Текст книги "Даниловский молитвослов (СИ)"
Автор книги: Автор Неизвестен
сообщить о нарушении
Текущая страница: 14 (всего у книги 23 страниц)
Слава:
Якоже великий во Апостолех, всем был еси вся, Георгие, в заточении горцем сущим раны телесныя и душевныя исцеляя врачеванием Христовым, блаженне.
И ныне:
Молитвеннице неложная, упование христиан, Обрадованная, приими мольбы от нас, прилежно призывающих и молящихся Тебе.
Песнь 6-я
Ирмос: Бездна согрешений обыде мя последняя, но яко пророка Иону, Господи, возведи из истления живот мой.
Преподобне отче наш Георгие, моли Бога о нас.
Волею Господнею изшедшу ти из темницы, преподобне, во обитель Данилову вселился еси, Георгие, о нейже ныне молишися Христу Вседержителю.
Преподобне отче наш Георгие, моли Бога о нас.
Обрет, яко пристанище временное, обитель Данилову, славне Георгие, ныне же в непреходящих селениих купно с князем Даниилом на Небесех радуяся живеши.
Слава:
Был еси, Георгие, притекающим к тебе во обитель Данилову путевождь ко спасению, егоже ныне улучив, молишися о нас, блаженне.
И ныне:
Целомудрия Ходатаица призывающим Тя ныне явися, и от всяких избави напастей и бед молитвами Твоими, Богоневесто.
Песнь 7-я
Ирмос: Да преславное рождество Твое, Христе, еже от Девы, прообразиши яве, неопалимы в пещи отроки сохранил еси, песньми поющия Ти: Боже, благословен еси.
Преподобне отче наш Георгие, моли Бога о нас.
Никакоже забывал еси чад твоих, Георгие преподобне, понуждаемь пещися о них любовию Христовою, Емуже предстоя ныне, зовеши: Боже, благословен еси.
Преподобне отче наш Георгие, моли Бога о нас.
Любовь Христову в сердце твоем стяжав, чада твоя Пастыреначальнику привел еси, Георгие блаженне, Емуже о нас моляся, взываеши: Боже, благословен еси.
Слава:
Отдели тя телесне от паствы твоея изгнание горькое, но духом не возмогл еси разлучитися любящих тя, Георгие славне, во еже купно с ними звати Христу: Боже, благословен еси.
И ныне:
Покажи скорое Твое заступление, Мати Божия, призываем Тя от сердца, со слезами припадающе: скорби премени и обстояния разреши рабом Твоим, да поем: Боже, благословен еси.
Песнь 8-я
Ирмос: Древле оросившаго еврейския отроки в пламени и опалившаго халдеи преславно в нем, воспоем Господа, глаголюще: благословите и превозносите Его во вся веки.
Преподобне отче наш Георгие, моли Бога о нас.
Твердым помыслом гонения, скорби и болезни понесл еси, славне, имиже венец терпения приял еси, Георгие, ныне же, воздаянием некрадомым наслаждаяся, зовеши: Господа пойте и превозносите во вся веки.
Преподобне отче наш Георгие, моли Бога о нас.
Тесным путем шествуя, преподобне, пажитей достигл еси, блаженне, рая, небес ширших, идеже веселяся, взываеши со святыми: Господа пойте и превозносите во вся веки.
Слава:
Ни скорбь, ни болезнь, ни изгнание разлучити тя не возмогоша от любве Христовы, Георгие исповедниче, в нейже ныне на Небесех живеши, вопия: Господа пойте и превозносите во вся веки.
И ныне:
Да имя Твое, Богородице, на земли славословится, Иже бо из Тебе возсияв, грешником прибежище Тя дарова, Тобою бо всякое дыхание Господа поет и превозносит во вся веки.
Песнь 9-я
Ирмос: Тебе, мысленную и одушевленную лествицу, на нейже Бог наш утвердися, Еюже к Небеси обретохом восхождение, песньми, Богородице, величаем.
Преподобне отче наш Георгие, моли Бога о нас.
Зной земный понесл еси во изгнании твоем, исповедниче, алчбу и жажду претерпел еси, ныне же упасл есть тя Агнец на источницех прохладных вод животных.
Преподобне отче наш Георгие, моли Бога о нас.
Скорбел еси сердцем твоим, преподобне, слезя о чадех твоих и о мире всем, ныне же отъял есть Господь от очию твоею всяку слезу, Георгие блаженне.
Слава:
Не имел еси где главы подклонити, Георгие, егда готовляшеся отшествие твое во Град взыскуемый, ныне же вселился еси во обители непреемныя.
И ныне:
Нам, поющим Тя, и верою славящим, и к предстательству Твоему тепле притекающим, подаждь с Небесе разрешение лютых и мучащих страстей, да Тя непрестанно вернии величаем.
Акафист
Кондак 1
Избранный от Подвигоположника Господа Иисуса новый страстотерпче и молитвенниче пречудный, преподобне отче наш Георгие, обители Даниловой похвало и украшение, воспевающе честныя подвиги и еже за Христа страдания твоя, хвалебное пение приносим ти:
Радуйся, преподобне Георгие, исповедниче Христов.
Икос 1
Ангелоподобную доброту души твоея провидев, всей твари Создатель молитву твою чистую приемлет и таинственно от мощей Игумена земли Русския Сергия путь в Оптину пустынь тебе указует, аможе всею душею устремился еси, сего ради восхваляем тя сице:
Радуйся, молитвою матере во иночество избранный.
Радуйся, благодатию Божией призванный.
Радуйся, от юности мира отрекийся.
Радуйся, безплотным подобен явивыйся.
Радуйся, цвете райскаго саждения.
Радуйся, источниче сладкаго утешения.
Радуйся, очищенный в горниле искушений.
Радуйся, многия души приведый ко спасению.
Радуйся, преподобне Георгие, исповедниче Христов.
Икос 2
Видя тя настоятель отрока еще мала суща никакоже восхоте тя во обитель прияти, обаче молитвою преподобнаго Амвросия и настоянием матери умолен, премени изволение о тебе, да поеши со иноками Богу:
Аллилуиа.
Икос 2
Разум прозорлив стяжевая, прохождаше послушания иноческия да во всяком деле исправлен будеши, паче же смирению и послушанию научишися. Да и мы, видяще от силы в силу восхождение твое, бремя суетных попечений отвергнем и тебе вопием прилежно:
Радуйся, язвы Господа на теле носивый.
Радуйся, себе вбли Божией покоривый.
Радуйся, покаянием очищенный.
Радуйся, доброделанием освященный.
Радуйся, равноангельное житие до конца возлюбивый
Радуйся, Христа на милость преклонивый.
Радуйся, честное Святаго Духа жилище
Радуйся, Ангелов достойное увеселение.
Радуйся, преподобне Георгие, исповедниче Христов.
Кондак 3
Сила Вышняго укрепляше тя, блаженне, егда усмотре тя Господь достойна чина Ангельскаго, ты же, пострижение от настоятеля, яко от Христа, прием, полагал еси на сердце глаголы жизни вечныя и к небеси мысленно устремлялся еси, идеже Ангели поют Богу:
Аллилуиа.
Икос 3
Имея Господь промышление о спасении всякой плоти, постави тя настоятелем в обители Мещовстей, яве тем показуя высокия добродетели твоя, да и о братии печешися и обитель благолепно устроиши и слышиши от нас таковая:
Радуйся, обители устроителю добрый.
Радуйся, душ попечителю бодрый.
Радуйся, на всяком месте Богу трудивыйся.
Радуйся, тем от страстей свободивыйся.
Радуйся, пастырю, Богом поставленный.
Радуйся, ныне от паствы прославленный.
Радуйся, начальником светлый образе.
Радуйся, послушником кроткое украшение.
Радуйся, преподобне Георгие, исповедниче Христов.
Кондак 4
Бурею безбожных гонений вся Церковь Русская потрясеся, твое же попечение не токмо о братии, но и об окрестных людех бысть, егда таяся подавал еси ко двором мешцы с мукою, подвизая всех благодарне пети Богу:
Аллилуиа.
Икос 4
Слышаще близлежащия веси, яко поругание обители Мещовстей бысть и самаго тя во узах суща и от навет злокозненных смерть прияти имуща, зело печаловахуся, обаче не остави тя Господь. Но посла ти во уверение о спасении прежде почивших матерь твою и купца, егоже в жизнь вечную напутствовал еси и семью от разорения избавил еси. Тем похвальная приносим ти:
Радуйся, в слезном молении услышанный.
Радуйся, милостивый, от Господа помилованный.
Радуйся, видением чудесным о спасении уверенный.
Радуйся, яко добрая дела твоя не суть забвенна пред Богом.
Радуйся, молитвы сокровище неистощимое.
Радуйся, любве богатство неисповедимое.
Радуйся, яко тебе ради и соузников твоих пощаде Господь.
Радуйся, яко тии последи чада духовныя тебе быша.
Радуйся, преподобне Георгие, исповедниче Христов.
Кондак 5
Боготочнаго источника исцелений яви тя Господь в темнице, преподобне Георгие, егда хитрости врачебней обучился еси, темже сугубое избавление страждущим приношаше, душевныя раны купно с телесными врачуя, сего ради во узах сущии воспеваху:
Аллилуиа.
Икос 5
Видя тя Преосвященный Кирилл попечителя о душах изрядна, благослови на подвиг старчества, ты же изволение имел еси со страждущими в темнице до конца пребыти, да им послужиши. Мы же, произволению твоему дивящеся, вопием:
Радуйся, источниче сострадания приснотекущий.
Радуйся, преподателю Тайн Христовых непорочный.
Радуйся, Божиего домостроительства соучастниче.
Радуйся, славы Господни сопричастниче.
Радуйся, твердое упование в бури неверий.
Радуйся, скорое утешение во тьме озлоблений.
Радуйся, нощь жития сего мудро проходивый.
Радуйся, невечерний день Царствия Божия предвозвестивый.
Радуйся, преподобне Георгие, исповедниче Христов.
Кондак 6
Проповедника тя благочестия и духовника изрядна видя Преосвященный Феодор поручаяся из темницы тя изволяет и в обители Даниловой особо устрояет, да тамо служение твое исполниши и поют вси московскии людие:
Аллилуиа.
Икос 6
Возсия во обители Даниловой, яко светильник многосветлый, преподобный Георгий во дни великих смут и неверия, обышедших страну нашу, путь спасения всем показуя и яко кокош под криле своя птенцы собирая, да научиши их Божия Богови воздавати и веру истинную блюсти несумненно, да и мы взываем ныне:
Радуйся, на путь правый наставляй.
Радуйся, Царство Небесное возвещаяй.
Радуйся, наставниче смиренный.
Радуйся, молитвенниче прикровенный.
Радуйся, любве Христовой вместилище.
Радуйся, в мере житейстем пристанище.
Радуйся, радости райския провозвестниче.
Радуйся, избавления неложный благовестниче.
Радуйся, преподобне Георгие, исповедниче Христов.
Кондак 7
Хотя пастве твоей спастися и в разум совершенный приити, всем был еси кладезь премудрости и милосердия, да всех приобрящеши и ко Христу приведеши поющих:
Аллилуиа.
Икос 7
Новую воздвиг на тя напасть враг рода человеческаго, хотя разлучити тя от паствы твоея и до конца погубити, но ничтоже успе, не оставляху бо тя чада твоя на стране далече, паче же твой молитвенный покров познаваху, несть бо лишения любящим Господа, тем и мы с ними вопием:
Радуйся, отче духовный, чада твоя не оставляй.
Радуйся, молитвою нас всех заступаяй.
Радуйся, терпением укрепивыйся.
Радуйся, кротостию оградивыйся.
Радуйся, любве евангельския учителю.
Радуйся, целомудрия честнейший рачителю.
Радуйся, яко чада твоя Господа взыскуют.
Радуйся, яко Ангели о тебе торжествуют.
Радуйся, преподобне Георгие, исповедниче Христов.
Кондак 8
Дивно и пречудно есть твое молитвенное служение на земли Казахской, непрестанно бо службы совершал еси и милость Ббжию на люди, ихже дал тебе есть Господь, привлекал еси, да поем вси Богу:
Аллилуиа.
Икос 8
Весь был еси Богу освящаяся и еже со Христом быти паче всех вожделевая, темже и лишения претерпевая, страха смертнаго чужд был еси и странен на земли, к Небесному Отечеству устремляшеся, темже приими от нас таковая:
Радуйся, стяжавый благодать Святаго Духа.
Радуйся, по всему Христу уподобивыйся.
Радуйся, идеже главы подклонити не имевый.
Радуйся, изгнание кротце претерпевый.
Радуйся, Небесное Отечество возлюбивый.
Радуйся, земное странствие добре совершивый.
Радуйся, пришельца себе помышляй.
Радуйся, в вечныя кровы душу устрояяй.
Радуйся, преподобне Георгие, исповедниче Христов.
Кондак 9
Всякое человеческое мудрование умолкает, егда утешение Божественное находит, тако несть нам словеси рещи о свете Фаворстем, вся небеса в праздник Преображения осиявающем, токмо тебе и дщери твоей духовней явленном, поющим:
Аллилуиа.
Икос 9
Ветия многовещанныя аще и возмогли быша исчислити лишения твоя, обаче не разумеют долготерпения твоего, егда болезнь последняя найде на тя, тебе же все болезнование о чадех твоих бысть, иже купно с тобою страдаста. Тем тебе вопием:
Радуйся, паче себе ближних возлюбивый.
Радуйся, мученичеством безкровным себе украсивый.
Радуйся, возстания телесныя поправый.
Радуйся, Божественному безстрастию поревновавый.
Радуйся, Царствие Божие внутрь себе восхитивый.
Радуйся, правды ради душу твою положивый.
Радуйся, правило веры и благочестия.
Радуйся, радование Христова благовестия.
Радуйся, преподобне Георгие, исповедниче Христов.
Кондак 10
Спасти хотящу душу твою, весь ти путь бысть от грехов разрешати и причащати, темже и сподоби тя Господь со Святою Чашею в руку скончатися, да познают маловернии, яко честна пред Господем смерть преподобных Его, и да зовут Ему:
Аллилуиа.
Икос 10
Стена необоримая чадом твоим и по смерти являешися овогда видением сонным, овогда пришествием видимым утешаеши, во еже не быти им в сем житии многоскорбнем сирыми и унылыми, зовущим тебе:
Радуйся, обещавый услышати всех к тебе приходящих.
Радуйся, даруяй исцеление болящим.
Радуйся, скорби от сердец отымаяй.
Радуйся, греховную печаль потребляяй.
Радуйся, великое в бедах утешение.
Радуйся, в немощех нетрудное поможение.
Радуйся, в страстном борении воззвание.
Радуйся, в нерадении скорое покаяние.
Радуйся, преподобне Георгие, исповедниче Христов.
Кондак 11
Пение новое Церковь Русская днесь приносит, прославляя страстотерпцы и исповедники своя, святители же, монаси и мирстии, и о гресех чад своих воздыхает, да Христос Господь, зиждяй Церковь на крови мученик Своих, и наша грехи очистит и помилует всех зовущих Ему:
Аллилуиа.
Икос 11
Светильник присногорящий паки обрел еси обитель Данилову пристанищем себе, Георгие блаженне, в ней же ныне мощами почиваеши и послушаеши всех зовущих тебе:
Радуйся, в Небеснем Чертозе живущий.
Радуйся, Господеви непрестанно поющий.
Радуйся, обители твоея страже неусыпающий.
Радуйся, мощами в ней пребывающий.
Радуйся, яко тобою Христос прославляется.
Радуйся, яко тобою преисподняя посрамляется.
Радуйся, преподобных сподвижниче.
Радуйся, мученик сопричастниче.
Радуйся, преподобне Георгие, исповедниче Христов.
Кондак 12
Благодать испроси нам у Творца и Бога, прибегающим к покрову твоему и духовнаго твоего водительства взыскующим, во еже пети с тобою:
Аллилуиа.
Икос 12
Поюще многия подвиги твоя, преподобство вкупе с исповедничеством, духовничество с непрестанным молением, проповедничество и внутреннее безмолвие, прибегаем к действенной молитве твоей, еюже ты нас от разслабления возстави и на путь покаяния направи, ублажающих тя:
Радуйся, яко Царю Небесному предстоиши.
Радуйся, яко о всех нас тепле ходатайствуеши.
Радуйся, иноком наставниче премудрый.
Радуйся, послушником игумене предобрый.
Радуйся, чадом отче прелюбезный.
Радуйся, просящим молитвенниче неусыпный.
Радуйся, благочестивых людей услаждение.
Радуйся, монашествующих удобрение.
Радуйся, преподобне Георгие, исповедниче Христов.
Кондак 13
О священная главо, преподобне отче наш Георгие, Даниловския обители молитвенниче, Христа Бога от юности возлюбивый, и подвигом добрым Ему угодивый, веру же православную до смерти соблюдый, и ныне Престолу Божию предстоя, приими малое сие хваление от чтущих тя, и молися ко Господу о Церкви и Отечестве нашем, и о верою живущих в нем, да спасение улучивше, поем Ему:
Аллилуиа.
Этот кондак читается Трижды, затем икос 1 и кондак 1
Икос 1
Ангелоподобную доброту души твоея провидев, всей твари Создатель молитву твою чистую приемлет и таинственно от мощей Игумена земли Русския Сергия путь в Оптину пустынь тебе указует, аможе всею душею устремился еси, сего ради восхваляем тя сице:
Радуйся, молитвою матере во иночество избранный.
Радуйся, благодатию Божией призванный.
Радуйся, от юности мира отрекийся.
Радуйся, безплотным подобен явивыйся.
Радуйся, цвете райскаго саждения.
Радуйся, источниче сладкаго утешения.
Радуйся, очищенный в горниле искушений.
Радуйся, многия души приведый ко спасению.
Радуйся, преподобне Георгие, исповедниче Христов.
Кондак 1
Избранный от Подвигоположника Господа Иисуса новый страстотерпче и молитвенниче пречудный, преподобне отче наш Георгие, обители Даниловой похвало и украшение, воспевающе честныя подвиги и еже за Христа страдания твоя, хвалебное пение приносим ти:
Радуйся, преподобне Георгие, исповедниче Христов.
Молитва
О преславный угодниче Божий, преподобне отче Георгие, Даниловы обители похвало и украшение! Ты от юности своея монашеское житие возжелал еси, в немже подвизався, любовь Христову стяжал еси, и был еси пастырь добрый притекающим к тебе: последи же изгнания и многи скорби претерпев, Небесное Царство наследовал еси. И ныне призри на нас, чад твоих, молящихся тебе, и управи души наша ко спасению; обитель же нашу святую миром и благочестием укрепи, да чистым житием благоугодим Богу, Ему же всякая слава подобает, честь и поклонение, во веки.
Аминь.
Николай Чудотворец
22 мая, 11 августа, 19 декабря
Тропарь и кондак
Тропарь, глас 4
Правило веры и образ кротости, / воздержания учителя / яви тя стаду твоему / Яже вещей Истина. / Сего ради стяжал еси смирением высокая, / нищетою богатая, / отче священноначальниче Николае, / моли Христа Бога, / спастися душам нашим.
Кондак, глас 3
В Мирех, святе, священнодействитель показался еси, / Христово бо, преподобне, Евангелие исполнив, / положил еси душу твою о людех твоих / и спасл еси неповинныя от смерти. / Сего ради освятился еси, / яко великий таинник Божия благодати.
Канон первый, глас 2
Песнь 1-я
Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть: препрославленный Господь славно бо прославися.
Святителю отче Николае, моли Бога о нас.
Венценосец престолу Христову, премудре Николае, предстоя со Ангельскими воинствы, просвещение ми даруй, озаряющее души моея омрачение, яко да восхвалю, радуяся, твою, всеблаженне, память.
Слава:
Прославляяй вся Господь Того славящия, тя верным прибежище даде, напастей избавляюща притекающия к твоему крову, Николае, и призывающия тя верою и любовию, преславне.
И ныне:
Сравнитися желание ми вложив змий вселукавый Содетелю, яко пленника, восхити. Тобою же, Всечистая, воззван бых, обожився истиннейше: Ты бо, о Богомати, мене обожившаго родила еси.
Песнь 3-я
Ирмос: Процвела есть пустыня, яко крин, Господи, языческая неплодяшая, Церковь пришествием Твоим, в нейже утвердися мое сердце.
Святителю отче Николае, моли Бога о нас.
Николае блаженне, Владыки искренний ученик ты быв, спасаеши к тебе притекающия от лютых бед и смерти горькия.
Слава:
Очисти рабы Твоя, грехов оставление, яко благ, даруя, Николая, Твоего угодника, яже к Тебе ходатайствы, Многомилостиве.
И ныне:
Утоли смущение души моея, Пречистая, и жизнь окорми, Всесвятая, Бога рождшая, в Немже утвердися сердце мое.
Катавасия:
Молися Богу о нас, святителю отче Николае, яко мы усердно к тебе прибегаем, скорому помощнику и молитвеннику о душах наших.
Или ина катавасия:
Избави от бед рабы своя, святителю Христов Николае, яко вси по Бозе к тебе прибегаем, к скорому помощнику и теплому заступнику, и молебнику ко Спасу о душах наших.
Господи, помилуй (3 раза).
Седален, глас 4
Возшед на высоту добродетелей, Божественными оттуду отче озарився сиянии чюдес, пресветел воистину явился еси мирови пастырь, нам в напастех сый престатель непобедимь: темже преславно врага победив, лжу отгнал еси и человеки спасл еси от смерти, Николае. Моли Христа Бога, грехов оставление даровати, чтущим любовию святую память твою.
Слава Отцу и Сыну и Святому Духу, и ныне и присно и во веки веков. Аминь.
Яко Деву и Едину в женах Тя без семене рождшую Бога плотию, вси ублажаем роди человечестии: огнь бо вселися в Тя Божества, и яко младенца доиши Зиждителя и Господа. Тем ангельский и человеческий род достойно славим Пресвятое Рожество Твое, и согласно вопием Ти: моли Христа Бога грехов оставление даровати, покланяющымся верою Пресвятому Рождеству Твоему.
Песнь 4-я
Ирмос: Пришел еси от Девы не ходатай, ни Ангел, но Сам, Господи, воплощся, и спасл еси всего мя, человека. Тем зову Ти: слава силе Твоей, Господи.
Святителю отче Николае, моли Бога о нас.
Приближився чисте зарям духовным, светоносец был еси, мира просвещая концы, всем предстательствуя и вся спасая верою, к тебе притекающия.
Избавляя от смерти, яко явился еси первее, Николае, юноши, преподобне. Тако и ныне мя спаси от всякаго обстояния, и напастей, и бед, всеблаженне.
Слава:
Облистал еси добродетелей сияньми, всеблаженне, подражатель преизряднейший Твоего Владыки быв, спасаеши же, призываемь, благоговением и любовию тя славящия.
И ныне:
Найде на Тя Владыка твари воплощаемь, и спасая, яко благоутробен, всего мя человека: темже, вернии, Богородицу Тя славим.
Песнь 5-я
Ирмос: Просвещение во тьме лежащих, спасение отчаянных, Христе, Спасе мой, к Тебе утренюю, Царю мира, просвети мя сиянием Твоим, иного бо, разве Тебе, бога не знаю.
Святителю отче Николае, моли Бога о нас.
Боголепным житием, треблаженне, просвещаемь, осужденных неправедным изречением умрети, представ, избавил еси, Владыце Христу зовущия: иного бо, разве Тебе, бога не знаем.
Слава:
На Небесех присносущную славу ныне зря, и неизглаголанныя и Божественныя зари светлейшими наслаждаяся сиянии, покрый мя предстательством твоим, преподобне, угодниче Христов всечестне.
И ныне:
Да Твой взыщеши образ, погребенный страстьми, Спасе, Небесных утаився сил, воплощся из Девы, явился еси Тебе зовущим: иного, разве Тебе, бога не знаем.
Песнь 6-я
Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.
Святителю отче Николае, моли Бога о нас.
Иже победы, Николае, венец на твоем версе достойно положися, яко победитель убо изряднейший тя призывающия спаси.
Слава:
Умерщвлена мя, блаженне, прегрешеньми и страстей треволненьми погружаема, явився, спаси ко пристанищу Божественныя воли.
И ныне:
На Тя надежды возложих, Мати Приснодево, спасения моего и Тя предстательницу полагаю жизни, тверду же и непоколебиму.
Кондак, глас 3
В Мирех, святе, священнодействитель показался еси, Христово бо, преподобне, Евангелие исполнив, положил еси душу твою о людех твоих и спасл еси неповинныя от смерти. Сего ради освятился еси, яко великий таинник Божия благодати.
Икос
Воспоим ныне святителя песньми, мирским людем пастыря и учителя, да молитвами его просветимся: се бо явися чист весь, нетленен духом, Христу принося жертву непорочну, чисту, Богу благоприятну, яко святитель, очищен и душею и телом, темже сый истинно Церкве предстатель и поборник сея, яко великий таинник Божия благодати.
Песнь 7-я
Ирмос: Образу златому, на поле Деире служиму, трие Твои отроцы небрегоша безбожнаго веления, посреде же огня ввержени, орошаеми, пояху: благословен еси, Боже отец наших.
Святителю отче Николае, моли Бога о нас.
Острому искушению впадох, люте пострекаемь, и ко вратом ада приближихся, скорбьми поражаемъ, спаси мя молитвами твоими, блаженне, и возстави, поюща: благословен еси, Боже отец наших.
Слава:
Незаходимаго света невещественными лучами облистаемь, сущия во тьме скорбей озлобленныя исхити и к просвещению веселия настави, поющия: благословен еси, Боже отец наших.
И ныне:
Моли Христа, Сына Твоего и Бога, Дево Богородительнице, проданныя лютыми прегрешеньми и лестьми змииными кровию Его честною избавитися, поющим: благословен еси, Боже отец наших.
Песнь 8-я
Ирмос: В пещь огненную ко отроком еврейским снизшедшаго и пламень в росу преложшаго Бога пойте, дела, яко Господа и превозносите во вся веки.
Святителю отче Николае, моли Бога о нас.
Яко благ и сострадателен во глубине напастей люте содержимыя свободи, блаженне Николае, от содержащих лютых, разрешение подая молитвами твоими яже ко Спасу Христу, священнотаинниче.
Слава:
Тайновождь сущих паче ума, святых служитель и Небесных сый, Богомудре, архиерей же верен, прегрешений оставления проси от Спаса нашего, священноявленне.
И ныне:
Изнемогает мой ныне ум, во глубину впад безчестия, яко отвсюду различными объят есмь злыми; но Ты, Дево, исцели, безстрастия светом одевающи.
Песнь 9-я
Ирмос: Безначальна Родителя Сын, Бог и Господь, воплощся от Девы, нам явися, омраченная просветити, собрати расточенная. Тем Всепетую Богородицу величаем.
Святителю отче Николае, моли Бога о нас.
Свещами благодати, Богомудре, просвещаемь, и светильник благочестия яве был еси, сущия в напастех спасаеши, и сущия во глубине морстей избавляеши, и питаеши алчущия преславно, всеблаженне.
Слава:
Иже в рай сладости ныне водворяяся и неизреченную славу ясно зря, от Небесных круг певцы твоя назираеши, от страстей избавляя, Богоносе всеблаженне.
И ныне:
Премудрость, и Силу, и Слово Ипостасное Отчее, Богомати Чистая, родила еси, от Твоих пречистых кровей свой храм приимшую и Сему по соединению соединившую нераздельно.
Светилен
Великаго архипастыря и иерарха вси, председателя Мирликийскаго Николая восхвалим: многи бо мужи спасе, неправедно умрети имущия, и царю является со Авлавием во сне, реша неправедный суд.
Канон второй, глас 1
Песнь 1-я
Ирмос: Христос раждается – славите! Христос с Небес – срящите! Христос на земли – возноситеся! Пойте Господеви, вся земля, и веселием воспойте, людие, яко прославися.
Святителю отче Николае, моли Бога о нас.
Недоуменным языком и устнами похваление малое и моление принести твоему, Николае, приидох Богоподражанному преизяществу; но, яко богатодавец, Спаса и Бога милостива подаждь ми.
Святителю отче Николае, моли Бога о нас.
Человек сый Небесный, равноангелен на земли явился еси, вдов защитник готовый, и утруждаемых отмститель, и всем скорбящим в бедах помощник, отче Николае.
Святителю отче Николае, моли Бога о нас.
Сказует вся подсолнечная, Николае треблаженне, чудес твоих добродетелей пучину: нищии предстателя, и сироты и вдовы питателя, и слепии путевожда, вси же поборника.
Слава:
Троицу чествую Несозданную, Отца и Сына со Духом, Существо Просто, Божество, Естество Несекомое существенне, Три Ипостаси, разделяя Лично и по Ипостаси.
И ныне:
Безсеменно Слово зачала еси, Единаго от Троицы, Всенепорочная, и Сего плотию родила еси, пребывши по рождестве Дева, яко и прежде. Сего, яко Сына Твоего и Бога, о нас присно моли.
Песнь 3-я
Ирмос: Прежде век от Отца рожденному нетленно Сыну и в последняя от Девы воплощенному безсеменно, Христу Богу возопиим: вознесый рог наш, Свят еси, Господи.
Святителю отче Николае, моли Бога о нас.
Скрижаль в сердцы стяжав, Богомудре, многих добродетелей, написану безсмертным и пречистым перстом Христа Бога, Николае, паче меда и сота сладость точиши из устен твоих.
Святителю отче Николае, моли Бога о нас.
Показа благодать на тебе преславне чудеса, Николае: чистое бо житие твое, воистинну злата светлейши, облистает мрачныя души зарею Божественнаго Духа.
Святителю отче Николае, моли Бога о нас.
Живеши и по смерти, во снех яве являяся, и юноши от смерти преславно избавил еси, вопия яве царю: не обиди мужей, суетною завистию оклеветанных.
Слава:
Милостива буди мне, Всесвятая Троице, Боже наш, безмерными прегрешении осквернившему житие, Отче, Сыне и Душе Живый, соблюдающи мя отвсюду, и присно неуязвленна от скорби.
И ныне:
Даеши, Богородице, спасения надежду рабом Твоим и в нуждах, и напастех скоротечными молитвами соблюдати и помогати предстани: Ты бо еси похвала нам, верным, Приснодево.
Господи, помилуй (3 раза).
Седален, глас 4
Возшед на высоту добродетелей, Божественными оттуду отче озарився сиянии чюдес, пресветел воистину явился еси мирови пастырь, нам в напастех сый престатель непобедимь: темже преславно врага победив, лжу отгнал еси и человеки спасл еси от смерти, Николае. Моли Христа Бога, грехов оставление даровати, чтущим любовию святую память твою.
Слава Отцу и Сыну и Святому Духу, и ныне и присно и во веки веков. Аминь.
Яко Деву и Едину в женах Тя без семене рождшую Бога плотию, вси ублажаем роди человечестии: огнь бо вселися в Тя Божества, и яко младенца доиши Зиждителя и Господа. Тем ангельский и человеческий род достойно славим Пресвятое Рожество Твое, и согласно вопием Ти: моли Христа Бога грехов оставление даровати, покланяющымся верою Пресвятому Рождеству Твоему.
Песнь 4-я
Ирмос: Жезл из корене Иессеова и цвет от него, Христе, от Девы прозябл еси, из горы, Хвальный, приосененныя чащи пришел еси, воплощся от Неискусомужныя, Невещественный и Боже, слава силе Твоей, Господи.
Святителю отче Николае, моли Бога о нас.
Именование твое, едино воистинну призываемо, от всех вражиих совет скоро избавляет зовущия тебе тепле, священне Николае: яко первее воеводы избавил еси, спаси и нас от всякаго лютаго обстояния.
Святителю отче Николае, моли Бога о нас.
Престолу предстоя Божию, молити прилежно, мудре, не престай о всех нас, твоих верных рабех, чудне Николае, да огня вечнаго избавимся и от врагов, языка лукаваго и озлобления.
Святителю отче Николае, моли Бога о нас.
Врачевания точиши всюду верою к тебе притекающим и от уз избавляеши вся. Темже печаль нашу в радость преложи твоими Богоприятными молитвами, Николае пресветле, низлагая гордость врагов наших.
Слава:
Безначальнаго Божества начало Отца и Сына чту и Духа почитаю Всесвятаго, всяческих Вседетельное, Единственное, Несекомое, Треми Характиры и Лицы разделяемое присно, едино Царство Нераздельное.
И ныне:
Ты воистинну паче земных и Небесных честнейши Едина еси, Богородительнице: всех бо Творца во утробе зачала еси, плотию вещною одеяна, рождши без семене. О, новолепнаго зрения!
Песнь 5-я
Ирмос: Бог Сый мира, Отец щедрот, великаго Совета Твоего Ангела, мир подавающа, послал еси нам; тем, Богоразумия к свету наставльшеся, от нощи утренююще, славословим Тя, Человеколюбче.
Святителю отче Николае, моли Бога о нас.
Проповедует твоя, отче, чудеса, ныне Мир, величайшая митрополия и Ликийская епархия, и вся отечествия твоя чудодейства, имиже вся от болезней и скорбей избавлявши, Богоблаженне Николае.
Святителю отче Николае, моли Бога о нас.
Питатель вдов и отец сирот, помощник сущим в скорбех всеизряднейший, плачущим утешение, пастырь и путевождь всех блудящих, Николае, сый, и нас твоими молитвами от бед избави.
Святителю отче Николае, моли Бога о нас.
Преставился еси от земли к невещественным обителем, идеже зриши доброту неизреченную Христову, и Ангельским воинством собеседник явился еси. Темже, со апостолы и с мученики ликуя, прилежно Владыце всех, отче Николае, о нас молися.
Слава:
Собезначальная Три, Единопрестольная, Нераздельнаго же Единаго Божества славлю Самовластная Лица яве, Имже из не сущаго приведохся во еже быти, со Ангелы зовый: свят, свят, свят еси, Господи.
И ныне:
Человеком спасение всем и упование, яже предваряющи едина и спасающи, помози и ныне нам, вопиющим Тебе, Чистая, и призывающим Тя присно во обстоянии лютых: Предстательницы бо иныя, разве Тебе, по Бозе не имамы.
Песнь 6-я
Ирмос: Из утробы Иону младенца изблева морский зверь, якова прият; в Деву же всельшееся Слово и плоть приемшее пройде, сохраншее нетленну: Егоже, бо не пострада истления, Рождшую сохрани неврежденну.
