Текст книги "Мечта о русском единстве. Киевский синопсис (1674)"

Автор книги: И. Сапожникова

Соавторы: О. Сапожников
сообщить о нарушении

Текущая страница: 4 (всего у книги 13 страниц) [доступный отрывок для чтения: 5 страниц]

8.
О МОСОХЕ, ПРАРОДИТЕЛЕ СЛАВЕНОРОССИЙСКОМ
и о племени его.

МОСОХ, ШЕСТЫЙ сын Афетов, внук Ноев, толкуетжеся от Еврейска Славенски вытягающий и ростягающий, от вытягания лука и от расширения великих и множественных народов Московских, Славенороссийских, Польских, Волынских, Чешских, Болгарских, Сербских, Карвацких и всех обще, елико их есть, Славенска языка природне употребляющих. Той бо Мосох по потопе лета 131. шедши от Вавилона с племенем своим, абие в Азии и Европе над брегами Понтскаго или Чернаго моря народы Мосховитов от своего имени осади, и оттуду умножшуся народу, поступая день от дне в полунощныя страны за Черное море, над Доном и Волгою реками, и над езером или отногою морскою Меотис, идеже Дон впадает, в полях широко селеньми своими распространишася, по свойству и истолкованию имени отца своего Мосоха. Ибо, яко Афет толкуется разширение, или разширителен; тако подобне сказуется и Мосох ростягающий и далече вытягающий. И тако от Мосоха, праотца Славеноросскийскаго, по наследию его, не токмо Москва народ великий, но и вся Русь или Россия вышереченная произыде, аще в неких странах мало что в словесех и применися, обаче единым Славенским языком глаголют.

9.
О НАРЕЧИИ МОСКВЫ
народа и Царственнаго града.

НАРЕЧИЕ ТО МОСКВА, от имени праотца Мосоха изшедшее, аще оно искони вестно древним Летописцем бе, обаче на мнозе и в молчании пребываше. Ибо егда трие братия Князие Варязстии, о них же будет нижае, и Великая Княгиня Ольга, или Елена, и всея России первый Самодержец Владимир и вторый Мономах, Россиею обладаша, тогда Россами или Русаками звахуся; а в Российских Землях точию Киевский, Владимирский, Великоновгородский, Черниговский, Галицкий, Славенский, и прочии Князи имениты бяху. Москва бо город над рекою Москвою, от имени ея нареченный, наипервее из древа создан бысть и незначен даже до Великаго Князя Иоанна Даниловича, иже Престол Княжения от Владимира града в Москву град пренесе.

И тако величеством славы Престола Княжения от Владимира града пренесеннаго, Богоспасаемый град Москва прославися, и прародительное в нем имя Мосоха в народе Российском обновися, еже неувядаемою в веки памятию цветущи, изряднееже благодатию Божиею от силы в силу и от славы в славу преспевая, на высочайший степень самодержавнаго Царствия востече и благочестием, силою и мужеством православных Царей, найпаче великими чудесы Святых Российских Московских Чудотворцев, на высоту добродетелей возвысившися, яко солнце по Вселенней просветися, и паче иных сияет.

10.
О КОЗАРЕХ.

КОЗАРЫ ЛЮДИЕ откуду бы конечне с сицевым своим именем изошли, известие Летописцов о том несовершенно: обаче и сих людей Русских же народов быши непщуют; их же Великий Князь Светослав Игоревич отторгнувшихся из под его власти паки под свою власть воинскою силою подби, доставши и главны города их прозываемаго Беловес или Белая Вежа.

11.
О ЦИМБРАХ.

ЦИМБРЫ РОДСТВО свое имеют от старейшаго сына Афетова Гомора, от негоже наперва нарицахуся Гоморы, Гречески именовашася Кимеры или Цимблеры; потом прозваны бяху Цимбры. Размножившежеся по родом своим, иныи седоша в полях диких, иныи над Доном и Волгою реками, иныи над Богом рекою, иныи над Днепром, над Десною, Сосною, и над иными реками, иныи над Черным морем, идеже Очаков, Крым, Перекоп, и над езером Меотис; иныи же седоша, идеже Волынь, Подолье, Подляшье, Жмудь и Литва. Ибо от тех же Цимбров и Литовский народ изыйде. От тогожде Цимбрийскаго народа изшедшии людие по временем нареченны бяху, иныи Готами, Епидами, прочии Половцами, Ятвягами и Печенегами. Но все тии Цимбры бяху народы воинскии, мужественныи; и егда от полунощных стран, найпаче идеже ныне Литва, Прусы и Шведы, ради неплодствия земли поидоша до Франции и Испании, потом оттуду до Волох, или до Римлян; Римлянеже им не хотяху земли дати; они брань сведши с Римляны, многажды побеждаху Римлян, и селения своя разширяху и распосаждахуся, яко же хотяху. Потом нескоро, егда в тех изобильных странах пожившее в мире, разбогатеша, и к воинским делам разленишася, внезапу от некоего вожда Римскаго, именем Мария, нещадно побежденны бяху; сего ради ослабевшии в то время Цимбры в силах своих паки возвратишася в страны полунощныя, и седоша по различных местах и странах над вышереченными реками. Все же верою порознишася, инии Христиане, инии погане оставше.

12.
О ПРЕСЛАВНОМ ВЕРХОВНОМ И ВСЕГО НАРОДА РОССИЙСКАГО ГЛАВНОМ ГРАДЕ КИЕВЕ и о начале его.

ПРЕСЛАВНЫЙ ГРАД Киев коего бы лета искони основался, в многих Летописцех Русских несть числа, точию сице его выводят известное начало, яко по вознесении Господа нашего Иисуса Христа на Небеса, егда благодать Духа Святаго Апостоли Святии приемше, разыдошася во всю землю проповедати Евангелие всей твари, к вере же Христовой и ко крещению обращати; тогда изрядный заступник наш Российский, Святый Апостол Андрей Первозванный, по жребию разсевая благоплодное семя Евангелия Господа нашего Иисуса Христа в Европе, пустися в Греческую землю, к Скифом, или Татаром; достигши же Херсона, увестися, яко близ есть устие реки Днепра, и хотя оттуду ити в Рим, поплы горе Днепра, и приближшися к горам высоким (идеже ныне Киев) ста под ними, и возшед на тежде горы, благослови их и Крест водрузи на месте, идеже по сем Церковь воздвижения Креста Господня сооружися, пророчески глаголя учеником своим: на сих горах возсияет благодать Божия, и будет град велик, и воздвигнет Господь Бог в нем множество Церквей. По сем отпустишися Днепром и прииде к Славяном, идеже ныне великий Новгород, и оттуду чрез землю Варяжскую пустися до Рима, о чем в житии его широчае.

13.
О ПЕРВОНАЧАЛЬНЫХ КНЯЗЕХ КИЕВСКИХ
и о создании града Киева и имени его.

ПО БЛАГОСЛОВЕНИЮ И ПРОРОЧЕСТВУ изряднаго заступника Российскаго, Святаго Апостола Андрея Первозваннаго, на горы Киевския, немалу времени прешедшу, приидоша от диких поль с Славяны великими и зело храбрыми народы трие братия родныи, Князие Российскии: первому имя Кий, второму Щек, третиему Корев, или Хорев, и сестра их с ними прииде Лыбедь к брегом Днепровым, рода все Афетова и племени Мосохова, идеже владеюще народами и Полянскою Землею, начаша грады и места ради тишайшаго жития и прибежища созидати. Первее убо старейший брат Кий основа и согради город и место на горе над рекою Днепром, нарекши его от своего имени КИЕВ, коегоже лета, Летописцы Российскии не пишут, вину дающе, яко тогда писания не знаяху, и тщания к нему и действ летных к начертанию не бысть: но яко прост и силен народ в воинских делех упражняшеся. Един точию Летописец описа основание града Киева лета от рождества 431. Вторый брат Щок или Щек созда недалече Киева град на горе же, и нарече его ЩЕКАВИЦА или ШКОВИЦА от своего имени, яже гора и доныне тако именуется. Третий брат Корев, или Хорев созда град такожде от своего имени ХОРЕВИЦУ, и по том ВЫШГОРОД прозвася. Сестра же их Лыбедь, над рекою Лыбедью свои осады положши, таможе и город на пригорку высоком согради от своего имени ЛЫБЕДЬ. Имеша же те Князие у себя и Гетманы, от них же бе первый именем Радим, а от того нарекошася Радимчане, вторый Вяшко, а от того Вятичи или Витичи, ниже Триполя; третий Дулепа, а от того Дулепяне над Богом, иже ныне нарицаются Лучаны.

14.
О СМЕРТИ КИЯ, ЩЕКА И ХОРЕВА
и о наследии их по них.

ЕГДА ЖЕ КНЯЗИЕ Российскии трие братия, Кий, Щек и Корев, или Хорев, по довольном княжении своем над Россами, живот смертию премениша; по них кто бы на месте их градом Киевом природным свойством господствовал, велие о сем между Летописцами разнствие. Аще бо и наследники осташася, но неведомы бяху писанием; зане прост народ бысть писания неумеющий: аще же о них и было что написано совершенно, и тому чрез частыя и великия брани нужда бысть погибнути. Токмо Стрийковский род их сице изъявляет: яко по смерти тех трех братий Князей Росских, сыны и наследники их по них долгий век всяк на своем уделу господствоваша; даже потом на их места Осколд и Дир Князие от их же народа наступиша, о них же будет нижае.

15.
О СЕМ, КОГДА РОССЫ
писмена знати начаша.

ВЕДАТИ ЖЕ ПОДОБАЕТ, яко Славеноросский народ еще в лето от Рождества Христова семь сот девятьдесятого нача писание имети и умети. Ибо в том годе Кесарь Греческий, брань ведши с Славянами и мир с ними соделавши, послал им в знамение приятельства и неразрушимаго мира литеры, сиречь писмена азбучная А, Б, В, и прочая, яже в то время от Греческаго писания ново бяху измышлена ради Славянов; и от того времени Россия наша нача писания и книги имети и деяния своя исписовати; обаче Поляков писмены и историями Славяноросский народ двома сты лет и девятью упреди. Ибо Поляки за Мечислава, перваго Христианскаго Князя Польскаго, начаша чести и писати; о чем вси Летописцы Латинскии и Греческии и Польскии соглашаются, яко и Стрийковский ясне изобразует.

16.
ЕЩЕ О РУСИ или РОССИЯНЕХ
в полунощных странах, и о великом НОВГОРОДЕ.

ИНЫИ ЖЕ РОССЫ страною, естеством же едины, в полунощных странах над езером Ильменом широко седоша, а прочии над Волховою рекою, идеже создаша Новгород Великий, и Гостомысла, некоего мужа нарочита, от среды себе в Князя избраша, и по времени град сей в толику славу и силу возрасте, яко некоим Летописцем Немецким Кранциусом в сицевую притчу ему внийти: Ктож может или дерзнет на Бога и Великий Новгород? Егда же в велицем междоусобии и многом нестроении Российскии народы быша, не согласующеся в избрании от среды себе Властелина, советоваше он же нарочит и разумен муж, в великом Новгороде живущ Гостомысл, да пошлют к Варягом, и триех братий, иже бяху Князи изящнейшии, и в храбрости воинской изрядни, на Княжение Росское умолять. Понеже Варяги над морем Балтийским, еже от многих нарицается Варяжеское, селения своя имуще, языка Славенска бяху, и зело мужественны и храбры. И тако по совету Гостомыслову сбыстся. Приидоша на прошение Россов Князие Варязстии, от Немец три родные братия, Рурик, Сенаус, или Синеус, и Трувор или Тривор, в Землю Русскую лета от сотворения Света 6370, а от Рождества Христова, по Кромерову свидетельству, осмь сот шестьдесят втораго.

17.
О КНЯЖЕНИИ РУРИКА С БРАТИЕЮ В РОССИЙСКОЙ ЗЕМЛИ.

РУРИК, СИНЕУС и Трувор, прияти бывше от всех Россов с великою радостию и благодарствием, абие и Государство Русское добровольно от народа добровольнаго подданое, на три части между собою разделиша: старейший Рурик восприят себе Княжение Великоновгородское, а в столицу свою на острове езера Ладоги заложи; Синеус объят страны Российския над Белым Озером, над ним же себе город и столицу созда; а Трувор восприят княжение Псковское, столицу же свою заложи в Сборцах или в Изборску.

18.
О ОСКОЛДЕ И ДИРЕ,
племени Киевом, како начаша княжити в Киеве.

БЕСТА У РУРИКА КНЯЗЯ Великоновгородскаго некая два нарочита мужа, (о них же не бе нам известно, аще идоша от колена основателя и перваго Князя Киевскаго Кия) Осколд и Дир; и упросистася у него ити (яко свидетельствует Летописец Российский Преподобный Нестор Печерский) ко Цариграду с роды своими, и идущим им во скрай Днепра, узреста город на горе, и ставше вопросиста тамо живущих, чийбы был сей град? И возвестиша има, яко град есть Киев от трех братий, Кия, Щека и Хорева создан, и яко обидимы суть от Козар и дани им дают; и тако увестившеся о Киеве, седоша в нем и совокупивше многи Варяги, начаша владети ту и обладати всею тою Киевскою Землею, аки Князие.

19.
О КНЯЖЕНИИ ИГОРЯ РУРИКОВИЧА С ОЛЕГОМ ДЯДЕЮ.

ПО СМЕРТИ ВЕЛИКОНОВГОРОДСКАГО Князя Рурика остася по нем сын его Игорь в дозор Олегови Велможе, сродникови своему, со всеми Княжствы Российскими; понеже Игорь млад еще бе. И услышавши Олег, яко Осколд и Дир ходивше к Цариграду войною, возвратистася в Киев посрамленны в малой дружине, абие вземши с собою Игоря Руриковича, пойде к Киеву, и достигши града Киева, ста под ним, и вызва лестию к себе на стан из града Осколда и Дира, аки беседы ради приятельския. Они же никакова зла себе чающе, изыйдоша к нему малолюдно. Тогда Олег показа им Игоря Руриковича, глаголя: яко сей есть наследник всех Княжений Российских сын Руриков; и абие повеле Осколда и Дира пред собою побити; и погребоша Осколда на горе, на нейже по том великая княгиня Ольга[12]12
  В Летописях Софийской, Воскресенской, Архангелогородской, Никоновой и других сказано, что не Олга, а некто Олма поставил сию Церковь. – Издат.


[Закрыть] , крестившися, первую Церковь Святаго Николы в Киеве постави: а Дирова могила за Церквою Святыя Ирины. И в то время скончася наследие свойственных Князей Российских Киевских в Осколде и Дире; а от Князей Варяжских, от Игоря Руриковича, прочии Князие даже до Великих Князей Московских родство свое изведоша.

20.
О ВЛАДЕНИИ ОЛЕГОВОМ
в Киеве и о смерти его.

ПО УБИЕНИИ ОСКОЛДА и Дира нача владети Олег в Киеве всеми Российскими Княжествы, подбивая под власть себе и Игореви всякия страны силою и различным промыслом. Покоривши же Древляны, возложи на них дань, и потом егда о победе веселяшеся в Киеве, повеле пред себе любимаго своего коня привести, и призвав волсвы, вопроси их, чтобыся им мнело о том коне? они же отвещаша ему, яко от того коня смерть имать тебе быти. Сего ради повеле Олег коня онаго от себе отвести и блюсти его особь. По сем ходи Олег войною в дву тысящу кораблей к Цариграду, егоже Кесарь Грецкий Лев Премудрый немогий стерпети, умягчи дарами и мир купи. Олег же прием дары и возложи дань на Греки, дабы на вся две тысящи кораблей, в них же бяше по 40 мужей, всякому человеку по 12 гривен сребра давали. Тоя ради вины и потом своего времени Греки дань даяху Российским Князем в Киев, в Чернигов, в Новгород Великий, в Полоцк, в Ростов, в Любеч. Егда же Олег возвратися от Цариграда и прииде в Киев, воспомяну о коне своем, о нем же волсвы ему провозвещаху, и приемши весть, яко уже конь той издше, абие пойде смотрети костей его, и пришедши над кости, глаголаше: се, волсви, вещба ваша, не хотел бы вам сицевыя смерти приключитися; и удари в главу конску, и абие изскочи из главы конския змия люта, и усече его в ногу, и тако от тоя язвы умре Олег, совершивши лет 33 на Государстве Киевском, Новгородском, Изборском, Белоозерском и всея России. Погребен же бысть на горе Шковице по обычаю поганску.

21.
О КНЯЖЕНИИ ИГОРЯ
Руриковича в Киеве по Олеге.

ПО СМЕРТИ ОЛЕГОВОЙ, Великий Князь Игорь Рурикович нача сам княжити в Киеве, на Великом Новгороде и на Белом Озери, и на всех Княжениях и Землях Российских, восточных, полунощных, и на полудне лежащих. Еще же живу сущу Олегу, сочетася Игорь Ольгою премудрою и красною девицею, правнукою Гостомысловою от Изборска; и наложи Игорь дань на Древляны тяжчайшу Олеговы, еюже обтяжи и опечали их зело; чесо ради убиша его Древляне, и погребен бысть в Коростени, (а ныне зовется Искоресть) под могилою высокою ушу&тою (насыпною) лета от создания Мира 6458, от Рождества же Христова десятьсот пятьдесятаго.

22.
О КНЯЖЕНИИ ВЕЛИКИЯ
Княгини Ольги в Киеве.

ВЕЛИКАЯ КНЯГИНЯ Ольга, по смерти мужа своего Игоря Руриковича оставшися с сыном своим Светославом Игоревичем вдовою, все Государства Российскии в свою власть прият, и не яко женск сосуд немощен, но аки крепчайший Монарха или Самодержец, всеми Княжении Российскими благоразумно правляше. Древляне же велию дерзость от убиения Государя своего Игоря восприемше, послаша к Ольге Княгине двадесят нарочитых мужей в лодиях, увещевающе ю доброхотно, а потом и претяще, да и по нужде Князю их Древлянску Низкине, убийце Игореву, жена будешь. Она же послание слышавши, повеле нарочитых ради сватов и честь нарочиту устроити, сиречь ров глубок в дворе ископати, и их воврещи; сама же преклоншися над ров вопрошаше сватов о здравии, и повеле живых землею загребсти. Сие соделавши, абие посла гонца к Древляном с челобитием и благодарствием, яко о вдовстве ея и сиротстве попечение имеют. Ибо (рече) мужа своего из мертвых воскресити не могу: а понеже млада есмь, в брачное сочетание Князю вашему не отрицаю, точию мене ради пришлите по моему сану людей нарочитых еще больше, нежели первее. Древляне же с велиею радостию послаша к ней пятьдесят мужей великородных; и егда прийдоша к Ольге, повеле толиких ради гостей и подорожна труда баню уготовати, и проси их, дабы по далеком пути и по труде почили, и мылися в бани. Они же с веселием внийдоша в баню; а Ольга повеле соломою и хврастием баню оболкши запалити, и сгореша с банею все послы. И паки посла Ольга гонца, изъявляя скорое свое пришествие к Древляном в супружество Князю их, а им в Государыню, точию бы приготовали медов и всякия пищи и пития изобильно, да пришедши к ним, прежде втораго брака, первому мужу своему Игореви тризну, сиречь, помины совершить. Древляне же сему паче ради быша, и абие вся уготоваша изобильно к нарочитому веселию в главнем месте Коростене, или по нынешнему званию Искорести.

23.
О ПЕРВОМ ПОХОДЕ ОЛЬГИ
к Древляном.

ВЕЛИКАЯ КНЯГИНЯ Ольга по обещанию своему со уготованными многими людьми не тако к веселию, яко к бою на урочное время пойде до Коростеня. Древляне же цветно коньми и одеждами украсившеся, изыдоша ей в стретение, и приемше ю с велиею честию, вопрошаху о послах своих первых и вторых; и отвеща им, яко по нас иным им ведомым путем со всем имением моим и богатствы идут. И тако по приговору своему с Древляны, пойде прежде брака на гроб мужа своего Игоря и плакася над ним; помины же совершивши, повеле велику могилу над Игорем высыпати; а Древляне рекоша к ней: мужа твоего мы убихом, яко он не бе милосерд к нам, не аки Государь с подданными, но яко волк со овцами управляшеся. Тогда Ольга сокрывши в сердце своем жалость и ярость, облечеся в цветныя драгоценныя одежды, аки на брачно веселие, и нача учреждати различным питием Древлян честно, а своим людем заповеда отнюдь не пити. Егда же Древляне вси упишася, абие внезапу повеле их своим на то устроенным людем посещи; и погибе Древлян в то время пять тысящ. И тако Ольга смесивши с кровию Древлянскою свадьбу, возвратися в Киев.

24.
О ВТОРОМ ПОХОДЕ ОЛЬГИНОМ
к Древляном.

ПОТОМ ПАКИ Великая Княгиня Ольга с великою силою пойде на Древляны с сыном своим Святославом или Светославом Игоревичем, наставляя и его к отмщению смерти отеческия, и порази велику рать Древлянску на бою, а бежащих от побоища гнаше даже до главнаго града их Коростеня, идеже затворишася Древляне: а Ольга доставаше их, весь год стоя под градом неотступно. Видящи же премудрая Княгиня Ольга, яко неудобь взяти града приступами, вдася к хитростному промыслу, и посла ко всем гражданом глаголя: яко уже отмстила есмь смерть мужа своего, обаче не отступлю от вас, дондеже ми куюлибудь дань дасте; а не хощу большия, точию дадите ми в дань всяк от себе по три голубя и по три врабии. Древляне же ни во что сию дань яко женска разума вменьше, абие ту с велиим тщанием исполниша: а Ольга всякому голубю, и врабию повеле в ошибы и в крыла управити устроенныи фитили с серою, и запаливши фитили, пустити их в вечер; голубь же всяк к своему дому и врабий к стресе с огнем прилетевши, на многих местах град зажгоша: а Ольга горящу граду, абие всею силою нача приступати от всех стран под город. Тогда от возгорения града бежащих велие множество Древлян побиша; инии с женами и детьми погореша, иныи многии пленены быша. И тако мудрая и храбрая Княгиня Ольга, отмстивши мужа своего смерть, прият в свою область вся грады Древлянския и возвратися в напрестольный свой град Киев с велиею радостию с сыном своим Светославом.

25.
О ПОХОДЕ ОЛЬГИ
к Цариграду и о крещении ея.

ЛЕТА ОТ СОЗДАНИЯ МИРА 6463, а от Рождества Христова 955, Великая Княгиня Киевская и всея России Ольга с великим имением в строи нарочитом кораблями пойде к Цариграду, и пришедши с Русскими Боляры и Дворяны пред лице Кесаря Греческаго, по Стрийковскаго свидетельству, Иоанна Земиски, или Цимисхия, а по летописанию преподобнаго Нестора Печерскаго, Константина Леонова сына, вдаде ему великие дары. Кесарь же прият ю благоговейно и честь достойную воздаваше. Возбуждшижеся красотою, славою и храбростию ея и широтою Государств Российских, рече к ней: достоит ти, Ольго, быти Царицею Еленою, и на царствии Гречестем купно с нами в сем нашем граде главном Цариграде обитати; и понуждаше ю в союз брачный с собою, зане вдов бяше. Ольга же на сие отвеща ему: Кесарю! Аз есмь поганка, а зде приидох веры вашея Христианския научитися; аще хощеши мене в жену себе, окрести мя. Тогда Патриарх Цариградский Полиевкт, а по свидетельству Летописца Зонары, Феофилакт, поучивши ю вере Христианстей, окрести со многими Российскими боляры; сам же Кесарь по прошению бысть ей восприемник, или отец крещенный; дано ей имя Елена, по подобию первыя Царицы Греческия Елены. По крещении же проси Кесарь Елену на пир к себе, идеже беседуя о мнозе, и се рече к ней: да будет ему жена, якоже сама обещася. Но Елена отвеща ему: како можеши мя дщерь свою крестную в жену прияти? ибо не точию в Законе Христианстем, но и в поганстем скверно есть и отметно, отцу дщерь свою жену водити. Усумнежеся о сем Кесарь и рече к ней: прехитрила мя еси, Ольго. И давши ей великие дары, отпусти ю в свояси. Елена же прииде к Святейшему Патриарху благословения ради в путь и в дом свой, глаголющи: сын мой Светослав есть поганин и людие все суть поганы; да избавит мя Господь Бог, Святейший Отче, благословением и Святительскими твоими молитвами от всякаго зла. Патриарх же рече к ней: дщи моя верная о Христе, в него же окрестилася еси, Христа и облекла! той тя сам избавити и соблюсти имать от всякаго злаго обстояния, яко избави Ноя от потопа, Лота от Содомлян, Моисея с Израилем от Фараона и дому работы, Давида от Саула, Даниила от уст львов, триех отрок от пещи; тако и тебе избавит от всякия напасти. Благословенна бо еси в женах Российских; блажити тя будут вси роды Российскии в последнем роде и в внуках твоих. И се рек, даде ей благословение и Пресвитера, и отпусти ю. Возвратившижеся Великая Княгиня Ольга первоначальная от святаго крещения мати Российская Елена в Киеве, много Россов к Христу обрати и крещением святым яко солнцем тму идолослужения прогна и омраченныя просвети, и в Киеве первую от себе Церковь святаго Николая на Оскольдовой могиле постави. Но сына своего Светослава всякими мерами не возможе к Христу и к познанию истиннаго Бога обратити; зане зело муж храбр бысть, и все свое житие воински ведяше. Сего ради и матери отвещаваше: егда бы (рече) аз окрестился, людие и сверстники мои сотворити сего не восхотят и мене отступят; мне же не будет с ким ратовати и отчизны заступати. Бысть же он сицеваго мужества воин, яко коль скоро лет своих дошед, на поле вящше с храбрыми своими вои обиташе, ни возов, ни шатров, разве опанчи, ни подкладов, ни котлов не взимаше. Ядь бо его бе суха, седание же на голой земли под небом и легание на седле и войлоку; сего ради роскошных и ленивых всяких народов побеждаше.