нечи́ст, ниже́ бу́дет та́мо путь нечи́стый, разсе́яннии же по́йдут по нему́ и не заблу́дят. И не бу́дет та́мо льва, ниже́ от звере́й лю́тых взы́дет нань, ниже́ обря́щется та́мо, но по́йдут по нему́ изба́вленнии и со́браннии от Го́спода, и обратя́тся, и прии́дут в Сио́н с весе́лием и ра́достию, и весе́лие ве́чное над главо́ю их. Хвала́, и ра́дование, и весе́лие пости́гнет их, отбеже́ боле́знь, печа́ль и воздыха́ние.

Дея́ний святы́х апо́стол чте́ние (зачало 33):

Во дни о́ны, я́коже скончава́ше Иоа́нн тече́ние, глаго́лаше: кого́ мя непщу́ете бы́ти, несмь аз, но се гряде́т по мне, Ему́же несмь досто́ин разреши́ти реме́нь сапогу́ Его́. Му́жие, бра́тие, сы́нове ро́да Авраа́мля, и и́же в вас, боя́щиися Бо́га, вам сло́во спасе́ния Сего́ посла́ся: Живу́щии бо во Иерусали́ме и кня́зи их сего́ не разуме́вше, и гла́сы проро́ческия, по вся суббо́ты что́мыя, осуди́вше Его́, испо́лниша. И ни еди́ныя вины́ сме́ртныя обре́тше, проси́ша у Пила́та уби́ти Его́. Я́коже сконча́ша вся, я́же о Нем пи́сана, сне́мше со Дре́ва, положи́ша во гро́бе. Бог же воскреси́ Его́ от ме́ртвых. И́же яви́ся на дни мно́ги совозше́дшим с Ним от Галиле́и во Иерусали́м, и́же ны́не суть свиде́телие Его́ к лю́дем. И мы вам благовеству́ем обетова́ние, бы́вшее ко отце́м, я́ко сие́ Бог испо́лнил есть нам, ча́дом их, воздви́г Иису́са.

Диакон: Прему́дрость, про́сти, услы́шим свята́го Ева́нгелия.

Иерей: От Матфе́я свята́го Ева́нгелия чте́ние (зачало 5):

Во вре́мя о́но прии́де Иоа́нн Крести́тель, пропове́дуя в пусты́ни Иуде́йстей и глаго́ля: пока́йтеся, прибли́жи бо ся Ца́рство Небе́сное. Сей бо есть рече́нный Иса́ием проро́ком, глаго́лющим: глас вопию́щаго в пусты́ни: угото́вайте путь Госпо́день, пра́вы твори́те стези́ Его́. Сам же Иоа́нн имя́ше ри́зу свою́ от влас вельблу́ждь и по́яс усме́н о чре́слех свои́х; снедь же его́ бе пру́жие и мед ди́вий. Тогда́ исхожда́ше к нему́ Иерусали́ма и вся Иуде́я, и вся страна́ Иорда́нская. И креща́хуся во Иорда́не от него́, испове́дающе грехи́ своя́. Ви́дев же Иоа́нн мно́ги фарисе́и и саддуке́и, гряду́щия на Креще́ние его́, рече́ им: рожде́ния ехи́днова, кто сказа́ вам бежа́ти от бу́дущаго гне́ва? Сотвори́те у́бо плоды́, досто́йны покая́ния. И не начина́йте глаго́лати в себе́: отца́ и́мамы Авраа́ма. Глаго́лю бо вам, я́ко мо́жет Бог от ка́мения сего́ воздви́гнути ча́да Авраа́му. Уже́ бо и секи́ра при ко́рени дре́ва лежи́т: вся́ко у́бо дре́во, е́же не твори́т плода́ добра́, посека́емо быва́ет и во огнь вмета́емо. Аз у́бо креща́ю вы водо́ю в покая́ние, Гряды́й же по мне, кре́плий мене́ есть, Ему́же несмь досто́ин сапоги́ понести́, Той вы крести́т Ду́хом Святы́м.

Таже: Стопы́ моя́ напра́ви по словеси́ Твоему́ / и да не облада́ет мно́ю вся́кое беззако́ние. / Изба́ви мя от клеветы́ челове́ческия, и сохраню́ за́поведи Твоя́. / Лице́ Твое́ просвети́ на раба́ Твоего́ / и нау́чи мя оправда́нием Твои́м.

Да испо́лнятся уста́ моя́ хвале́ния Твоего́, Го́споди, / я́ко да воспою́ сла́ву Твою́, / весь день великоле́пие Твое́.

Трисвятое и по О́тче наш: Священник: Я́ко Твое́ есть Ца́рство:

Кондак, глас 4:

Во струя́х днесь Иорда́нских быв, Госпо́дь / Иоа́нну вопие́т: / не убо́йся крести́ти Мя, / спасти́ бо приидо́х / Ада́ма первозда́ннаго.

Го́споди, поми́луй, 40, и молитву сию:

И́же на вся́кое вре́мя и на вся́кий час, на Небеси́ и на земли́, покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы и испра́ви живо́т наш к за́поведем Твои́м, ду́ши на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы, я́ко благослове́н еси́ во ве́ки веко́в, ами́нь.

Го́споди, поми́луй (3). Сла́ва, и ны́не:

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

И́менем Госпо́дним благослови́, о́тче.

Священник возглашает:

Бо́же, уще́дри ны и благослови́ ны, / просвети́ лице́ Твое́ на ны и поми́луй ны.

Таже молитву сию:

Христе́, Све́те и́стинный, просвеща́яй и освяща́яй вся́каго челове́ка, гряду́щаго в мир, да зна́менается на нас свет Лица́ Твоего́, да в нем у́зрим Свет непристу́пный, и испра́ви стопы́ на́ша к де́ланию за́поведей Твои́х моли́твами Пречи́стыя Твоея́ Ма́тере и всех Твои́х святы́х, ами́нь.

Час третий

Прииди́те, поклони́мся: (3).

И псалом 28:

Принеси́те Го́сподеви сы́нове Бо́жии, принеси́те Го́сподеви сы́ны о́вни, принеси́те Го́сподеви сла́ву и честь. Принеси́те Го́сподеви сла́ву И́мени Его́, поклони́теся Го́сподеви во дворе́ святе́м Его́. Глас Госпо́день на вода́х, Бог сла́вы возгреме́, Госпо́дь на вода́х мно́гих. Глас Госпо́день в кре́пости, глас Госпо́день в великоле́пии. Глас Го́спода, сокруша́ющаго ке́дры, и стры́ет Госпо́дь ке́дры лива́нския. И истни́т я, я́ко тельца́ лива́нска, и возлю́бленный, я́ко сын единоро́жь. Глас Го́спода, пресеца́ющаго пла́мень огня́, глас Го́спода, стряса́ющаго пусты́ню, и стрясе́т Госпо́дь пусты́ню Кадди́йскую. Глас Госпо́день, сверша́ющий еле́ни, и откры́ет дубра́вы, и в хра́ме Его́ вся́кий глаго́лет сла́ву. Госпо́дь пото́п населя́ет, и ся́дет Госпо́дь Царь в век. Госпо́дь кре́пость лю́дем Свои́м даст, Госпо́дь благослови́т лю́ди Своя́ ми́ром.

Псалом 41:

И́мже о́бразом жела́ет еле́нь на исто́чники водны́я, си́це жела́ет душа́ моя́ к Тебе́, Бо́же. Возжада́ душа́ моя́ к Бо́гу кре́пкому, живо́му, когда́ прииду́ и явлю́ся лицу́ Бо́жию? Бы́ша сле́зы моя мне хлеб день и нощь, внегда́ глаго́латися мне на всяк день: где есть Бог твой? Сия́ помяну́х, и излия́х на мя ду́шу мою́, я́ко пройду́ в ме́сто селе́ния ди́вна, да́же до до́му Бо́жия, во гла́се ра́дования и испове́дания, шу́ма пра́зднующаго. Вску́ю приско́рбна еси́, душе́ моя́, и вску́ю смуща́еши мя? Упова́й на Бо́га, я́ко испове́мся Ему́, спасе́ние лица́ моего́, и Бог мой. Ко мне самому́ душа́ моя́ смяте́ся, сего́ ра́ди помяну́х Тя от земли́ Иорда́нски и Ермонии́мски, от горы́ ма́лыя. Бе́здна бе́здну призыва́ет во гла́се хля́бий Твои́х, вся высоты́ Твоя́ и во́лны Твоя́ на мне преидо́ша. В день запове́сть Госпо́дь ми́лость Свою́, и но́щию песнь Его́ от мене́, моли́тва Бо́гу живота́ моего́. Реку́ Бо́гу: засту́пник мой еси́, почто́ мя забы́л еси́? И вску́ю, се́туя, хожду́, внегда́ оскорбля́ет враг? Внегда́ сокруша́тися косте́м мои́м, поноша́ху ми врази́ мои́, внегда́ глаго́лати им мне на всяк день: где есть Бог твой? Вску́ю приско́рбна еси́, душе́ моя́, и вску́ю смуща́еши мя? Упова́й на Бо́га, я́ко испове́мся Ему́, спасе́ние лица́ моего́ и Бог мой.

Псалом 50:

Поми́луй мя, Бо́же, по вели́цей ми́лости Твое́й и по мно́жеству щедро́т Твои́х, очи́сти беззако́ние мое́. Наипа́че омы́й мя от беззако́ния моего́ и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ еди́ному согреши́х и лука́вое пред Тобо́ю сотвори́х. Я́ко да оправди́шися во словесе́х Твои́х и победи́ши внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и Дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу – дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая, тогда́ возложа́т на олта́рь Твой тельцы́.

Сла́ва, и ны́не, Аллилу́ия, (3). Го́споди, поми́луй, (3).

Слава, тропарь, глас 4:

Возвраща́шеся иногда́ Иорда́н река́ ми́лотию Елиссе́евою, / возне́сшуся Илии́, / и разделя́хуся во́ды сю́ду и сю́ду, / и бысть ему́ сух путь, и́же мо́крый, / во о́браз вои́стинну Креще́ния, / и́мже мы теку́щее жития́ прехо́дим ше́ствие: / Христо́с яви́ся во Иорда́не освяти́ти во́ды.

И ныне, Богородичен:

Богоро́дице, Ты еси́ лоза́ и́стинная, / возрасти́вшая нам Плод живота́, / Тебе́ мо́лимся: / моли́ся, Влады́чице, со святы́ми апо́столы / поми́ловати ду́ши на́ша.

Таже поем тропари, глас 8:

Предте́чи, и Крести́теля, и проро́ка, / и паче всех почте́на проро́к, / трепета́ше ны́не рука́ десна́я, / егда́ ви́де Тебе́, А́гнца Бо́жия, / очища́ющаго ми́ру согреше́ния, / и, по́двигом одержи́мь, вопия́ше: / не сме́ю прикосну́тися, Сло́ве, верху́ Твоему́, / Сам мя освяти́ и просвети́, Ще́дре: / Ты бо еси́ Живо́т, и Свет, и Мир ми́рови. (2)

Таже стих. Глас 4: Сего́ ра́ди помяну́х Тя / от земли́ Иорда́нски и Ермонии́мски.

Тро́ица, Бог наш, / Себе́ нам днесь неразде́льно яви́: / и́бо Оте́ц явле́нным свиде́тельством сро́дства возгласи́, / Дух же голуби́ным о́бразом сни́де с Небе́с, / Сын Пречи́стый верх Свой Предте́чи приклони́ / и, кре́щься, челове́чество от рабо́ты изба́ви, / я́ко Человеколю́бец.

Стих: Ви́деша Тя во́ды, Бо́же, / ви́деша Тя во́ды и убоя́шася.

И паки тойже тропарь.

Слава, глас 5: Гряды́й с пло́тию ко Иорда́ну, Го́споди, / крести́тися хотя́ во о́бразе Челове́ка, Животода́вче, / да прельсти́вшихся нас, я́ко Благоутро́бен, / вся́кия ко́зни и се́ти зми́евы изба́вив, просвети́ши, / от Отца́ свиде́тельствуемь, / Боже́ственный же Дух голуби́ным ви́дом Тебе́ предста́, / но всели́ в ду́ши на́ша Того́, Человеколю́бче.

И ныне, тойже.

Таже, прокимен, глас 6:

Ви́деша Тя во́ды, Бо́же, / ви́деша Тя во́ды и убоя́шася. Стих: Гла́сом мои́м ко Го́споду воззва́х, гла́сом мои́м к Бо́гу, и внят ми.

Проро́чества Иса́иина чте́ние (глава 1):

Та́ко глаго́лет Госпо́дь: измы́йтеся и чи́сти бу́дете, отыми́те лука́вствия от душ ва́ших пред очи́ма Мои́ма, преста́ните от лука́вствий ва́ших. Научи́теся до́брое твори́ти, изыщи́те суда́, изба́вите оби́дима, суди́те си́ру и оправди́те вдови́цу. И прииди́те, и истя́жимся, – глаго́лет Госпо́дь, – и а́ще бу́дут греси́ ва́ши, я́ко багря́ное, я́ко снег, убелю́; а́ще же бу́дут, я́ко червле́ное, я́ко во́лну, убелю́. И а́ще хо́щете и послу́шаете Мене́, блага́я земли́ сне́сте. А́ще ли же не хо́щете, ниже́ послу́шаете Мене́, меч вас поя́ст, – уста́ бо Госпо́дня глаго́лаша сия́.

Дея́ний святы́х апо́стол чте́ние (зачало 42):

Во дни о́ны бысть внегда́ бы́ти Аполло́су в Кори́нфе, Па́влу же, проше́дшу вы́шния страны́, приити́ во Ефе́с, и, обре́т не́кия ученики́, рече́ к ним: а́ще у́бо Дух Свят прия́ли есте́, ве́ровавше? Они́ же ре́ша к нему́: но ниже́, а́ще Дух Святы́й есть, слы́шахом. Рече́ же к ним: во что у́бо крести́стеся? Они́ же реко́ша: во Иоа́нново креще́ние. Рече́ же Па́вел: Иоа́нн у́бо крести́ креще́нием покая́ния, лю́дем глаго́ля: во Гряду́щаго по нем да ве́руют, си́речь во Христа́ Иису́са. Слы́шавше же, крести́шася во И́мя Го́спода Иису́са. И возло́жшу Па́влу на ня ру́це, прии́де Дух Святы́й на ня: глаго́лаху же язы́ки и проро́чествоваху. Бя́ше же всех муже́й я́ко двана́десять. Вшед же в со́нмище, дерза́ше, не обину́яся, три ме́сяцы бесе́дуя и уверя́я я́же о Ца́рствии Бо́жии.

Евангелие от Марка (зачало 1):

Зача́ло Ева́нгелия Иису́са Христа́, Сы́на Бо́жия, я́коже есть пи́сано во проро́цех: се Аз посыла́ю А́нгела Моего́ пред лице́м Твои́м, и́же угото́вит путь Твой пред Тобо́ю. Глас вопию́щаго в пусты́ни: угото́вайте путь Госпо́день, пра́вы твори́те стези́ Его́. Бысть Иоа́нн, крестя́й в пусты́ни, и пропове́дая креще́ние покая́ния во отпуще́ние грехо́в. И исхожда́ше к нему́ вся Иуде́йская страна́ и иерусали́мляне, и креща́хуся вси во Иорда́не реце́ от него́, испове́дающе грехи́ своя́. Бе же Иоа́нн оболче́н власы́ вельблу́жди, и по́яс усме́н о чре́слех его́, и яды́й акри́ды, и мед ди́вий. И пропове́даше, глаго́ля: гряде́т Кре́плий мене́, во след мене́, Ему́же несмь досто́ин, прекло́нься, разреши́ти реме́нь сапо́г Его́. Аз у́бо крести́х вы в воде́, Той же крести́т вы Ду́хом Святы́м.

Таже: Госпо́дь Бог благослове́н, / благослове́н Госпо́дь день дне, / поспеши́т нам Бог спасе́ний на́ших, / Бог наш, Бог спаса́ти.

Трисвятое, по О́тче наш: Иерей, возглас: Я́ко Твое́ есть Ца́рство:

Кондак, глас 4:

Во струя́х днесь Иорда́нских быв, Госпо́дь / Иоа́нну вопие́т: / не убо́йся крести́ти Мя, / спасти́ бо приидо́х / Ада́ма первозда́ннаго.

Го́споди, поми́луй, 40, и молитва: И́же на вся́кое вре́мя: Го́споди, поми́луй (3). Сла́ва, и ны́не: Честне́йшую Херуви́м: И́менем Госпо́дним благослови́, о́тче. Иерей: Моли́твами святы́х оте́ц на́ших:

Таже молитва:

Влады́ко Бо́же, О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше, еди́но Божество́, еди́на си́ла, поми́луй мя, гре́шнаго, и, и́миже ве́си судьба́ми, спаси́ мя недосто́йнаго раба́ Твоего́, я́ко благослове́н еси́ во ве́ки веко́в, ами́нь.

На третием и шестом часех кадит диакон Евангелие, и иконы, и настоятеля, и лики токмо.

И глаголем час шестый

Прииди́те, поклони́мся: (3).

И псалом 73:

Вску́ю, Бо́же, отри́нул еси́ до конца́? Разгне́вася я́рость Твоя́ на о́вцы па́жити Твоея́. Помяни́ сонм Твой, его́же стяжа́л еси́ испе́рва, изба́вил еси́ жезло́м достоя́ния Твоего́, гора́ Сио́н сия́, в не́йже всели́лся еси́. Воздви́гни ру́це Твои́ на горды́ни их в коне́ц, ели́ка лука́внова враг во святе́м Твое́м. И восхвали́шася ненави́дящии Тя посреде́ пра́здника Твоего́, положи́ша зна́мения своя́, зна́мения, и не позна́ша. Я́ко во исхо́де превы́ше, я́ко в дубра́ве дре́вяне, секи́рами разсеко́ша две́ри его́ вку́пе, се́чивом и оско́рдом разруши́ша и. Возжго́ша огне́м святи́ло Твое́, на земли́ оскверни́ша жили́ще И́мене Твоего́. Ре́ша в се́рдцы свое́м ю́жики их вку́пе: прииди́те, и отста́вим вся пра́здники Бо́жия от земли́. Зна́мения их не ви́дехом: несть ктому́ проро́ка, и нас не позна́ет ктому́. Доко́ле, Бо́же, поно́сит враг, раздражи́т проти́вный И́мя Твое́ до конца́? Вску́ю отвраща́еши ру́ку Твою́ и десни́цу Твою́ от среды́ не́дра Твоего́ в коне́ц? Бог же, Царь наш пре́жде ве́ка, соде́ла спасе́ние посреде́ земли́. Ты утверди́л еси́ си́лою Твое́ю мо́ре, Ты стерл еси главы́ зми́ев в воде́, Ты сокруши́л еси́ главу́ зми́еву, дал еси́ того́ бра́шно лю́дем Ефио́пским. Ты расто́ргл еси́ исто́чники и пото́ки, Ты изсуши́л еси́ ре́ки Ифа́мския. Твой есть день, и Твоя есть нощь, Ты соверши́л еси́ зарю́ и со́лнце. Ты сотвори́л еси́ вся преде́лы земли́, жа́тву и весну́, Ты созда́л еси́ я. Помяни́ сия́: враг поноси́ Го́сподеви, и лю́дие безу́мнии раздражи́ша И́мя Твое́. Не преда́ждь зве́рем ду́шу, испове́дающуюся Тебе́, душ убо́гих Твои́х не забу́ди до конца́. При́зри на заве́т Твой, я́ко испо́лнишася помраче́ннии земли́ домо́в беззако́ний. Да не возврати́тся смире́нный посра́млен, нищ и убо́г восхвали́та И́мя Твое́. Воста́ни, Бо́же, суди́ прю Твою́, помяни́ поноше́ние Твое́, е́же от безу́мнаго весь день. Не забу́ди гла́са моли́твенник Твои́х, горды́ня ненави́дящих Тя взы́де вы́ну.

Псалом 76:

Гла́сом мои́м ко Го́споду воззва́х, гла́сом мои́м к Бо́гу, и внят ми. В день ско́рби моея́ Бо́га взыска́х рука́ма мои́ма, но́щию пред Ним, и не прельще́н бых: отве́ржеся уте́шитися душа́ моя́. Помяну́х Бо́га и возвесели́хся; поглумля́хся, и малоду́шствоваше дух мой. Предвари́сте стражбы́ о́чи мои́, смято́хся и не глаго́лах. Помы́слих дни пе́рвыя, и ле́та ве́чная помяну́х, и поуча́хся. Но́щию се́рдцем мои́м глумля́хся, и тужа́ше дух мой. Еда́ во ве́ки отри́нет Госпо́дь и не приложи́т благоволи́ти па́ки? Или́ до конца́ ми́лость Свою́ отсече́т, сконча́ глаго́л от ро́да в род? Еда́ забу́дет уще́дрити Бог или́ удержи́т во гне́ве Свое́м щедро́ты Своя́? И рех: ны́не нача́х, сия́ изме́на десни́цы Вы́шняго. Помяну́х дела́ Госпо́дня, я́ко помяну́ от нача́ла чудеса́ Твоя́. И поучу́ся во всех де́лех Твои́х и в начина́ниих Твои́х поглумлю́ся. Бо́же, во святе́м путь Твой: кто Бог ве́лий, я́ко Бог наш? Ты еси́ Бог, творя́й чудеса́, сказа́л еси́ в лю́дех си́лу Твою́. Изба́вил еси́ мы́шцею Твое́ю лю́ди Твоя́, сы́ны Иа́ковли и Ио́сифовы. Ви́деша Тя во́ды, Бо́же, ви́деша Тя во́ды и убоя́шася, смято́шася бе́здны. Мно́жество шу́ма вод, глас да́ша о́блацы, и́бо стре́лы Твоя́ прехо́дят. Глас гро́ма Твоего́ в колеси́, освети́ша мо́лния Твоя́ вселе́нную, подви́жеся и тре́петна бысть земля́. В мо́ри путие́ Твои́, и стези́ Твои́ в вода́х мно́гих, и следы́ Твоя́ не позна́ются. Наста́вил еси́, я́ко о́вцы, лю́ди Твоя́ руко́ю Моисе́овою и Ааро́нею.

Псалом 90:

Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: засту́пник мой еси́ и прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи и от словесе́ мяте́жна. Плещма́ Свои́ма осени́т тя, и под криле́ Его́ наде́ешися, ору́жием обы́дет тя и́стина Его́. Не убои́шися от стра́ха нощна́го, от стрелы́, летя́щия во дни, от ве́щи, во тме преходя́щия, от сря́ща и бе́са полу́деннаго. Паде́т от страны́ твоея́ ты́сяща и тма одесну́ю тебе́, к тебе́ же не прибли́жится. Оба́че очи́ма твои́ма смо́триши и воздая́ние гре́шников у́зриши. Я́ко Ты, Го́споди, упова́ние мое́, Вы́шняго положи́л еси́ прибе́жище Твое́. Не прии́дет к тебе́ зло, и ра́на не прибли́жится телеси́ твоему́. Я́ко А́нгелом Свои́м запове́сть о тебе́ сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́. На а́спида и васили́ска насту́пиши и попере́ши льва и зми́я. Я́ко на Мя упова́, и изба́влю и; покры́ю и, я́ко позна́ и́мя Мое́. Воззове́т ко Мне, и услы́шу его́; с ним есмь в ско́рби, изму́ его́ и просла́влю его́. Долгото́ю дней испо́лню его́ и явлю́ ему́ спасе́ние Мое́.

Сла́ва, и ны́не, аллилу́ия (3). Го́споди поми́луй (3).

Слава, тропарь, глас 4:

Возвраща́шеся иногда́ Иорда́н река́ ми́лотию Елиссе́евою, / возне́сшуся Илии́, / и разделя́хуся во́ды сю́ду и сю́ду, / и бысть ему́ сух путь, и́же мо́крый, / во о́браз вои́стинну Креще́ния, / и́мже мы теку́щее жития́ прехо́дим ше́ствие: / Христо́с яви́ся во Иорда́не освяти́ти во́ды.

И ныне, Богородичен:

Я́ко не и́мамы дерзнове́ния за премно́гия грехи́ на́ша, / Ты и́же от Тебе́ Ро́ждшагося моли́, Богоро́дице Де́во, / мно́го бо мо́жет моле́ние Ма́тернее ко благосе́рдию Влады́ки. / Не пре́зри гре́шных мольбы́, Всечи́стая, / я́ко ми́лостив есть и спасти́ моги́й, / И́же и страда́ти о нас изво́ливый.

Таже, стихира, глас 8:

Та́ко глаго́лет Госпо́дь ко Иоа́нну: / проро́че, гряди́ крести́ти Мене́, / тебе́ созда́вшаго, и просвеща́ющаго благода́тию, / и очища́ющаго всех. / Прикосни́ся Боже́ственному Моему́ верху́ / и не усумни́ся. / Про́чее оста́ви ны́не, / и́бо испо́лнити приидо́х пра́вду вся́кую. / Ты же не усумни́ся отню́д, / и́бо тая́щагося в вода́х бори́теля, / кня́зя тьмы, тщу́ся погуби́ти, / избавля́я мир от его́ сете́й ны́не, / подая́ я́ко Человеколю́бец Живо́т ве́чный. (2)

Таже стих, глас 6: Сего́ ра́ди помяну́х Тя / от земли́ Иорда́нски и Ермонии́мски.

Днесь псало́мское проро́чество коне́ц прия́ти спеши́т: / мо́ре бо, – рече́, – ви́де и побеже́, / Иорда́н возврати́ся вспять / от лица́ Госпо́дня, от лица́ Бо́га Иа́ковля, / прише́дша от раба́ прия́ти Креще́ние. / Я́ко да и мы, и́дольския измы́вшеся нечистоты́, / просвети́мся душа́ми Его́ ра́ди.

Стих: Ви́деша Тя во́ды, Бо́же, / ви́деша Тя во́ды и убоя́шася.

Паки тойже.

Слава, глас 5: Что возвраща́еши твоя́ во́ды, о Иорда́не? / Что воспяща́еши струи́, / и не прехо́диши е́же по естеству́ хожде́ние? Не мо́щно ми терпе́ти, – рече́, – Огня́, пояда́ющаго мя. / Удивля́юся и ужаса́юся кра́йнему схожде́нию: / я́ко не обыко́х Чи́стаго измыва́ти, / ни навыко́х Безгре́шнаго отира́ти, / но оскверне́нныя сосу́ды очища́ти, / те́рния попаля́ти ми согреше́ний учи́т / и́же во мне креща́емый Христо́с. / Иоа́нн свиде́тельствует ми глас Сло́ва, вопия́: / се А́гнец Бо́жий, взе́мляй грехи́ ми́ра. / Тому́, ве́рнии, возопии́м: / явле́йся Бо́же в на́ше спасе́ние, сла́ва Тебе́.

И ныне, тойже.

Таже, прокимен, глас 4: В мо́ри путие́ Твои́, / и стези́ Твоя́ в вода́х мно́гих. Стих: Глас гро́ма Твоего́ в колеси́.

Таже, паремия.

Проро́чества Иса́иина чте́ние (глава 12):

Та́ко глаго́лет Госпо́дь: почерпи́те во́ду с весе́лием от исто́чников спасе́ния. И рече́ши в день он: испове́дайтеся Го́сподеви и призови́те И́мя Его́. Вознеси́те во язы́цех сла́ву Его́, помяни́те, я́ко вознесе́ся И́мя Его́. По́йте И́мя Госпо́дне, я́ко высо́кая сотвори́. Возвести́те сия́ по всей земли́, ра́дуйтеся и весели́теся, живу́щии в Сио́не, я́ко вознесе́ся Святы́й Изра́илев посреде́ его́.

К Ри́мляном посла́ния свята́го апо́стола Па́вла чте́ние (зачало 91):

Бра́тие, ели́цы во Христа́ Иису́са крести́хомся, в смерть Его́ крести́хомся. Спогребо́хомся у́бо Ему́ креще́нием в смерть: да я́коже воста́ Христо́с от ме́ртвых сла́вою О́тчею, та́ко и мы во обновле́нии жи́зни ходи́ти на́чнем. А́ще бо сообра́зни бы́хом подо́бию сме́рти Его́, то и воскресе́нию бу́дем. Сие́ ве́дяще, я́ко ве́тхий наш челове́к с Ним распя́тся, да упраздни́тся те́ло грехо́вное, я́ко ктому́ не рабо́тати нам греху́. Уме́рый бо, оправди́ся от греха́. А́ще ли умро́хом со Христо́м, ве́руем, я́ко и жи́ви бу́дем с Ним: Ве́дяще, я́ко Христо́с воста́ от ме́ртвых, ктому́ уже́ не умира́ет, смерть Ему́ ктому́ не облада́ет. Е́же бо у́мре, греху́ у́мре еди́ною, а е́же живе́т, Бо́гови живе́т. Та́кожде и вы помышля́йте себе́: ме́ртвым у́бо бы́ти греху́, живы́м же Бо́гови, о Христе́ Иису́се, Го́споде на́шем.

Евангелие от Марка (зачало 2):

Во вре́мя о́но прии́де Иису́с от Назаре́та Галиле́йскаго и крестися от Иоанна во Иордане. И а́бие восходя́ от воды́, ви́де разводя́щася Небеса́ и Дух, я́ко го́лубь, сходя́щ Нань. И глас бысть с Небесе́: Ты еси́ Сын Мой возлю́бленный, о Не́мже благоволи́х. И а́бие Дух изведе́ Его́ в пусты́ню. И бе ту в пусты́ни дней четы́редесять, искуша́емь сатано́ю, и бе со зверьми́, и А́нгели служа́ху Ему́. По преда́нии же Иоа́ннове, прии́де Иису́с в Галиле́ю, пропове́дая Ева́нгелие Ца́рствия Бо́жия и глаго́ля: я́ко испо́лнися вре́мя и прибли́жися Ца́рствие Бо́жие. Пока́йтеся и ве́руйте во Ева́нгелие.

Таже: Ско́ро да предваря́т ны щедро́ты Твоя́, Го́споди, / я́ко обнища́хом зело́; / помози́ нам, Бо́же, Спа́се наш, / сла́вы ра́ди И́мене Твоего́, Го́споди, изба́ви нас / и очи́сти грехи́ на́ша, И́мене ра́ди Твоего́.

Трисвятое и по О́тче наш: Священник: Я́ко Твое́ есть Ца́рство:

Кондак, глас 4:

Во струя́х днесь Иорда́нских быв, Госпо́дь / Иоа́нну вопие́т: / не убо́йся крести́ти Мя, / спасти́ бо приидо́х / Ада́ма первозда́ннаго.

Го́споди, поми́луй, 40. И́же на вся́кое вре́мя: Го́споди, поми́луй (3). Сла́ва, и ны́не: Честне́йшую Херуви́м: И́менем Госпо́дним благослови́, о́тче. Священник: Моли́твами святы́х оте́ц на́ших:

И молитва:

Бо́же и Го́споди сил и всея́ тва́ри Соде́телю, И́же за милосе́рдие безприкла́дныя ми́лости Твоея́ Единоро́днаго Сы́на Твоего́, Го́спода на́шего Иису́са Христа́, низпосла́вый на спасе́ние ро́да на́шего, и честны́м Его́ Кресто́м рукописа́ние грех на́ших растерза́вый, и победи́вый тем нача́ла и вла́сти тьмы. Сам, Влады́ко Человеколю́бче, приими́ и нас, гре́шных, благода́рственныя сия́ и моле́бныя моли́твы и изба́ви нас от вся́каго всегуби́тельнаго и мра́чнаго прегреше́ния и всех озло́бити нас и́щущих ви́димых и неви́димых враг. Пригвозди́ стра́ху Твоему́ пло́ти на́ша и не уклони́ серде́ц на́ших в словеса́ или́ помышле́ния лука́вствия, но любо́вию Твое́ю уязви́ ду́ши на́ша, да, к Тебе́ всегда́ взира́юще и е́же от Тебе́ све́том наставля́еми, Тебе́, непристу́пнаго и присносу́щнаго зря́ще Све́та, непреста́нное Тебе́ испове́дание и благодаре́ние возсыла́ем, Безнача́льному Отцу́ со Единоро́дным Твои́м Сы́ном и Всесвяты́м, и Благи́м, и Животворя́щим Твои́м Ду́хом ны́не, и при́сно, и во ве́ки веко́в, ами́нь.