Текст книги "Новый Завет (на цсл., гражданским шрифтом)"

Автор книги: Завет Новый

сообщить о нарушении

Текущая страница: 4 (всего у книги 35 страниц) [доступный отрывок для чтения: 13 страниц]

Глава 21

1 И егда приближишася во Иерусалим и приидоша в вифсфагию к горе елеонстей, тогда Иисус посла два ученика,

2 глаголя има: идита в весь, яже прямо вама: и абие обрящета осля привязано, и жребя с ним: отрешивша приведита ми:

3 и аще вама кто речет что, речета, яко Господь ею требует: абие же послет я.

4 Сие же все бысть, да сбудется реченное пророком, глаголющим:

5 рцыте дщери сионове: се, Царь твой грядет тебе кроток, и всед на осля и жребя, сына подяремнича.

6 Шедша же ученика и сотворша, якоже повеле има Иисус,

7 приведоста осля и жребя: и возложиша верху ею ризы своя, и вседе верху их.

8 Множайшии же народи постилаху ризы своя по пути: друзии же резаху ветви от древ и постилаху по пути.

9 Народи же предходящии (ему) и вследствующии зваху, глаголюще: осанна Сыну давидову: благословен грядый во имя Господне: осанна в вышних.

10 И вшедшу ему во Иерусалим, потрясеся весь град, глаголя: кто есть сей?

11 Народи же глаголаху: сей есть Иисус пророк, иже от назарета галилейска.

12 И вниде Иисус в церковь Божию и изгна вся продающыя и купующыя в церкви, и трапезы торжником испроверже и седалища продающих голуби,

13 и глагола им: писано есть: храм мой храм молитвы наречется: вы же сотвористе и вертеп разбойником.

14 И приступиша к нему хромии и слепии в церкви: и изцели их.

15 Видевше же архиерее и книжницы чудеса, яже сотвори, и отроки зовущя в церкви и глаголющя: осанна Сыну давидову, негодоваша

16 и реша ему: слышиши ли, что сии глаголют? Иисус же рече им: ей: несте ли чли николиже, яко из уст младенец и ссущих совершил еси хвалу?

17 И оставль их, изыде вон из града в вифанию и водворися ту.

18 Утру же возвращься во град, взалка:

19 и узрев смоковницу едину при пути, прииде к ней, и ничтоже обрете на ней, токмо листвие едино, и глагола ей: да николиже от тебе плода будет во веки. И абие изсше смоковница.

20 И видевше ученицы дивишася, глаголюще: како абие изсше смоковница?

21 Отвещав же Иисус рече им: аминь глаголю вам: аще имате веру и не усумнитеся, не токмо смоковничное сотворите, но аще и горе сей речете: двигнися и верзися в море, будет:

22 и вся, елика аще воспросите в молитве верующе, приимете.

23 И пришедшу ему в церковь, приступиша к нему учащу архиерее и старцы людстии, глаголюще: коею властию сия твориши? и кто ти даде власть сию?

24 Отвещав же Иисус рече им: вопрошу вы и аз слово едино: еже аще речете мне, и аз вам реку, коею властию сия творю:

25 крещение иоанново откуду бе? с небесе ли, или от человек? Они же помышляху в себе, глаголюще: аще речем, с небесе: речет нам: почто убо не веровасте ему?

26 аще ли речем, от человек: боимся народа: вси бо имут иоанна яко пророка.

27 И отвещавше Иисусови реша: не вемы. Рече им и той: ни аз вам глаголю, коею властию сия творю.

28 Что же ся вам мнит? Человек некий имяше два сына, и пришед к первому, рече: чадо, иди днесь, делай в винограде моем.

29 Он же отвещав рече: не хощу: последи же раскаявся, иде.

30 И приступль к другому, рече такоже. Он же отвещав рече: аз, господи (иду): и не иде.

31 Кий от обою сотвори волю отчу? Глаголаша ему: первый. глагола им Иисус: аминь глаголю вам, яко мытари и любодейцы варяют вы в Царствии Божии:

32 прииде бо к вам иоанн (креститель) путем праведным, и не веровасте ему, мытари же и любодейцы вероваша ему: вы же видевше, не раскаястеся последи веровати ему.

33 Ину притчу слышите. Человек некий бе домовит, иже насади виноград, и оплотом огради его, и ископа в нем точило, и созда столп, и вдаде и делателем, и отиде.

34 Егда же приближися время плодов, посла рабы своя к делателем прияти плоды его:

35 и емше делателе рабов его, оваго убо биша, оваго же убиша, оваго же камением побиша.

36 Паки посла ины рабы множайшя первых: и сотвориша им такоже.

37 Последи же посла к ним сына своего, глаголя: усрамятся сына моего.

38 Делателе же видевше сына, реша в себе: сей есть наследник: приидите, убием его и удержим достояние его.

39 И емше его изведоша вон из винограда и убиша.

40 Егда убо приидет господин винограда, что сотворит делателем тем?

41 Глаголаша ему: злых зле погубит их, и виноград предаст иным делателем, иже воздадят ему плоды во времена своя.

42 глагола им Иисус: несте ли чли николиже в писаниих: камень, егоже не в ряду сотвориша зиждущии, сей бысть во главу угла? от Господа бысть сие, и есть дивно во очию вашею.

43 Сего ради глаголю вам, яко отимется от вас Царствие Божие и дастся языку творящему плоды его:

44 и падый на камени сем сокрушится: а на немже падет, сотрыет и.

45 И слышавше архиерее и фарисее притчи его, разумеша, яко о них глаголет:

46 и ищуще его яти, убояшася народа, понеже яко пророка его имеяху.

Глава 22

1 И отвещав Иисус, паки рече им в притчах, глаголя:

2 уподобися Царствие небесное человеку царю, иже сотвори браки сыну своему

3 и посла рабы своя призвати званныя на браки: и не хотяху приити.

4 Паки посла ины рабы, глаголя: рцыте званным: се, обед мой уготовах, юнцы мои и упитанная исколена, и вся готова: приидите на браки.

5 Они же небрегше отидоша, ов убо на село свое, ов же на купли своя:

6 прочии же емше рабов его, досадиша им и убиша их.

7 И слышав царь той разгневася, и послав воя своя, погуби убийцы оны и град их зажже.

8 Тогда глагола рабом своим: брак убо готов есть, званнии же не быша достойни:

9 идите убо на исходища путий, и елицех аще обрящете, призовите на браки.

10 И изшедше раби они на распутия, собраша всех, елицех обретоша, злых же и добрых: и исполнися брак возлежащих.

11 Вшед же царь видети возлежащих, виде ту человека не оболчена во одеяние брачное,

12 и глагола ему: друже, како вшел еси семо не имый одеяния брачна? Он же умолча.

13 Тогда рече царь слугам: связавше ему руце и нозе, возмите его и вверзите во тму кромешнюю: ту будет плачь и скрежет зубом:

14 мнози бо суть звани, мало же избранных.

15 Тогда шедше фарисее, совет восприяша, яко да обольстят его словом.

16 И посылают к нему ученики своя со иродианы, глаголюще: учителю, вемы, яко истинен еси, и пути Божию воистинну учиши, и нерадиши ни о комже: не зриши бо на лице человеком:

17 рцы убо нам, что ти ся мнит? достойно ли есть дати кинсон кесареви, или ни?

18 Разумев же Иисус лукавство их, рече: что мя искушаете, лицемери?

19 покажите ми златицу кинсонную. Они же принесоша ему пенязь.

20 И глагола им: чий образ сей и написание?

21 (И) глаголаша ему: кесарев. Тогда глагола им: воздадите убо кесарева кесареви, и Божия Богови.

22 И слышавше дивишася: и оставльше его отидоша.

23 В той день приступиша к нему саддукее, иже глаголют не быти воскресению, и вопросиша его,

24 глаголюще: учителю, моисей рече: аще кто умрет не имый чад, (да) поймет брат его жену его и воскресит семя брата своего:

25 беша же в нас седмь братия: и первый оженься умре, и не имый семене, остави жену свою брату своему:

26 такожде же и вторый, и третий, даже до седмаго:

27 последи же всех умре и жена:

28 в воскресение убо, котораго от седмих будет жена? вси бо имеша ю.

29 Отвещав же Иисус рече им: прельщаетеся, не ведуще писания, ни силы Божия:

30 в воскресение бо ни женятся, ни посягают, но яко ангели Божии на небеси суть:

31 о воскресении же мертвых несте ли чли реченнаго вам Богом, глаголющим:

32 аз есмь Бог авраамов, и Бог исааков, и Бог иаковль? несть Бог Бог мертвых, но (Бог) живых.

33 И слышавше народи дивляхуся о учении его.

34 Фарисее же слышавше, яко посрами саддукеи, собрашася вкупе.

35 И вопроси един от них законоучитель, искушая его и глаголя:

36 учителю, кая заповедь болши (есть) в законе?

37 Иисус же рече ему: возлюбиши Господа Бога твоего всем сердцем твоим, и всею душею твоею, и всею мыслию твоею:

38 сия есть первая и болшая заповедь:

39 вторая же подобна ей: возлюбиши искренняго твоего яко сам себе:

40 в сию обою заповедию весь закон и пророцы висят.

41 Собравшымся же фарисеом, вопроси их Иисус,

42 глаголя: что вам мнится о Христе? чий есть Сын? Глаголаша ему: давидов.

43 глагола им: како убо давид Духом Господа его нарицает, глаголя:

44 рече Господь Господеви моему: седи одесную мене, дондеже положу враги твоя подножие ногама твоима?

45 аще убо давид нарицает его Господа, како Сын ему есть?

46 И никтоже можаше отвещати ему словесе: ниже смеяше кто от того дне вопросити его ктому.

Глава 23

1 Тогда Иисус глагола к народом и учеником своим,

2 глаголя: на моисеове седалищи седоша книжницы и фарисее:

3 вся убо, елика аще рекут вам блюсти, соблюдайте и творите: по делом же их не творите: глаголют бо, и не творят:

4 связуют бо бремена тяжка и бедне носима, и возлагают на плеща человеческа, перстом же своим не хотят двигнути их.

5 Вся же дела своя творят, да видими будут человеки: разширяют же хранилища своя и величают воскрилия риз своих:

6 любят же преждевозлегания на вечерях, и преждеседания на сонмищих,

7 и целования на торжищих, и зватися от человек: учителю, учителю.

8 Вы же не нарицайтеся учителие: един бо есть ваш учитель, Христос: вси же вы братия есте:

9 и отца не зовите себе на земли: един бо есть Отец ваш, иже на небесех:

10 ниже нарицайтеся наставницы: един бо есть наставник ваш, Христос.

11 Болий же в вас да будет вам слуга:

12 иже бо вознесется, смирится: и смиряяйся вознесется.

13 Горе вам, книжницы и фарисее, лицемери, яко затворяете Царствие небесное пред человеки: вы бо не входите, ни входящих оставляете внити.

14 Горе вам, книжницы и фарисее, лицемери, яко снедаете домы вдовиц, и виною далече молитвы творяще: сего ради лишшее приимете осуждение.

15 Горе вам, книжницы и фарисее, лицемери, яко преходите море и сушу, сотворити единаго пришелца: и егда будет, творите его сына геенны сугубейша вас.

16 Горе вам, вожди слепии, глаголющии: иже аще кленется церковию, ничесоже есть: а иже кленется златом церковным, должен есть.

17 Буи и слепии, что бо более есть, злато ли, или церковь, святящая злато?

18 И: иже аще кленется олтарем, ничесоже есть: а иже кленется даром, иже верху его, должен есть.

19 Буи и слепии, что бо более, дар ли, или олтарь, святяй дар?

20 Иже убо кленется олтарем, кленется им и сущим верху его:

21 и иже кленется церковию, кленется ею и живущим в ней:

22 и кленыйся небесем кленется престолом Божиим и седящим на нем.

23 Горе вам, книжницы и фарисее, лицемери, яко одесятствуете мятву и копр и кимин, и остависте вящшая закона, суд и милость и веру: сия (же) подобаше творити, и онех не оставляти.

24 Вожди слепии, оцеждающии комары, велблуды же пожирающе.

25 Горе вам, книжницы и фарисее лицемери, яко очищаете внешнее сткляницы и блюда, внутрьуду же суть полни хищения и неправды:

26 фарисее слепый, очисти прежде внутреннее сткляницы и блюда, да будет и внешнее има чисто.

27 Горе вам, книжницы и фарисее, лицемери, яко подобитеся гробом повапленым, иже внеуду убо являются красны, внутрьуду же полни суть костей мертвых и всякия нечистоты:

28 тако и вы, внеуду убо являетеся человеком праведни, внутрьуду же есте полни лицемерия и беззакония.

29 Горе вам, книжницы и фарисее, лицемери, яко зиждете гробы пророческия, и красите раки праведных,

30 и глаголете: аще быхом были во дни отец наших, не быхом убо общницы им были в крови пророк:

31 темже сами свидетелствуете себе, яко сынове есте избивших пророки:

32 и вы исполните меру отец ваших.

33 Змия, порождения ехиднова, како убежите от суда (огня) геенскаго?

34 Сего ради, се, аз послю к вам пророки и премудры и книжники: и от них убиете и распнете, и от них биете на сонмищих ваших, и изженете от града во град:

35 яко да приидет на вы всяка кровь праведна, проливаемая на земли, от крове авеля праведнаго до крове захарии сына варахиина, егоже убисте между церковию и олтарем.

36 Аминь глаголю вам: (яко) приидут вся сия на род сей.

37 Иерусалиме, Иерусалиме, избивый пророки и камением побиваяй посланныя к тебе, колькраты восхотех собрати чада твоя, якоже собирает кокош птенцы своя под криле, и не восхотесте?

38 Се, оставляется вам дом ваш пуст.

39 глаголю бо вам: (яко) не имате мене видети отселе, дондеже речете: благословен грядый во имя Господне.

Глава 24

1 И изшед Иисус идяше от церкве. И приступиша (к нему) ученицы его показати ему здания церковная.

2 Иисус же рече им: не видите ли вся сия? аминь глаголю вам, не имать остати зде камень на камени, иже не разорится.

3 Седящу же ему на горе елеонстей, приступиша к нему ученицы на едине, глаголюще: рцы нам, когда сия будут? и что есть знамение твоего пришествия и кончина века?

4 И отвещав Иисус рече им: блюдите, да никтоже вас прельстит:

5 мнози бо приидут во имя мое, глаголюще: аз есмь Христос: и многи прельстят.

6 Услышати же имате брани и слышания бранем. Зрите, не ужасайтеся, подобает бо всем (сим) быти: но не тогда есть кончина.

7 Востанет бо язык на язык, и царство на царство: и будут глади и пагубы и труси по местом:

8 вся же сия начало болезнем.

9 Тогда предадят вы в скорби и убиют вы: и будете ненавидими всеми языки имене моего ради.

10 И тогда соблазнятся мнози, и друг друга предадят, и возненавидят друг друга:

11 и мнози лжепророцы востанут и прельстят многия:

12 и за умножение беззакония, изсякнет любы многих.

13 Претерпевый же до конца, той спасется.

14 И проповестся сие Евангелие Царствия по всей вселенней, во свидетелство всем языком: и тогда приидет кончина.

15 Егда убо узрите мерзость запустения, реченную даниилом пророком, стоящу на месте святе: иже чтет, да разумеет:

16 тогда сущии во иудеи да бежат на горы:

17 (и) иже на крове, да не сходит взяти яже в дому его:

18 и иже на селе, да не возвратится вспять взяти риз своих.

19 Горе же непраздным и доящым в тыя дни.

20 Молитеся же, да не будет бегство ваше в зиме, ни в субботу.

21 Будет бо тогда скорбь велия, яковаже не была от начала мира доселе, ниже имать быти.

22 И аще не быша прекратилися дние оны, не бы убо спаслася всяка плоть: избранных же ради прекратятся дние оны.

23 Тогда аще кто речет вам: се, зде Христос, или онде: не имите веры:

24 востанут бо лжехристи и лжепророцы и дадят знамения велия и чудеса, якоже прельстити, аще возможно, и избранныя.

25 Се, прежде рех вам.

26 Аще убо рекут вам: се, в пустыни есть, не изыдите: се, в сокровищих, не имите веры:

27 якоже бо молния исходит от восток и является до запад, тако будет пришествие Сына Человеческаго:

28 идеже бо аще будет труп, тамо соберутся орли.

29 Абие же, по скорби дний тех, солнце померкнет, и луна не даст света своего, и звезды спадут с небесе, и силы небесныя подвигнутся:

30 и тогда явится знамение Сына Человеческаго на небеси: и тогда восплачутся вся колена земная и узрят Сына Человеческаго грядуща на облацех небесных с силою и славою многою:

31 и послет ангелы своя с трубным гласом велиим, и соберут избранныя его от четырех ветр, от конец небес до конец их.

32 От смоковницы же научитеся притчи: егда уже ваия ея будут млада, и листвие прозябнет, ведите, яко близ есть жатва:

33 тако и вы, егда видите сия вся, ведите, яко близ есть, при дверех.

34 Аминь глаголю вам, не мимоидет род сей, дондеже вся сия будут:

35 небо и земля мимоидет, словеса же моя не мимоидут.

36 О дни же том и часе никтоже весть, ни ангели небеснии, токмо Отец мой един:

37 якоже (бо бысть во) дни ноевы, тако будет и пришествие Сына Человеческаго:

38 якоже бо беху во дни прежде потопа ядуще и пиюще, женящеся и посягающе, до негоже дне вниде ное в ковчег,

39 и не уведеша, дондеже прииде вода и взят вся: тако будет и пришествие Сына Человеческаго:

40 тогда два будета на селе: един поемлется, а другий оставляется:

41 две мелюще в жерновех: едина поемлется, и едина оставляется.

42 Бдите убо, яко не весте, в кий час Господь ваш приидет.

43 Сие же ведите, яко аще бы ведал дому владыка, в кую стражу тать приидет, бдел убо бы и не бы дал подкопати храма своего.

44 Сего ради и вы будите готови: яко, в оньже час не мните, Сын Человеческий приидет.

45 Кто убо есть верный раб и мудрый, егоже поставит господин его над домом своим, еже даяти им пищу во время (их)?

46 блажен раб той, егоже, пришед господин его, обрящет тако творяща:

47 аминь глаголю вам, яко над всем имением своим поставит его.

48 Аще ли же речет злый раб той в сердцы своем: коснит господин мой приити,

49 и начнет бити клевреты своя, ясти же и пити с пияницами:

50 приидет господин раба того в день, в оньже не чает, и в час, в оньже не весть,

51 и растешет его полма, и часть его с неверными положит: ту будет плачь и скрежет зубом.

Глава 25

1 Тогда уподобися Царствие небесное десятим девам, яже прияша светилники своя и изыдоша в сретение жениху:

2 пять же бе от них мудры и пять юродивы.

3 Юродивыя же, приемшя светилники своя, не взяша с собою елеа:

4 мудрыя же прияша елей в сосудех со светилники своими:

5 коснящу же жениху, воздремашася вся и спаху.

6 Полунощи же вопль бысть: се, жених грядет, исходите в сретение его.

7 Тогда восташа вся девы тыя и украсиша светилники своя.

8 Юродивыя же мудрым реша: дадите нам от елеа вашего, яко светилницы наши угасают.

9 Отвещаша же мудрыя, глаголющя: еда како не достанет нам и вам: идите же паче к продающым и купите себе.

10 Идущым же им купити, прииде жених: и готовыя внидоша с ним на браки, и затворены быша двери.

11 Последи же приидоша и прочыя девы, глаголющя: господи, господи, отверзи нам.

12 Он же отвещав рече им: аминь глаголю вам, не вем вас.

13 Бдите убо, яко не весте дне ни часа, в оньже Сын Человеческий приидет.

14 Якоже бо человек некий отходя призва своя рабы и предаде им имение свое:

15 и овому убо даде пять талант, овому же два, овому же един, комуждо противу силы его: и отиде абие.

16 Шед же приемый пять талант, дела в них и сотвори другия пять талант:

17 такожде и иже два, приобрете и той другая два:

18 приемый же един, шед вкопа (его) в землю и скры сребро господина своего.

19 По мнозе же времени прииде господин раб тех и стязася с ними о словеси.

20 И приступль пять талант приемый, принесе другия пять талант, глаголя: господи, пять талант ми еси предал: се, другия пять талант приобретох ими.

21 Рече же ему господь его: добре, рабе благий и верный: о мале был еси верен, над многими тя поставлю: вниди в радость господа твоего.

22 Приступль же и иже два таланта приемый, рече: господи, два таланта ми еси предал: се, другая два таланта приобретох има.

23 Рече (же) ему господь его: добре, рабе благий и верный: о мале (ми) был еси верен, над многими тя поставлю: вниди в радость господа твоего.

24 Приступль же и приемый един талант, рече: господи, ведях тя, яко жесток еси человек, жнеши, идеже не сеял еси, и собираеши идеже не расточил еси:

25 и убоявся, шед скрых талант твой в земли: (и) се, имаши твое.

26 Отвещав же господь его рече ему: лукавый рабе и ленивый, ведел еси, яко жну идеже не сеях, и собираю идеже не расточих:

27 подобаше убо тебе вдати сребро мое торжником, и пришед аз взял бых свое с лихвою:

28 возмите убо от него талант и дадите имущему десять талант:

29 имущему бо везде дано будет и преизбудет: от неимущаго же, и еже мнится имея, взято будет от него:

30 и неключимаго раба вверзите во тму кромешнюю: ту будет плачь и скрежет зубом. Сия глаголя возгласи: имеяй ушы слышати да слышит.

31 Егда же приидет Сын Человеческий в славе своей и вси святии ангели с ним, тогда сядет на престоле славы своея,

32 и соберутся пред ним вси языцы: и разлучит их друг от друга, якоже пастырь разлучает овцы от козлищ:

33 и поставит овцы одесную себе, а козлища ошуюю.

34 Тогда речет Царь сущым одесную его: приидите, благословеннии Отца моего, наследуйте уготованное вам Царствие от сложения мира:

35 взалкахся бо, и дасте ми ясти: возжадахся, и напоисте мя: странен бех, и введосте мене:

36 наг, и одеясте мя: болен, и посетисте мене: в темнице бех, и приидосте ко мне.

37 Тогда отвещают ему праведницы, глаголюще: Господи, когда тя видехом алчуща, и напитахом? или жаждуща, и напоихом?

38 когда же тя видехом странна, и введохом? или нага, и одеяхом?

39 когда же тя видехом боляща, или в темнице, и приидохом к тебе?

40 И отвещав Царь речет им: аминь глаголю вам, понеже сотвористе единому сих братий моих менших, мне сотвористе.

41 Тогда речет и сущым ошуюю (его): идите от мене, проклятии, во огнь вечный, уготованный диаволу и аггелом его:

42 взалкахся бо, и не дасте ми ясти: возжадахся, и не напоисте мене:

43 странен бех, и не введосте мене: наг, и не одеясте мене: болен и в темнице, и не посетисте мене.

44 Тогда отвещают ему и тии, глаголюще: Господи, когда тя видехом алчуща, или жаждуща, или странна, или нага, или больна, или в темнице, и не послужихом тебе?

45 Тогда отвещает им, глаголя: аминь глаголю вам, понеже не сотвористе единому сих менших, ни мне сотвористе.

46 И идут сии в муку вечную, праведницы же в живот вечный.