Текст книги "Новый Завет (на цсл., гражданским шрифтом)"

Автор книги: Завет Новый

сообщить о нарушении

Текущая страница: 6 (всего у книги 35 страниц) [доступный отрывок для чтения: 13 страниц]

Глава 3

1 И вниде паки в сонмище: и бе тамо человек, суху имый руку.

2 И назираху его, аще в субботы изцелит его, да нань возглаголют.

3 И глагола человеку суху имущему руку: стани посреде.

4 И глагола им: достоит ли в субботы добро творити, или зло творити? душу спасти, или погубити? Они же молчаху.

5 И воззрев на них со гневом, скорбя о окаменении сердец их, глагола человеку: простри руку твою. И простре: и утвердися рука его цела яко другая.

6 И изшедше фарисее, абие со иродианы совет творяху нань, како его погубят.

7 Иисус же отиде со ученики своими к морю: и мног народ от галилеи по нем иде, и от иудеи,

8 и от Иерусалима, и от идумеи, и со онаго полу иордана. И от тира и сидона множество многое, слышавше, елика творяше, (и) приидоша к нему.

9 И рече учеником своим, да корабль будет у него народа ради, да не стужают ему.

10 Многи бо изцели, якоже нападати на него, да ему прикоснутся, елицы имеяху раны.

11 И дуси нечистии, егда видяху его, припадаху к нему и зваху, глаголюще, яко ты еси Сын Божий.

12 И много прещаше им, да не явлена его сотворят.

13 И взыде на гору и призва, ихже хотяше сам: и приидоша к нему.

14 И сотвори дванадесяте, да будут с ним, и да посылает их проповедати,

15 и имети власть целити недуги и изгонити бесы:

16 и нарече симону имя петр:

17 и иакова зеведеова и иоанна брата иаковля: и нарече има имена воанергес, еже есть сына громова:

18 и андреа, и филиппа, и варфоломеа, и матфеа, и фому, и иакова алфеова, и фаддеа, и симона кананита,

19 и иуду искариотскаго, иже и предаде его.

20 И приидоша в дом: и собрася паки народ, яко не мощи им ни хлеба ясти.

21 И слышавше иже бяху у него, изыдоша, да имут его: глаголаху бо, яко неистов есть.

22 И книжницы, иже от Иерусалима низшедшии, глаголаху, яко веельзевула имать и яко о князи бесовстем изгонит бесы.

23 И призвав их, в притчах глаголаше им: како может сатана сатану изгонити?

24 И аще царство на ся разделится, не может стати царство то:

25 и аще дом на ся разделится, не может стати дом той:

26 и аще сатана воста на ся сам и разделися, не может стати, но конец имать.

27 Никтоже может сосуды крепкаго, вшед в дом его, расхитити, аще не первее крепкаго свяжет: и тогда дом его расхитит.

28 Аминь глаголю вам, яко вся отпустятся согрешения сыном человеческим, и хуления, елика аще восхулят:

29 а иже восхулит на Духа святаго, не имать отпущения во веки, но повинен есть вечному суду.

30 Зане глаголаху: духа нечистаго имать.

31 Приидоша убо Мати и братия его, и вне стояще послаша к нему, зовуще его.

32 И седяше народ окрест его. Реша же ему: се, Мати твоя и братия твоя (и сестры твоя) вне ищут тебе.

33 И отвеща им, глаголя: кто есть Мати моя, или братия моя?

34 И соглядав окрест себе седящыя, глагола: се, Мати моя и братия моя:

35 иже бо аще сотворит волю Божию, сей брат мой и сестра моя и Мати (ми) есть.

Глава 4

1 И паки начат учити при мори: и собрася к нему народ мног, якоже самому влезшу в корабль, седети в мори: и весь народ при мори на земли бяше.

2 И учаше их притчами много и глаголаше им во учении своем:

3 слышите: се, изыде сеяй сеяти:

4 и бысть егда сеяше, ово паде при пути, и приидоша птицы, и позобаша е:

5 другое же паде при камени, идеже не имяше земли многи, и абие прозябе, зане не имяше глубины земныя:

6 солнцу же возсиявшу присвяде, и зане не имяше корене, изсше:

7 и другое паде в тернии, и взыде терние, и подави е: и плода не даде:

8 и другое паде на земли добрей, и даяше плод восходящь и растущь, и приплодоваше на тридесять, и на шестьдесят, и на сто.

9 И глаголаше: имеяй ушы слышати да слышит.

10 Егда же бысть един, вопросиша его, иже бяху с ним, со обеманадесяте о притчи.

11 И глаголаше им: вам есть дано ведати тайны Царствия Божия: онем же внешним в притчах вся бывают,

12 да видяще видят, и не узрят: и слышаще слышат, и не разумеют: да не когда обратятся, и оставятся им греси.

13 И глагола им: не весте ли притчи сея? и како вся притчи уразумеете?

14 Сеяй, слово сеет.

15 Сии же суть, иже при пути, идеже сеется слово, и егда услышат, абие приходит сатана и отемлет слово сеянное в сердцах их.

16 И сии суть такожде иже на каменных сеемии, иже егда услышат слово, абие с радостию приемлют е:

17 и не имут корения в себе, но привременни суть: таже бывшей печали или гонению словесе ради, абие соблажняются.

18 А сии суть, иже в тернии сеемии, слышащии слово:

19 и печали века сего, и лесть богатства, и о прочих похоти входящыя подавляют слово, и безплодно бывает.

20 И сии суть, иже на земли добрей сеяннии, иже слышат слово и приемлют, и плодствуют на тридесять, и на шестьдесят, и на сто.

21 И глаголаше им: еда светилник приходит, да под спудом положат его или под одром? не да ли на свещнице положен будет?

22 несть бо тайно, еже не явится, ниже бысть потаено, но да приидет в явление:

23 аще кто имать ушы слышати, да слышит.

24 И глаголаше им: блюдите что слышите: в нюже меру мерите, возмерится вам, и приложится вам слышащым:

25 иже бо аще имать, дастся ему: а иже не имать, и еже имать, отимется от него.

26 И глаголаше: тако есть (и) Царствие Божие, якоже человек вметает семя в землю,

27 и спит, и востает нощию и днию: и семя прозябает и растет, якоже не весть он:

28 от себе бо земля плодит прежде траву, потом клас, таже исполняет пшеницу в класе:

29 егда же созреет плод, абие послет серп, яко наста жатва.

30 И глаголаше: чесому уподобим Царствие Божие? или коей притчи приложим е?

31 яко зерно горушично, еже егда всеяно будет в земли, мнее всех семен есть земных:

32 и егда всеяно будет, возрастает, и бывает более всех зелий, и творит ветви велия, яко мощи под сению его птицам небесным витати.

33 И таковыми притчами многими глаголаше им слово, якоже можаху слышати.

34 Без притчи же не глаголаше им словесе: особь же учеником своим сказаше вся.

35 И глагола им в той день, вечеру бывшу: прейдем на он пол.

36 И отпущше народы, пояша его якоже бе в корабли: и инии же корабли бяху с ним.

37 И бысть буря ветрена велика: волны же вливахуся в корабль, яко уже погружатися ему.

38 И бе сам на корме на возглавнице спя. И возбудиша его и глаголаша ему: учителю, не радиши ли, яко погибаем?

39 И востав запрети ветру и рече морю: молчи, престани. И улеже ветр, и бысть тишина велия.

40 И рече им: что тако страшливи есте? како не имате веры?

41 И убояшася страхом велиим и глаголаху друг ко другу: кто убо сей есть, яко и ветр и море послушают его?

Глава 5

1 И приидоша на он пол моря, во страну гадаринскую.

2 И излезшу ему из корабля, абие срете его от гробов человек в дусе нечисте,

3 иже жилище имяше во гробех, и ни веригами никтоже можаше его связати:

4 зане ему многажды путы и ужы (железны) связану сущу, и растерзатися от него ужем (железным) и путом сокрушатися: и никтоже можаше его умучити:

5 и выну нощь и день во гробех и в горах бе, вопия и толкийся камением.

6 Узрев же Иисуса издалеча, тече и поклонися ему,

7 и возопив гласом велиим, рече: что мне и тебе, Иисусе, Сыне Бога вышняго? заклинаю тя Богом, не мучи мене.

8 глаголаше бо ему: изыди, душе нечистый, от человека.

9 И вопрошаше его: что ти есть имя? И отвеща глаголя: легеон имя мне, яко мнози есмы.

10 И молиша его много, да не послет их вне страны.

11 Бе же ту при горе стадо свиное велие пасомо.

12 И молиша его вси беси, глаголюще: посли ны во свиния, да в ня внидем.

13 И повеле им абие Иисус. И изшедше дуси нечистии, внидоша во свиния: и устремися стадо по брегу в море, бяху же яко две тысящы, и утопаху в мори.

14 Пасущии же свиния бежаша и возвестиша во граде и в селех. И изыдоша видети, что есть бывшее.

15 И приидоша ко Иисусови, и видеша бесновавшагося седяща и оболчена и смысляща, имевшаго легеон: и убояшася.

16 Поведаша же им видевшии, како бысть бесному, и о свиниях.

17 И начаша молити его отити от предел их.

18 И влезшу ему в корабль, моляше его бесновавыйся, дабы был с ним.

19 Иисус же не даде ему, но рече ему: иди в дом твой ко твоим и возвести им, елика ти Господь сотвори и помилова тя.

20 И иде и нача проповедати в десяти градех, елика сотвори ему Иисус. И вси дивляхуся.

21 И прешедшу Иисусу в корабли паки на он пол, собрася народ мног о нем. И бе при мори.

22 И се, прииде един от архисинагог, именем иаир, и видев его, паде при ногу его

23 и моляше его много, глаголя, яко дщи моя на кончине есть: да пришед возложиши на ню руце, яко да спасется и жива будет.

24 И иде с ним: и по нем идяху народи мнози и угнетаху его.

25 И жена некая сущи в точении крове лет дванадесяте,

26 и много пострадавши от мног врачев, и издавши своя вся, и ни единыя пользы обретши, но паче в горшее пришедши:

27 слышавши о Иисусе, пришедши в народе созади, прикоснуся ризе его:

28 глаголаше бо, яко, аще прикоснуся ризам его, спасена буду.

29 И абие изсякну источник крове ея: и разуме телом, яко изцеле от раны.

30 И абие Иисус разуме в себе силу изшедшую от него, (и) обращься в народе, глаголаше: кто прикоснуся ризам моим?

31 И глаголаху ему ученицы его: видиши народ угнетающь тя, и глаголеши: кто прикоснуся мне?

32 И обглядаше видети сотворшую сие.

33 Жена же убоявшися и трепещущи, ведящи, еже бысть ей, прииде и припаде к нему и рече ему всю истину.

34 Он же рече ей: дщи, вера твоя спасе тя: иди в мире и буди цела от раны твоея.

35 Еще ему глаголющу, (и) приидоша от архисинагога, глаголюще, яко дщи твоя умре: что еще движеши учителя?

36 Иисус же абие слышав слово глаголемое, глагола архисинагогови: не бойся, токмо веруй.

37 И не остави по себе ни единаго ити, токмо петра и иакова и иоанна брата иаковля.

38 И прииде в дом архисинагогов и виде молву, плачущыяся и кричащыя много.

39 И вшед глагола им: что молвите и плачетеся? отроковица несть умерла, но спит.

40 И ругахуся ему. Он же изгнав вся, поят отца отроковицы и матерь, и иже (беху) с ним, и вниде, идеже бе отроковица лежащи.

41 И емь за руку отроковицу, глагола ей: талифа куми: еже есть сказаемо: девице, тебе глаголю, востани.

42 И абие воста девица и хождаше: бе бо лет двоюнадесяте. И ужасошася ужасом велиим.

43 И запрети им много, да никтоже увесть сего, и рече: дадите ей ясти.

Глава 6

1 И изыде оттуду и прииде во отечествие свое: и по нем идоша ученицы его.

2 И бывшей субботе, начат на сонмищи учити. И мнози слышащии дивляхуся, глаголюще: откуду сему сия? и что премудрость данная ему, и силы таковы рукама его бывают?

3 не сей ли есть тектон, Сын Мариин, брат же иакову и иосии и иуде и симону? и не сестры ли его зде (суть) в нас? И блажняхуся о нем.

4 глаголаше же им Иисус, яко несть пророк без чести, токмо во отечествии своем, и в сродстве и в дому своем.

5 И не можаше ту ни единыя силы сотворити, токмо мало недужных, возложь руце, изцели.

6 И дивляшеся за неверствие их: и обхождаше веси окрест учя.

7 И призва обанадесяте, и начат их посылати два два, и даяше им власть над духи нечистыми.

8 И заповеда им, да ничесоже возмут на путь, токмо жезл един: ни пиры, ни хлеба, ни при поясе меди:

9 но обувени в сандалия: и не облачитися в две ризе.

10 И глаголаше им: идеже аще внидете в дом, ту пребывайте, дондеже изыдете оттуду:

11 и елицы аще не приимут вы, ниже послушают вас, исходяще оттуду, оттрясите прах, иже под ногами вашими, во свидетелство им: аминь глаголю вам, отраднее будет содомом и гоморром в день судный, неже граду тому.

12 И изшедше проповедаху, да покаются:

13 и бесы многи изгоняху: и мазаху маслом многи недужныя, и изцелеваху.

14 И услыша царь ирод: яве бо бысть имя его: и глаголаше, яко иоанн креститель от мертвых воста, и сего ради силы деются о нем.

15 Инии глаголаху, яко илиа есть: инии же глаголаху, яко пророк есть, или яко един от пророк.

16 Слышав же ирод рече, яко, егоже аз усекнух иоанна, той есть: той воста от мертвых.

17 Той бо ирод послав, ят иоанна и связа его в темнице, иродиады ради жены филиппа брата своего, яко оженися ею.

18 Глаголаше бо иоанн иродови: не достоит тебе имети жену (филиппа) брата твоего.

19 Иродиа же гневашеся на него и хотяше его убити: и не можаше.

20 Ирод бо бояшеся иоанна, ведый его мужа праведна и свята, и соблюдаше его: и послушав его, многа творяше, и в сладость его послушаше.

21 И приключшуся дню потребну, егда ирод рождеству своему вечерю творяше князем своим и тысящником и старейшинам галилейским:

22 и вшедши дщерь тоя иродиады, и плясавши, и угождши иродови и возлежащым с ним, рече царь девице: проси у мене егоже аще хощеши, и дам ти.

23 И клятся ей: яко егоже аще попросиши у мене, дам ти, и до пол царствия моего.

24 Она же изшедши рече матери своей: чесо прошу? Она же рече: главы иоанна крестителя.

25 И вшедши абие со тщанием к царю, просяше, глаголющи: хощу, да ми даси от него на блюде главу иоанна крестителя.

26 И прискорбен быв царь, клятвы (же) ради и за возлежащих с ним не восхоте отрещи ей.

27 И абие послав царь спекулатора, повеле принести главу его.

28 Он же шед усекну его в темнице, и принесе главу его на блюде, и даде ю девице: и девица даде ю матери своей.

29 И слышавше ученицы его, приидоша и взяша труп его, и положиша его во гробе.

30 И собрашася апостоли ко Иисусу и возвестиша ему вся, и елика сотвориша, и елика научиша.

31 И рече им: приидите вы сами в пусто место едини и почийте мало. Бяху бо приходящии и отходящии мнози, и ни ясти им бе когда.

32 И идоша в пусто место кораблем едини.

33 И видеша их идущих народи, и познаша их мнози: и пеши от всех градов стицахуся тамо, и предвариша их, и снидошася к нему.

34 И изшед виде Иисус народ мног и милосердова о них, зане бяху яко овцы не имущыя пастыря: и начат их учити много.

35 И уже часу многу бывшу, приступльше к нему ученицы его, глаголаша, яко пусто есть место, и уже час мног:

36 отпусти их, да шедше во окрестных селех и весех купят себе хлебы: не имут бо чесо ясти.

37 Он же отвещав рече им: дадите им вы ясти. И глаголаша ему: да шедше купим двема стома пенязь хлебы и дамы им ясти?

38 Он же рече им: колико хлебы имате? идите и видите. И уведевше глаголаша: пять (хлеб), и две рыбе.

39 И повеле им посадити вся на споды на споды на траве зелене.

40 И возлегоша на лехи на лехи по сту и по пятидесят.

41 И приемь пять хлеб и две рыбе, воззрев на небо, благослови и преломи хлебы, и даяше учеником своим, да предлагают пред ними: и обе рыбе раздели всем.

42 И ядоша вси и насытишася:

43 и взяша укрухи, дванадесяте кошя исполнь, и от рыбу.

44 Бяше же ядших хлебы яко пять тысящ мужей.

45 И абие понуди ученики своя внити в корабль и варити его на он пол к вифсаиде, дондеже сам отпустит народы.

46 И отрекся им, иде в гору помолитися.

47 И вечеру бывшу, бе корабль посреде моря, и сам един на земли.

48 И виде их страждущих в плавании: бе бо ветр противен им: и о четвертей стражи нощней прииде к ним, по морю ходяй, и хотяше минути их.

49 Они же видевше его ходяща по морю, мняху призрак быти и возопиша.

50 Вси бо его видеша и смутишася. И абие глагола с ними и рече им: дерзайте: аз есмь, не бойтеся.

51 И вниде к ним в корабль: и улеже ветр. И зело излиха в себе ужасахуся и дивляхуся.

52 Не разумеша бо о хлебех: бе бо сердце их окаменено.

53 И прешедше приидоша в землю геннисаретску и присташа.

54 И изшедшым им из корабля, абие познаша его,

55 обтекше всю страну ту, начаша на одрех приносити болящыя, идеже слышаху, яко ту есть.

56 И аможе аще вхождаше в веси, или во грады, или села, на распутиих полагаху недужныя и моляху его, да поне воскрилию ризы его прикоснутся: и елицы аще прикасахуся ему, спасахуся.

Глава 7

1 И собрашася к нему фарисее и нецыи от книжник, пришедшии от Иерусалима:

2 и видевше некиих от ученик его нечистыми руками, сиречь неумовеными, ядущих хлебы, ругахуся.

3 Фарисее бо и вси иудее, аще не трыюще умыют рук, не ядят, держаще предания старец:

4 и от торжища, аще не покуплются, не ядят. И ина многа суть, яже прияша держати: погружения сткляницам и чваном и котлом и одром.

5 Потом же вопрошаху его фарисее и книжницы: почто ученицы твои не ходят по преданию старец, но неумовеными руками ядят хлеб?

6 Он же отвещав рече им, яко добре пророчествова исаиа о вас лицемерех, якоже есть писано: сии людие устнами мя чтут, сердце же их далече отстоит от мене,

7 всуе же чтут мя, учаще учением, заповедем человеческим:

8 оставльше бо заповедь Божию, держите предания человеческая, крещения чваном и сткляницам, и ина подобна такова многа творите.

9 И глаголаше им: добре отметаете заповедь Божию, да предание ваше соблюдете:

10 Моисей бо рече: чти отца твоего и матерь твою: и иже злословит отца или матерь, смертию да умрет:

11 вы же глаголете: аще речет человек отцу или матери: корван, еже есть дар, иже аще пользовался еси от мене:

12 и не ктому оставляете его что сотворити отцу своему или матери своей,

13 преступающе слово Божие преданием вашим, еже предасте: и подобна такова многа творите.

14 И призвав весь народ, глаголаше им: послушайте мене вси и разумейте:

15 ничтоже есть внеуду человека входимо в онь, еже может осквернити его: но исходящая от него, та суть сквернящая человека:

16 аще кто имать ушы слышати, да слышит.

17 И егда вниде в дом от народа, вопрошаху его ученицы его о притчи.

18 И глагола им: тако ли и вы неразумливи есте? не разумеете ли, яко все, еже извне входимое в человека, не может осквернити его?

19 яко не входит ему в сердце, но во чрево: и афедроном исходит, истребляя вся брашна.

20 глаголаше же, яко исходящее от человека, то сквернит человека:

21 извнутрь бо от сердца человеческа помышления злая исходят, прелюбодеяния, любодеяния, убийства,

22 татьбы, лихоимства, (обиды,) лукавствия, лесть, студодеяния, око лукаво, хула, гордыня, безумство:

23 вся сия злая извнутрь исходят и сквернят человека.

24 И оттуду востав, иде в пределы тирски и сидонски: и вшед в дом, ни когоже хотяше, дабы его чул: и не може утаитися.

25 Слышавши бо жена о нем, еяже дщи имяше духа нечиста, пришедши припаде к ногама его:

26 жена же бе еллинска, сирофиникисса родом: и моляше его, да беса изженет из дщере ея.

27 Иисус же рече ей: остави, да первее насытятся чада: несть бо добро отяти хлеб чадом и поврещи псом.

28 Она же отвещавши глагола ему: ей, Господи: ибо и пси под трапезою ядят от крупиц детей.

29 И рече ей: за сие слово, иди: изыде бес из дщере твоея.

30 И шедши в дом свой, обрете беса изшедша и дщерь лежащу на одре.

31 И паки изшед Иисус от предел тирских и сидонских, прииде на море галилейско, между пределы декапольски.

32 И приведоша к нему глуха и гугнива, и моляху его, да возложит нань руку.

33 И поемь его от народа единаго, вложи персты своя во ушы его и плюнув коснуся языка его:

34 и воззрев на небо, воздохну и глагола ему: еффафа, еже есть разверзися.

35 И абие разверзостася слуха его, и разрешися уза языка его, и глаголаше право.

36 И запрети им, да ни комуже поведят: елико же им той запрещаше, паче излиха проповедаху.

37 И преизлиха дивляхуся, глаголюще: добре все творит: и глухия творит слышати, и немыя глаголати.

Глава 8

1 В тыя дни, зело многу народу сущу, и не имущым чесо ясти, призвав Иисус ученики своя, глагола им:

2 милосердую о народе, яко уже три дни приседят мне и не имут чесо ясти:

3 и аще отпущу их не ядших в домы своя, ослабеют на пути: мнози бо от них издалеча пришли суть.

4 И отвещаша ему ученицы его: откуду сих возможет кто зде насытити хлебы в пустыни?

5 И вопроси их: колико имате хлебов? Они же реша: седмь.

6 И повеле народу возлещи на земли: и приемь седмь хлебов, хвалу воздав, преломи и даяше учеником своим, да предлагают: и предложиша пред народом.

7 И имяху рыбиц мало: и (сия) благословив, рече предложити и тыя.

8 Ядоша же и насытишася: и взяша избытки укрух, седмь кошниц.

9 Бяху же ядших яко четыре тысящы. И отпусти их.

10 И абие влез в корабль со ученики своими, прииде во страны далмануфански.

11 И изыдоша фарисее и начаша стязатися с ним, ищуще от него знамения с небесе, искушающе его.

12 И воздохнув духом своим, глагола: что род сей знамения ищет? аминь глаголю вам, аще дастся роду сему знамение.

13 И оставль их, влез паки в корабль, (и) иде на он пол.

14 И забыша ученицы его взяти хлебы и разве единаго хлеба не имяху с собою в корабли.

15 И прещаше им, глаголя: зрите, блюдитеся от кваса фарисейска и от кваса иродова.

16 И помышляху, друг ко другу глаголюще, яко хлебы не имамы.

17 И разумев Иисус, глагола им: что помышляете, яко хлебы не имате? не у ли чувствуете, ниже разумеете? еще ли окаменено сердце ваше имате?

18 очи имуще не видите? и ушы имуще не слышите? и не помните ли,

19 егда пять хлебы преломих в пять тысящ, колико кош исполнь укрух приясте? Глаголаша ему: дванадесять.

20 Егда же седмь в четыре тысящы, колико кошниц исполнения укрух взясте? Они же реша: седмь.

21 И глагола им: како не разумеете?

22 И прииде в вифсаиду: и приведоша к нему слепа, и моляху его, да его коснется.

23 И емь за руку слепаго, изведе его вон из веси: и плюнув на очи его, (и) возложь руце нань, вопрошаше его, аще что видит?

24 И воззрев глаголаше: вижу человеки яко древие ходящя.

25 Потом (же) паки возложи руце на очи его и сотвори его прозрети: и утворися и узре светло все.

26 И посла его в дом его, глаголя: ни в весь вниди, ни повеждь кому в веси.

27 И изыде Иисус и ученицы его в веси кесарии филипповы: и на пути вопрошаше ученики своя, глаголя им: кого мя глаголют человецы быти?

28 Они же отвещаша: иоанна крестителя: и инии илию: друзии же единаго от пророк.

29 И той глагола им: вы же кого мя глаголете быти? Отвещав же петр глагола ему: ты еси Христос.

30 И запрети им, да ни комуже глаголют о нем.

31 И начат учити их, яко подобает Сыну Человеческому много пострадати, и искушену быти от старец и архиерей и книжник, и убиену быти, и в третий день воскреснути.

32 И не обинуяся слово глаголаше. И приемь его петр, начат претити ему.

33 Он же обращься и воззрев на ученики своя, запрети петрови, глаголя: иди за мною, сатано: яко не мыслиши, яже (суть) Божия, но яже человеческа.

34 И призвав народы со ученики своими, рече им: иже хощет по мне ити, да отвержется себе, и возмет крест свой, и по мне грядет:

35 иже бо аще хощет душу свою спасти, погубит ю: а иже погубит душу свою мене ради и Евангелиа, той спасет ю:

36 кая бо польза человеку, аще приобрящет мир весь, и отщетит душу свою?

37 или что даст человек измену на души своей?

38 иже бо аще постыдится мене и моих словес в роде сем прелюбодейнем и грешнем, и Сын Человеческий постыдится его, егда приидет во славе Отца своего со ангелы святыми.